77
Se Nabasu Doaga:be Eso amoga Dogo Denesisu
1 Na da ha:giwane Godema dini iaha.
Na da ha:giwane dini iasea, E da na dibi naba.
2 Bidi hamosu eso da nama doaga:sea, na da Hina Godema sia:ne gadosa.
Na da daeya asili hahabe, na lobo gaguia gadole, sia:ne gadosa.
Be na da dogo denesisu hame ba:sa.
3 Na da Gode dawa:sea, amola bobolesa.
Na da na dogo ganodini dadawa: ahoasea, na da da:i dione dawa:sa.
4 Gode da daeya asili hahabe na mae golama:ne si daganesisa.
Na da bagadewane se nabawane dadawa:beba:le, sia:mu gogolesa.
5 Na da eso bobaligila asi amo dawa:lala.
Amola ode musa: bobaligila asi amo dawa:lala.
6 Na da gasi ganodini osodogone asigi dawa:suga dadawa: ahoa.
Na dogo ganodini dawa:be amoga na da nisu agoane adole ba:sa,
7 “Hina Gode da eso huluane nini higama:bela:?
E da ninima eso huluane hahawane hame ba:ma:bela:?
8 E da ninima asigilalusu amo yolebela:?
Ea ninima ilegele sia:i amo da yolesila:?
9 Gode da ninima asigi gogolema:ne olofosu hou amo gogolebela:?
Ea asigi hou da afadenene bu ougi hou amoga dedebobela:?”
10 Amalalu, na da amane sia:i, “Na baligili se nabasu da agoaiwane gala.
Gode da Ea gasa hou fisi dagobela:?”
11 Hina Gode! Na da Dia bagadedafa hamobe hou bu dawa:lumu.
Na da noga:idafa bagade hamobe Dia da musa: hamoi, amo dawa:lumu.
12 Na da Dia hamoi liligi huluane bu dawa:lumu.
Dia gasa bagade hamobe liligi, amo na da dawa:lumu.
13 Gode! Dia hamobe liligi huluanedafa da hadigi fawane.
Eno ‘gode’ liligi da Di agoai hame.
Bai Di da baligili bagadedafa.
14 Di da Gode amo da degabo ba:su hou hamosa.
Di da fifi asi gala amo ganodini Dia gasa bagade hou olelesu.
15 Di da Dia gasa bagade amoga Dia fi dunu gaga:i.
Dia fi dunu da Ya:igobe amola Yousefe elagaga fi esala.
16 Gode! Hano huluane da Diba:le beda:i.
Amola hano wayabo bagade ea lugudu sogebi ilia da yagugui.
17 Mu mobi da gibu hano sogadigi.
Gugelebe da mu amoga gobagala:su.
Ha:ha:na da la:idi la:idi huluane digagala:su.
18 Gugelebe da gobagala:su.
Ha:ha:na digagala:su da osobo bagade hadigilisisu.
Osobo bagade da fofogoi dagoi.
19 Di da hano gafului amodili ahoasu.
Di da hano wayabo bagade lugudu amo degesu.
Be Dia emo osa:ibu da hamedafa ba:su.
20 Mousese amola Elane ela da Dia fi ouligisu.
Be Di fawane, sibi ouligisu dunu agoane, ili oule asi.
<- Gesami Hea:su 76Gesami Hea:su 78 ->
