Wamolegei Sia: Olelesu
(Da:i Sia: - Revelation; Modu - Apokalupo; Bisini - Kamapim Tok Hait)
Yesu Gelesu da Ea Hou amola Hobea Misunu Hou Yonema Olelei
Hidadea Sia:
Yone da Wamolegei Sia: Olelesu Buga dedei. Amo esoga, Yesu Gelesu Ea fa:no bobogesu dunu da Yesu da Hina Godedafa sia:beba:le, se bagade nabasu. Bai eno dunu da ogogosu ‘gode’ dafawaneyale dawa:i galu. Amaiba:le, Yone da ea sia: dedei idisu dunu ilia dogo denesima:ne amola se nababeba:le, dafawaneyale dawa:su hou mae yolesima:ne, amo meloa dedei. Yone da amo meloa ganodini ea esala ba:i liligi amola fedege sia: bagohame olelesa. Mogili ninia fada:ne hame dawa:. Be sia: bai bagade dedei diala amo da:- Gelesu da Hina Godedafa. Gelesu da hamobeba:le, Gode da Sa:ida:ne amola Yesuma ha lai huluane dafawanedafa hasalasimu. E da huluane hasali dagosea, E da Ea fi dunuma, bidi agoane mu gaheabolo amola osobo bagade gaheabolo amola imunu. Amo ganodini E da Hinadafa esalalalumu.
Sia: Dedei
1 Hidadea Asigi Sia:...Sia:alalo 1:1-5
2 Yesu bu Misunu...Sia:alalo 1:7,8
3 Yesu Da Yesuma Fa:no Bobogesu Fi amo ganodini lalu...Sia:alalo 1:9-20
4 Yesuma Fa:no Bobogesu Fi 7 ilima dedei...Sia:alalo 2,3
(a) Efesase...2:1-7
(b) Samena...2:8-11
(c) Begamame...2:12-17
(d) Daiadaila...2:18-29
(e) Sadise...3:1-6
(f) Filadelefia...3:7-13
(g) La:ioudisia...3:14-22
5 Gode Ea Fisu, Meloa Bioi Gobele Ga:su
amoga ga:i amola Sibi Mano...Sia:alalo 4,5
(a) Gode Ea Fisu Hebene Ganodini...Sia:alalo 4
(b) Meloa Bioi Gobele Ga:su 7 amoga ga:i...5:1-5
(c) Sibi Mano Medole Legei...5:6-14
6 Gobele Ga:su 7...Sia:alalo 6:1-8:1
(a) No 1 Gobele Ga:su - Ahea:ya:i Hosi...6:1,2
(b) No 2 Gobele Ga:su - Yoi Hosi...6:3,4
(c) No 3 Gobele Ga:su - Bunumai Hosi...6:5,6
(d) No 4 Gobele Ga:su - Haliga:i Hosi...6:7,8
(e) No 5 Gobele Ga:su - Oloda Hagudu Dunu...6:9-11
(f) No 6 Gobele Ga:su - Bebeda:nima Bagade...6:12-17
(g) 144,000 Yu Dunu Ilegei...7:1-8
(h) Dunu osea:idafa...7:9-17
(i) No 7 Gobele Ga:su -
Hebene Ganodini Ouiya:i...8:1
7 Dalabede 7...Sia:alalo 8:2-11:19
(a) Hidadea Sia:...8:2-5
(b) No 1 Dalabede, Mugene, Lalu amola Maga:me...8:7
(c) No 2 Dalabede Goumi da Hano Wayabo
bagadega Ha:digi Ba:i...8:8-9
(d) No 3 Dalabede-Gamogasu Gasumuni...8:10,11
(e) No 4 Dalabede 1/3 Eso, Oubi amola
Gasumuni, da wadela:lesi...8:12,13
(f) No 5 Dalabede danuba: Gagabusu misi...9:1-11
(g) No 6 Dalabede A:igele 4 da
Gegesu Bagade Logo Doasi...9:13-19
(h) A:igele amola Meloa Bioi
Hedai amola Gamogai...10:1-11
(i) Ba:su Dunu Aduna...11:1-14
(j) No 7 Dalabede Fofada:su amola Bidi...11:15-19
8 Ohe Fi Liligi amola Misunu Hou...Sia:alalo 12-14
(a) Uda amola Hanome...12:1-18
(b) Ohe Fi Liligi Aduna...13:1-18
(c) Sibi Mano amola No 2. 144,000...14:1-5
(d) A:igele Udiana Hagili Ahoanebe...14:6-13
(e) Osobo Bagade Ha:i Manu Faisu...14:14-20
9 Ofodo Fesuale Gala...Sia:alalo 15-16
(a) Mousese Gesami amola A:igele Fesuale da
Gagabusu Fesuale Gagui Gala...15:1-8
(b) Ofodo Age. Dului amola Aiya Bagade...16:1,2
(c) Ofodo Ageyadu. Hano Wayabo Bagade
Afadenene Maga:me Hamosu...16:3
(d) Ofodo Osoda. Hano Nasu da
Maga:me Hamosu...16:4-7
(e) Ofodo Biyadu. Eso Gia:su da Dunu Gia:sa...16:8,9
(f) Ofodo Bi. Gasi Bagade...16:10,11
(g) Ofodo Gafe. Gegesu Doasima:ne
Iufala:idisi Hano da Hasa...16:12-16
(h) Ofodo Godo. Bebeda:nima Bagade...16:17-21
10 Ba:bilone - Wadela:i Uda Bagade...Sia:alalo 17:1-19:5
(a) Ba:bilone ea Hou...17:1-18
(b) Ba:bilone ea Dafai...18:1-24
(c) Ba:bilone Dafaiba:le Nodosu...19:1-5

