66
Nodosu amola Nodone Iasu Gesami
1 Dunu huluane! Godema hahawane nodone wele sia:ma!
2 Ea Hadigi Dio amoma gesami hea:ma!
Amola hadigiwane Ema nodone sia:ma!
3 Godema amane sia:ma, “Dia hamobe liligi da noga:idafa gala.
Dia da bagadedafaba:le, Dima ha lai dunu da beda:ga, Dia midadi begudusa.
4 Osobo bagade fifi asi gala dunu huluanedafa da Dima nodone sia:ne gadolala.
Ilia da Dima nodone gesami hea:sa.
Ilia da Dia Dio gaguia gadole gesami hea:sa.
5 Gode Ea hamobe amo ba:la misa!
Ea dunu fi amo ganodini Ea noga:idafa hamobe amo ba:la misa.
6 *E da hano wayabo bagade afadenene, bu hafoga:i soge hamoi.
Ninia aowalali da Yodane Hano amo emoga degei.
Amogawi, ninia da Ea hamoi amo ba:lalu bagade nodoi.
7 E da Ea gasaga fifi asi gala ouligilala.
E da fifi asi gala huluane Ea siga ba:lala.
Ema lelesu dunu ilia da Ema mae lelema:ma!
8 Osobo bagade fifi asi gala huluane!
Ninia Godema nodona:di!
Dunu huluane da dilia Ema nodobe nabimu da defea!
9 E da nini gebewane esaloma:ne ouligi.
Amola nini mae dafama:ne ouligi.
10 Gode! Silifa da laluga gobele,
noga:i amola wadela:i afafama:ne adoba:be agoane,
Di da nini adoba:i.
11 Di da nini saniga sa:ima:ne adodigi.
Di da ninia baligi da:iya dioi liligi ligisi.
12 Di da ninima ha lai dunu ninima hasalasima:ne yolesi.
Ninia da lalu gelabodili amola hano heda:i degele asi.
Be wali Di da ninia gado sogebi amoga oule misi dagoi.
13 Na da Dima gobei gobele salasu liligi amo Dia diasuga gaguli misunu.
Na da Dima ilegei liligi amo Dima imunusa: olemu.
14 Na da nama bidi hamosu doaga:loba,
na da adi Dima imunusa: sia:i liligi, amo Dima imunu.
15 Na da sibi amo oloda da:iya gobele sanasimusa: imunu.
Na da bulamagau gawali amola goudi gobele salimu.
Amola gobele salasu mobi da muagado heda:mu.
16 Godema nodone dawa:su dunu huluane! Naba misa!
Amola na da Ea nama hamobe amo huluane dilima olelemu.
17 Na da Ema na fidima:ne dini i.
Na da gesami hea:su Ema nodone sia:i.
18 Na da na wadela:i hou banenesisa ganiaba,
Hina Gode da na sia:ne gadobe hame naba:loba.
19 Be Gode da dafawane na sia:ne gadobe nabi.
20 Na da Godema nodosa.
Bai E da na sia:ne gadosu hame higa:i.
