31
Godema Mae Yolele Dafawaneyale Dawa:su Sia:ne Gadosu
1 Hina Gode! Na da Dia gaga:ma:ne Dima maha.
Dia na enoga maedafa hasalasima:ma.
Di da moloidafa Gode.
Na da Dima sia:ne gadosa! Na gaga:ma!
2 Na sia: nabima! Wahadafa na gaga:ma!
Na gaga:ma:ne, fedege agoane Dia na dabe fasa:besa:le sogebi dialoma!
3 Dia da na gado sogebi amola na gaga:su gala.
Dia sia:i ilegei defele, nama logo olelema amola amoga na oule masa.
4 Na sa:ima:ne sanenisi dialebe amoga dasa:besa:le, na fidima.
Se nabasu da nama doagasa:besa:le, na ougihalesima.
5 [a]Hina Gode! Na da Dia ouligisu hou amoga ouligima:ne Dima yolesimu.
Di da na gaga:mu.
Bai Di da mae fisili didili hamosu Gode.
6 Di da ogogole ‘gode’ ilima nodone sia:ne gadobe dunu, ili higasa.
Be na da Dima dafawaneyale dawa:sa.
7 Di da nama maedafa fisili asigi hou dialebeba:le,
na hahawane amola obenai dialumu.
Di da na hahanibi amo ba:sa
amola na bidi hamoi amo huluane Dia dawa:.
8 Di da nama ha lai dunu da na doagala:le fedele lama:ne hame hamoi.
Di da nama soge na hanai amoga udigili laloma:ne nama sia:i dagoi.
9 Hina Gode! Nama asigima!
Bai na da bidi hamosu amo ganodini esalebe ba:sa.
Na si da dinana helesa.
Na da helei baligili nabi dagoi.
10 Na da da:i dioiba:le, helele ha:ha:i dagoi.
Dinanasu da na esalusu dunumuginisi dagoi.
Na bidi hamosu bagade ba:beba:le, gasa hamedei gala.
Na gasa amolawane da wadela:lala.
11 Nama ha lai dunu huluane, amola na gadenene dunu iliamusu,
nama higale ba:sa.
Dunu oda na dawa: dunu da naba:le beda:sa.
Ilia da na logoa ba:sea, hobeale afia:sa.
12 Dunu huluane ilia da na bogoiyale, gogolele fisi dagoi.
Ilia na galagai liligi agoai ba:sa.
13 Nama ha lai dunu bagohame ilia nama sadoga sia:dalebe, na naba.
Na da bagadewane beda:i.
Nama ha lai dunu da na fane legemusa:, sia: ilegesa.
14 Be Hina Gode! Na da Dima dafawaneyale dawa:sa.
Bai Di da na Godedafa.
15 Na da eso huluane Dia ouligibi hou ganodini esala.
Nama ha lai dunu, amo da nama se bagade iaha, ilia da na wadela:sa:besa:le,
Dia gaga:ma.
16 Na da Dia hawa: hamosu dunu.
Nama asigiwane ba:ma! Dia mae fisili asigi hou amoga na gaga:ma.
17 Hina Gode! Na da Dima wele sia:sa!
Na da mae gogosiasu hamoma:ma!
Be wadela:i hamosu dunu ilia gogosiasu ba:mu da defea.
Ilia da ouiya:lewane bogosu sogebi amo gudu sa:imu da defea.
18 Gasa fi nimi bagade dunu da moloidafa dunu ilia hou olelema:ne,
ogogole higale sia:sa.
Hina Gode! Amo ogogosu dunu ouiya:lesima!
19 Dunu da Dima nodone hamosa,
amo da Dia baligili noga:idafa imunusa: momagei dialebe ba:mu.
Di da noga:idafa! Amola dunu amo ilia Dima dafawaneyale dawa:sa
amo noga:ledafa gaga:sa.
Dunu huluane da amo hou dawa:.
20 Eno dunu da ili wadela:ma:ne ilegesa.
Be Di da Dia midadi amoga ili gaga:musa: wamolegelesisa.
Ilima ha lai dunu da ilima mae gadele sia:ma:ne,
Di da ougihai gado amoga ili wamolegesa.
21 Hina Godema hahawane nodoma!
Nama ha lai ilia da na doagala:le, eale sisiga:le disiba:le,
E da Ea asigidafa hou nama olelei.
22 Na da beda:i galu amola na da Ea yolesibala:le dawa:i galu.
Be na da Ea fidima:ne dini iabeba:le, E da na dibi nabi.
23 Hina Godema mae fisili dafawaneyale dawa:su dunu huluane, dilia!
Hina Godema asigima!
Hi da dili gaga:sa! Be E da gasa fi dunu ilima se bidi iaha.
Bai ilia da amo se iasu lamu da defea.
24 Dilia! Hina Gode da hobea misunu liligi huluane ouligisa.
Amo dafawaneyale dawa:su dunu, dilia!
