6 जे आऊँ कमण्ड करना चाऊँ बी तो मूर्ख नि ऊणा, कऊँकि सच बोलूँगा। पर आँऊ आपणे आपू खे कमण्ड करने ते रोकूँआ। कऊँकि लोक जेड़ी मेरी जिन्दगिया खे देखोए और मांते उपदेश सुणोए तिजी ते जादा बढ़ी की माखे कुछ बी नि समजो।
7 माखे परमेशरे बऊत ई नौखिया गल्ला दखाईया। आँऊ इना गल्ला पाँदे कमण्ड नि करूँ इजी खे मेरे शरीरो रे एक कांडा चुबाई राखेया। से कांडा शैतानो रा दूत ए से माखे तकलीफ देंदा रओआ कि आऊँ कमण्ड नि करूँ। 8 इजी रे बारे रे मैं प्रभुए ते तीन बार बिनती कित्ती कि ये मांते दूर ऊई जाओ। 9 प्रभुए माखे बोलेया, “मेरी कृपा ताखे बऊत ए; कऊँकि मेरी सामर्थ कमजोरिया रे बऊत अच्छा काम करोई।” इजी री खातर आऊँ बड़ी खुशिया साथे आपणी कमजोरिया पाँदे कमण्ड करूँगा ताकि मसीह री सामर्थ मां पाँदे छांएं करदी रओ। 10 इजी बजअ ते आऊँ मसीह री खातर कमजोरिया रे, निन्दा रे, गरीबिया रे, उपद्रवो रे और मुसीबता रे खुश ए; कऊँकि जेबे आऊँ कमजोर ओऊँआ, तेबे मसीह री सामर्था ते तागतबर ओऊँआ।
14 देखो, आऊँ तीजी बार तुसा गे आऊणे खे त्यार ए और मां तुसा पाँदे कोई बोज नि राखणा। कऊँकि आऊँ तुसा री सम्पति नि, बल्कि तुसा खेई चाऊँआ। कऊँकि बच्चेया, माया-बावा खे पैसा कट्ठा नि करना चाईयो, पर माया-बावा, बच्चेया खे पैसा कट्ठा करना चाईयो। 15 मां तुसा लोका रिया तंईं बड़ी खुशिया साथे खर्च करना, और आपणे प्राण बी तुसा खे देई देणे। क्या जितणा जादा आऊँ तुसा साथे प्यार राखूँआ, तिथणा ई कअटी की तुसे बी मांते प्यार राखोगे?
16 फेर बी तुसा खे ये मानणा पड़ना कि आँऊ तुसा लोका पाँदे बोज नि बणेया, पर एड़ा ऊई सकोआ कि कोई बोलो कि मैं चलाकिया ते तुसे तोखा देई कि फसाई ले। 17 तुसेई बताओ जो लोक मैं तुसा गे पेजे, क्या तिना लोका बीचा ते किने बी तोखा करी की तुसा ते कुछ गल़त फाईदा लया? 18 मैं तीतुसो खे समजयाई की तेस साथे से पाई पेजेया, तो क्या तीतुसे तोखा करी की तुसा ते कुछ गल़त फाईदा लया? क्या आसे एक ई पवित्र आत्मा रे चलाए नि चले? क्या एक ई बाटा रे नि चलिए?
19 पर तुसे एबुए तक समजणे लगी रे ऊगे कि आसे तुसा सामणे जवाब देणे लगी रे। आसे तो परमेशरो खे आजीर जाणी की मसीह रे बोलूँए। ओ प्यारेओ, सब गल्ला तुसा रे विश्वासो री बड़ोतरिया खे बोलूँए। 20 कऊँकि माखे डर ए कि केथी एड़ा नि ओ कि आऊँ आईकि जेड़ा चाऊँआ, तिंयाँ तुसा खे नि पाऊँ और माखे बी जेड़ा तुसे नि चांदे, तेड़ा ई पाओ। केथी एड़ा नि ओ कि आँऊ तुसा रे एती आईकि चगड़ा, जल़न, रोष, बिरोद, ईर्ष्या, चुगली, कमण्ड और बखेड़े पाऊँ 21 और केथी एड़ा नि ओ कि जेबे आँऊ वापस आँऊ तो मेरा परमेशर माखे तिना सामणे शर्मिंदा नि करी देओ और माखे बऊत जणेया खे फेर शोग करना पड़ो, जिने पईले पाप कित्तेया था और गन्दे काम, व्याभिचार, लीचड़पण ते, जो तिने कित्तेया, मन नि फेरेया।
<- 2 कुरिन्थियों 112 कुरिन्थियों 13 ->