Bai Di da ema gasa iabeba:le.

Di da ema hasalasu hou iabeba:le, e da hahawane nodosa.

2 Dia, ea dogoga hanai liligi amo ema i dagoi,

amola ea Dima adole ba:i, amo Di ema i dagoi.

3 Dia ema nodosu liligi bagade gaguli misi,

amola habuga gouliga hamoi amo ema figisi.

4 E da esalusu Dima adole ba:i.

Amanoba, Di da osobo bagadega sedagili esaloma:ne ema i.

5 Dia da e noga:le fidibiba:le, ea hadigi da bagade

amola dunu eno da ema nodosa.

6 Dia ema hahawane dogolegele hou da eso huluane dialumu.

Amola Di da ema gadenene esalebeba:le, e da hahawane bagade.

7 Hina bagade da Hina Gode Bagadedafa Ea hou dafawaneyale dawa:le,

lalegagusa.

Hina Gode da ema mae yolele, asigiba:le, e eso huluane gaga:i esalumu.

8 Hina bagade da ea ha lai dunu huluane gagumu,

amola Ema higa:i ba:sea, amo huluane gagulaligimu.

9 Hina Gode masea da, ili huluane lalu helowa:i bagade agoane amoga nene,

wadela:lesi dagoi ba:mu.

Hina Gode ea ougi amoga ili medole legele, laluga nene sa:i dagoi ba:mu.

10 Iligaga fi afae da hamedafa esalebe ba:mu, amola hina bagade,

ea ili huluane medole legemu.

11 Ilia asigi dawa:su ganodini ilegele, Godema hasalasimusa: dawa:lala,

be amomane ilia da Ema hame hasalasimu.

12 E da, Ea dadiga gala:le, ili sesele, amalu ilia sinidigili hobeale masunu.

13 Hina Gode! Dia gasa bagade ba:beba:le, ninia Dima bagade nodosa.

Ninia da Dima nodone gesami hea:le, dia gasa bagade hou gaguia gadomu.

<- Gesami Hea:su 20Gesami Hea:su 22 ->