1-7 Lahatala Ana Sara eaabetang angu uuling ateing, emenghula Ana vengbanang iila angu edadenang. Angu ebele, Lahatala Ana aaung-hama ening metma Sara adana, naba ba Ana vengpalai tila angu eamulung. Abraham ana boma tila, aarunge luung niang se, Sara ana atou veng. Angmuse Sara ana vaal mehal nu vengajait metma Abraham enang, ejol ba Lahatala Ana vengbanang iila angu eamulung. Abraham ana oal angu ene maveng, ene Isak (evengbanang tarang se hula, ꞌana palelaꞌ).

Isak euumur ved tuaru muse, Abraham ana aing sunat, Lahatala Eparenta angu eamulung. Uanguveng Sara ana Isak aing vengajait metma Abraham enang angu, Abraham euumur mitung 100 tila. Angmuse Sara ana mateng hula, “Lahatala Ana ening na palela, se nomi sanang iila angu ebele. Base angase, nehe ba na anga vengmee ang naung, ing emangpi nat hama-hamat palela.” Nemehal noleve boma-memet lolobahi tila. Angu ebele, nehe emangpi veng iomit hula, angase na bae bisa vaal veng niang iila.

Aarunge Lahatala ana ening angase na bisa vaal mehal nu vengajait metma nemehal enang iila.

8 Isak ana bilang aaeele-aaeele muse, ini aing sole. Uanguveng hula Isak aing sole angu, Abraham ana pesta eele ening.

9-10 Uanguveng angu, Sara ana uuling ateing se, Hagar oal Ismael angu, ue oal Isak oleve mamulal sehi. Angmuse Sara ana emehal Abraham at mateng hula, “Malea ba Masir mi hoa angu, aaungba oal oleve iateri! Se malea oal angu, ana bae noal Isak at hama-hamat pasaka ang naung medi niang, aarunge emangpi angu malekang metma noal Isak ba eooa angu ebele.”

11 Sara emateng angu vengmee muse, Abraham omi etatabit dira, bot ekubang sar angu mang hula sia, se Ismael angu di oal angu ebele. 12 Aarunge Lahatala Ana Abraham at mateng hula, “Abraham! Ekang oomi dirat metma eemalea angu oal oleve iadana ekang. Emangpi ba Sara ana vengbanang angu aana malekang venghele, bot ening eamulung, se eetabaning ba Na metma veng aat palai tila angu, Isak ba at lamal angu ebele. 13 Aarunge eemalea oal angu di, etabaning angu, eningse Na metma bangsa nu ening, se andi ooal angu ebele.”

14 Emitobang kukuaveng muse, Abraham ana mod ening, bot jar botil nu medit metma Hagar enang. Bot vaal angu Abraham ana ohit metma Hagar abea taang, sengmuse ana iot lamal ila. Angmuse Hagar ana oal angu at ila por osing eele ba Beer Syeba abung angu migoleng lamal.*Uanguveng angu, Ismael euumur mitung arinu belta buta lebe Kejadian 16:16; 21: 5, 8 mi euuling.

15 Uanguveng ijar ba botil mi angu osing iila muse, Hagar ana oal angu aing metma te kiki nu angu iivang atiang, 16 sengmuse ana ila oal angu eolat mihi. Oma meter ari iising aulang. Se ana vengpikir hula, “Kalo noal anga aamina, na uuling ateing se, na vengtahang jadi niang.” Angmuse ana angumi mihit baut hanuring.

17 Ismael ana bau angu, Lahatala Ana amal angu vengmee. Angmuse Lahatala Egahingvala sorga mi angu, burang mi Hagar earut hula, “Hagar! Etatalang ba aana susat aulang angu? Ekang uuangmari ekang. Ooal Ismael ana emana mi tiat bau angu, Lahatala Ana amal angu vengmee tila. 18 Aaungba tahit ila vaal angu aing ohi, bot amunang, senge omi angu ening sanang. Eningse Na aing metma bangsa eele nu ening.”

