10
Noh, bot Yafet oleve itabaning
1 Jar eele hela angu barinti muse, Noh oal ang naung ini vaal vengajai. Angaba Sem, Yafet, bot Ham, Noh oal ang naung itabaning.
2-5 Yafet etabaning, benangba, Gomer, Magog, Madai, Yawan, Tubal, Mesek, bot Tiras. Nu-nut ihur eamulung vengmateng, aabetat iaabang-ilelang eamulung, bot imihing-mana eamulung.
Gomer etabaning, benangba, Askenas, Rifat, bot Togarma.
Yawan etabaning, benangba, Elisa, Tarsis, Kitim enehe ang naung, bot Dodanim ba tang eadil mi mihi angu.
* Ham etabaning
6 Ham etabaning, benangba, Kus, Misraim, Put, bot Kanaan.
† 7 Kus etabaning, benangba, Seba, Hawila, Sabta, Raema, bot Sabteka.
Raema etabaning, benangba, Syeba, bot Dedan.
8 Kus ana vaal mehal nu vengajai angu ene Nimrod. Aing ba kapala malibal halomang-halomang, bot Nimrod ana etatabit lumul-kavasar. 9 Elumul-kavasar angu Lahatala ba metma maenang. Base ana etatabit pintar binanta vengkori. Angu ebele nehe biasat vengbanang hula, “Aaing Lahatala Apangaadang mi lumul-kavasar emenghula Nimrod edadenang.” 10 Nimrod eparenta halomang-halomang angu, mulai Babel, Erek Akad, bot Kalne mi. Bendar ba Nimrod ana parenta anga naung emangpi ue Sinear mi.‡ 11 Angmi muse, ana ila bendar Asyur di parenta. Angmuse ana bendar Niniwe, Rehobot-Ir, Kala, 12 bot Resen ba ue bendar Niniwe, bot Kala ehahama mi angu bakung atahing. Anga emangpi anga naung bendar eele.
13 Misraim etabaning, benangba, nehe Ludim, Anamim, Lehabim, Naftuhim, 14 Patrusim, Kasluhim, bot Kaftorim ang naung. Filistin enehe ang naung idat-imang ba, Kasluhim enehe ang naung.
15 Kanaan oal mutu, benangba, Sidon. Het enehe,
16 Yebusi enehe, Amori enehe, Girgasi enehe,
17 Hiwi enehe, Arki enehe, Sini enehe,
18 Arwadi enehe, Semari enehe, bot Hamati enehe ang naung, idat-imang ba Kanaan angu. Kanaan etabaning ang naung aabeta tare-teapahing, base ini teolat mihi.
19 Angu ebele, imihing-mana angu, mulai Sidon mi, ila Gerar mi, sampe ila Gasa mi. Bot Sodom mi, Gomora mi, Adma mi, Seboim mi, bot sampe ila Lasa mi.
20 Ing emangpi angu, Ham etabaning. Nu-nut ihur eamulung vengmateng, aabetat iaabang-ilelang eamulung, bot imihing-mana eamulung.
Sem etabaning
21 Eber etabaning ang naung idat-imang ba, Sem Yafet ekaku mutu angu.
§ 22 Sem etabaning, benangba, Elam, Asyur, Arpaksad, Lud, bot Aram.
23 Aram etabaning, benangba, Us, Hul, Gerar, bot Mas.
* 24 Arpaksad ana Sela vengajai. Bot Sela ana Eber vengajai.
25 Eber ana vaal mehal aaru vengajai. Emutu angu ene, Pelek (evengbanang tarang se hula, ꞌtaing paulꞌ), se uanguveng angu nehe ang naung ini taing paul mihit por-alolang anga miipi angu ebele. Pelek ekaku iia angu ene, Yoktan.
26 Yoktan etabaning, benangba, Almodad, Selef, Hasar-Mawet, Yera,
27 Hadoram, Usal, Dikla,
28 Obal, Abimael, Syeba,
29 Ofir, Hawila, bot Yobab. Ing anga naung emangpi, Yoktan etabaning.
30 Imihing-mana eved danangoa angu aabu-dol, benangba mulai Mesa mi, sampe ila Sefar mi.
31 Ing emangpi angu, Sem etabaning. Nu-nut ehur eamulung vengmateng, aabetat iaabang-ilelang eamulung, bot imihing-mana eamulung.
32 Anga naung emangpi anga, Noh oal-idat. Nu-nut itabaning eamulung, bot iaabang-ilelang eamulung. Bot ing anga naung ba, jar eele barinti sengmuse, ini tarae-teapahing lamal mihit por-alolang anga ening aaving anga.
<- Sarenta halomang-halomang 9Sarenta halomang-halomang 11 ->
*10:2-5
Hurak tura angu iiba vengbanang hula, ꞌRodanim”.
- b Kus anguba ꞌEtiopiaꞌ angu. Misraim anguba ꞌMasirꞌ angu.
- c Sinear angu, Babel ene aabeung. Angase mana angu, ue Iran, bot Irak mi.
- d Nehe hur-adang iiba hula eber angu, benangba, ꞌIbraniꞌ enehe ang naung.
- ~5~ Mas ene aabeung ba, ꞌMesekꞌ angu.
