Na da eso huluane Dima wele sia:nana,

amola gasia na da Dia midadi Dima maha.

2 Na Dima sia:ne gadobe amo nabima!

Na da Dia fidima:ne digini wele sia:be amo nabima!

3 Bidi hamosu bagohame da nama misiba:le,

na da bogomu gadenei.

4 Na gasa huluane da fisi dagoi!

Na da dunu oda agoane bogomu gadenei agoai galebe.

5 Na da bogogia:su sogebi amoga dialoma:ne fisi dagoi ba:sa!

Na da fane legesu dunu agoane ilia uli dogoi ganodini dialebe agoai

amo da Dia fidimu hamedene gogolesa gogoleidafa.

6 Di da bogoi salasu uli dogoi gududafa amoga na sanasi dagoi.

Amo gelabo da gasi dunasi amola sedadedafa.

7 Dia ougi da na da:i hodo da:iya dioi bagade diala

amola amoga na da banenesi diala.

8 Di da hamobeba:le, na dogolegei dunu da nama gahegisa,

amola na dogolegei dunu ilia siga na da wadela:idafa ba:sa.

Na da halegale hobeamu hamedei ba:sa.

9 Na da se nababeba:le, ba:mu gogolei.

Hina Gode, na da eso huluane Dima wele sia:sa,

amola na lobo gaguia gadole sia:ne gadolala.

10 Di da bogoi dunuma musa: hame ba:su hou hahamoma:bela?

Ilia da bu wa:legadole Dima nodone sia:ma:bela:?

11 Dunu ilia da Dia mae fisili asigi hou

Dia didili hamosu da gugununfinisisu soge amo ganodini dialoma:bela:?

12 Dia hame ba:su liligi hou da, amo gasi sogebi amo ganodini ba:ma:bela:?

Dunu ilia eno dunu amo da bogoi sogega daha hedolo gogolesa.

Amo soge ganodini, Dia noga:idafa hou da dialoma:bela:?

13 Hina Gode, na da Dia na fidima:ne Dima wele sia:sa.

Eso huluane hahabe na da Dima sia:ne gadosa.

14 Hina Gode, abuliba:le Di da nama higale ba:sala:?

Abuliba:le Di da nama baligi fa:sala?

15 Na da goifonoboga ganiniwane se nabasu

amola na da bogomu gadenenewane esalusu.

Na da Dia dawa:ma:ne se bidi iasu dioi bagadeba:le,

amoga sesele gasa hame galebe.

16 Dia ougi hou bagadedafa amoga na da banenesi dagoi.

Dia gasa fili doagala:su amoga na da gugunufinisi dogoi.

17 Eso huluane ilia da na sisiga:le aliligibi amo ba:sea,

da hano hihi heda:i agoai ba:sa, ilia da na beba:le huluane eale disisa.

18 Di da na dogolegeidafa ani sasamogene nabe dunu amo na fisiagama:ne hamoi,

amola gasi fawane da na sama agoai gala.

<- Gesami Hea:su 87Gesami Hea:su 89 ->