19 Angmuse Lahatala Ana Hagar eng angu ening tarang, base jar eng nu ue angmi angu, ana uuling ateing. Angmuse Hagar ana jar angu iihit metma ebotil angu mi, sengmuse ana metma oal Ismael enang ana na.

20-21 Lahatala Ana Ismael at toang-pina, angu ebele Ismael ana bilang taang aaeele-aaeele. Ismael, bot iva oleve padang Paran mi mihi. Ismael angu, aing pintar na atapa. Ismael iva ana Masir jangu nu at hoa maenang ana medit metma ejangu ening.

22 Uanguveng angu, raja Abimelek, bot ekapala malibal nu ene, Pikhol angu oleve hoa Abraham aing harak. Raja Abimelek ana Abraham at mateng hula, “Abraham! Ni ateing iilat hula, Lahatala Ana etatabi aat toang-pina. Angu ebele naba ba aana ening ang naung, emangpi jadi angu. 23 Angu ebele na banang, angase Lahatala Apangaadang mi, aana nat sumpat hula, aana bae putar-bale metma nadana niang, bot metma noal-nidat ang naung di iadana niang. Aaing nehe hoang-manang ba ae aabang angami. Base aana malekang aaung angu ba ening metma niadana, emenghula na aaung ening metma aadana tiila angu edadenang.”

24 Angmuse Abraham ana Abimelek ehur angu ebalet hula, “Angase na aat sumpa.”

25 Aarunge Abraham ana ava manasal metma Abimelek adana, angmuse ana Abimelek at mateng hula, “Nimang raja! Eemalea ang naung ini ne jar eng nu rampas medi tila.”

26 Abimelek ana Abraham ehur angu ebalet hula, “Ah! Na angu na bae ateing niang. Nuba ba ening aulang se, aana turangmi vengbanang niang angu? Na anga na uhavede vengmee.”

27-28 Angmuse Abraham ana jumba, bot sapi medi, sengmuse emangpi ana metma Abimelek enang. Sengilaba Abraham, bot Abimelek oleve itat palai. Aarunge jumba ba Abraham ana metma Abimelek enang angu, jumba emanarang bititu angu Abraham ana vengtalail eapahing atahing. 29 Angmuse Abimelek ana Abraham adangtaaning hula, “Abraham! Jumba bititu ba aana vengtalail eapahing atahing angu, metma naba ening?”

30 Abraham ana Abimelek etaaning angu ebalet hula, “Nimang raja! Jumba bititu anga aana malekang natang mi tarima, senge metma tanda-bukti ening hula, nimang raja aana mangakut vengbanang iilat hula, naing ba jar eng angu aanang.”

31 Abraham, bot Abimelek oleve angumi itat sumpa, angu ebele mana angu ini ene maveng hula, Beer Syeba. Evengbanang tarang se hula, ꞌJar eng sumpaꞌ.†Ibrani ehur mi se, Beer Syeba, evengbanang tarang angu rupa-rupa. Benangba; ꞌjar eng toang-aaungꞌ, ꞌjar eng aabetang aaungꞌ, ꞌjar eng bitituꞌ, bot ꞌjar eng sumpaꞌ.

32 Ini Beer Syeba mi itat palai sengmuse, raja Abimelek, bot ekapala malibal Pikhol oleve bale iaabang Filistin mi ila. 33 Angmuse Abraham ana te tamareska‡Te tamareska angu, bae ue pioang anga mi niang. Te angu meke kira angu ba mi aabeta, aarunge ebariking angu masot poe meke omimi hela. Base evaa angu aloal alolang-niang. Evaa angu aib adang. nu metma Beer Syeba mi muding. Angu metma Abraham evengani ening, senge ana angumi Lahatala ba aabetat ejehing-emeang angu, Aing somba. 34 Bot Abraham aing metma nehe hoang-manang ening, Filistin enehe ang naung iabang mi mihit luung.

<- Sarenta halomang-halomang 20Sarenta halomang-halomang 22 ->