40
Nodone Gesami Hea:su
1 Na da Hina Gode Ea fidima:ne gebewane ouesalu.
Amalalu E da na dini iabe amo nabi.
2 Na da fafu wayabo amoga bogoma:ne bosona dalu.
Be Hina Gode da na hiougia gadoi.
E da na gaga:musa:, magufu da:iya asunasi.
3 E da nama gesami gaheabolo hea:ma:ne olelei.
Amo gesami da Godema nodone hea:su gesami.
Dunu bagohame da amoba:le dawa:digili
ilia da Hina Godema dafawaneyale dawa:mu.
4 Nowa dunu ilia da Hina Godema dafawaneyale dawa:sa,
amola ogogole loboga hamoi ‘gode’ ilima hame fa:no bobogesa,
amola dunu ilia da ogogosu ‘gode’ ilima nodone sia:ne gadosea
ilima hame gilisisa,
amo dunu ilia da hahawane bagade gala.
5 Ninia Hina Gode! Di da ninima liligi bagohame hamoi dagoi.
Dunu afae Di agoai da hamedafa gala.
Di da nini fidima:ne, ilegesu ida:iwane bagohame hamoi dagoi.
Na da amo ilegesu huluane olelemu da hamedei.
Ili idimu da hamedei.
6 [a]Di da gobele salasu amola Godema iasu amo hame hanai.
Di da ohe oloda da:iya gogo gobele salasu amo hame adole ba:sa.
Amola Di da wadela:i hou fadegale fasima:ne,
gobele salasu hou amo hame hanasa.
Be amo mae dawa:le, Di da nama nabasu hou hamoma:ne, ge hahamonesi.
7 Amaiba:le, na da Dima amane adole i, “Na da goea!
Dia nama hamoma:ne sia:i da Sema Buga amo ganodini dedei diala.
8 Na da Dia hanai amo hamomusa: bagadewane hanai galebe.
Dia malasu da na dogo ganodini diala.”
9 Hina Gode! Dia dunu huluane gilisi amo ganodini
na da sia: ida:iwane gala ilima olelei.
Amo sia: da ‘Di da nini gaga:lala’.
Di dawa:! Amo sia: olelebe, na da hamedafa yolesimu.
10 Na da Dia gaga:su hou olelebe amo nisu hame gei dialu.
Na da eso huluane Dia mae fisili fidisu hou olelelalu.
Dia dunu huluane gilisi amo ganodini
na da mae ouiya:le, Dia mae fisili asigidafa hou olelelalu.
11 Hina Gode! Na dawa:!
Dia da nama gogolema:ne olofosu asigidafa hou hamedafa dagolesimu.
Dia da nama mae fisili asigidafa hou hamonanebeba:le
na da gaga:i dagoi ba:lalumu.
Fidima:ne Sia:ne Gadosu
(Gesami Hea:su 70)
12 Na da bidi hamosu bagohame amoga sisiga:le disi.
Amo bidi hamosu da idimu gogolei ba:sa.
Na wadela:i hou ilia se dabe iasu da nama doaga:i dagoi.
Na da si dofoi agoai galebe.
Na wadela:i hou idi da nina: dialuma hinabo idi baligisa.
Amaiba:le, na da bagadewane beda:i.
13 Hina Gode! Na gaga:ma!
Wahadafa, na fidima!
14 Amo dunu na fane legemusa: manebe da hasalasili amola ededenanesima:ma!
Amola dunu amo da na bidi hamosu ba:beba:le
hahawane gala, ilia da ogobele gogosiasu ba:ma:ma!
15 Dunu amo da nama lasogole oufesega:sa, amo hasalasima!
Amasea, ilia da bagade beda:mu.
16 Dunu huluane da Dima masea, ilia da nodone hahawane ba:mu da defea.
Dunu huluane amo da Dia gaga:su lai dagoiba:le Dima nodosa
ilia da eso huluane, “Gode da baligili bagadedafa,” sia:mu da defea.
17 Hina Gode! Na da gasa hamedeidafa amola hame gagui gala!
Be Di da na hame gogolei.
Di da na Gaga:su amola na Gode gala!