Wamolegei Sia: Olelesu

1 Amo buga ganodini, Yesu Gelesu da hobea misunu liligi olelesa. Gode da Ea hawa: hamosu dunu ilima hobea misunu hou olelei. Amalalu, Gelesu da Ea hawa: hamosu dunu Yone, ema olelemusa:, Ea a:igele dunu ema asunasi. 2 Yone e da ea ba:i liligi huluane olelei dagoi. Amo meloa ganodini e da Gode Ea sia:i liligi, amo huluane Yesu Gelesu olelei, amo sia:ne iaha. 3 Nowa dunu da amo buga idisia, e da hahawane bagade ba:mu. Amola nowa da amo hobea misunu hou amo sia: nabasea amola meloa ganodini sia: dedei amo nabawane hamosea, e da hahawane ba:mu. Amo ganodini dedei liligi da gadenenewane doaga:i dagoiba:le, noga:le nabimu da defea.

Yone da Yesu Ea Fi Fesuale Gala ilima Asigi Sia: Dedesa

4 Na, Yone, da Yesu Ea fa:no bobogesu fi fesuale gala A:isia soge amo ganodini, dilima sia:sa. Gode da esala, esalusu amola misini esalumu, a:silibu fesuale gala amo da Gode Ea Fisu midadi lela amola Yesu Gelesu, ilia da hahawane dogolegele iasu amola olofosu, dilima ima:ne dawa:lala. 5 Gode da degabo Yesu Gelesu wa:legadolesi. Gelesu da osobo bagade ouligisu dunu huluane ilima Hina esala. E da ninima asigisa. Ea da bogobeba:le, nini wadela:i hou fadegai dagoi. 6 Yesu da nini Ea Ada Gode amo Ea hawa: hamomusa:gini, E da ninia osobo bagade hou fadegale, bu nini gobele salasu dunu ouligisu fi hamoi. Yesu Gelesu da hadigiwane, gasawane eso huluane esalalalumu. Ema nodonanumu da defea. Ama.

Yesu da bu Misunu

7 Dawa:ma! E da mu mobi da:iya misunu galebe. Dunu ilia da Ea afo soi amola eno dunu huluanedafa da Yesu ba:mu. Osobo bagade fifi asi gala dunu huluane da Ea mabe ba:beba:le, beda:ga dimu. Ama. 8 Hinadafa Gode Bagadedafa amo da esala, esalu amola esalalalumu, E da amane sia:sa, “Na da Musu amola Na da Dagosu!”

Yone da Esala Ba:su amo Ganodini Yesu Ba:i

9 Na da dilia fi dunu Yone. Na da Yesuma fa:no bobogebeba:le, na da dili defele mae yolesili, se nabasu amo da dunu ea Hinadafa Hou amo ganodini esalebe dunu naba liligi defele, na da naba. Na da Gode Ea sia: olelebeba:le amola Yesu Ea dafawane hou E ninima olelei, amo olelebeba:le, eno dunu ilia da na Ba:damose oga amoga mugululi hiougi. 10 Hinadafa Ea esoga (Sada:i), na da Gode Ea A:silibu amo ganodini esalebe ba:i. Amasea, na da sia: bagade, amo da dalabede agoane na baligidi manebe nabi.

11 Amane nabi, “Dia ba:mu liligi dedenanu, amo meloa dedei Yesu Ea fa:no bobogesu fi moilai bai bagade fesuale gala amo ganodini diala, ilima iasima. Moilai bai bagade dio da Efesase, Samena, Begamame, Daiadaila, Sadise, Filadelefia amola La:ioudisia.” 12 Na da sia: adole iasu dunu ba:musa: beba:le, gouliga hamoi gamali bai fesuale gala ba:i. 13 Amo gamali bai gilisisu ganodini, dunu agoai, E da abula amo da Ea emoga doaga:i amola Ea bida:igiga gouli bulu ga:i, amo lelebe ba:i. 14 Ea dialuma hinabo da ahea:ya:idafa amola Ea si da lalu agoane ba:i. 15 Ea emo da balase doga:i agoai ba:i. Ea sia: da hano nawa:li bagade ea gobe agoane nabi. 16 E da Ea lobodafa amo ganodini gasumuni fesuale gala gagui. Ea lafidili amoga gegesu gobihei la:idili la:idili fe aduna hamoi, amo dialebe ba:i. Ea odagi da esomogoa esoga si gasenei agoai ba:i. 17 Na da amo dunu ba:beba:le, bogoi dunu agoane Ea emo gadenene diasa:i. E da Ea lobodafa na da:i amoga ligisili, amane sia:i, “Mae beda:ma! Na da Musu amola Na da Dagosu!

18 Na da esalalalusu Dunu! Na da bogoi, be wali Na da eso huluane esalalalumusa: esala. Na da bogosu amola bogosu soge, amoma Hina esala. 19 Amaiba:le, dia ba:be liligi dedema. Waha ba:sa liligi amola hobea misunu hou, huluane dedema. 20 Amo gasumuni fesuale gala di da Na lobodafaga gagui ba:sa amola gouli gamali bai fesuale gala, amo ilia wamolegei dawa:loma:ne Na da dima olelemu. Gasumuni fesuale gala da a:igele dunu ilia Yesu Ea fa:no bobogesu fi fesuale gala ouligisa. Amola gamali bai fesuale gala da Yesu Ea fa:no bobogesu fi fesuale gala.”

Wamolegei Sia: Olelesu 2 ->