huluane dawa:.

2 Dia da na hamobe huluanedafa dawa:.

Di da badiliawane lela, na asigi dawa:su huluane dawa:.

3 Na da hawa: hamonanea amola hele esalea,

na hamobe huluane Dia dawa:.

4 Na da hame sia:iawane,

na sia:musa: dawa:i huluane Dia dawa:.

5 Di da na sisiga:le,

Dia gasaga na gaga:i diala.

6 Dia na hou dawa:digi da oso dogoi.

Be na da Dia hou dawa:digimu da hamedei.

7 Na da Diba:le hobeamu da hamedei.

Na da Dia midadi fisili hobeamu da hamedei.

8 Na da muagado heda:i ganiaba, Di da amogawi esalebe ba:la:loba.

Na da bogosu sogebia asiaba, Di da amogawi esalebe ba:la:loba.

9 Na eso maba gusu hagili ahoa ganiaba,

o guma:dini badiliadafawane esala ganiaba,

10 Di da amogai na oule bisili masa:ne

amola na fidima:ne esalebe ba:la:loba.

11 Na da gasi ea na wamolegema:ne adole ba:loba,

o hadigi nama sisiga:i dialebe amoea afadenene bu gasima:ne adole ba:loba,

na da wamolegei dagoi hame ba:la:loba.

12 Bai gasi dunasi da Dima gasi hame gala,

amola gasi da Dia siga eso ea hadigi agoai ba:sa.

Gasi amola hadigi da Dima defele ba:sa.

13 Di da na da:i huluane hahamoi.

Di da na da:i huluane na:me ea hagomo ganodini disisi.

14 Dunu huluane da Diba:le beda:mu da defea.

Amaiba:le, na Dima nodosa.

Dia hamobe huluane da degabo amola noga:idafa.

Amo huluane na dawa:.

15 Di da na gasa na:me ea hagomo ganodini noga:le hahamone, disisilaloba,

na da amogawi wamowane alelaloba, na da amogawi esaloba,

Di da na dawa:digi dagoi.

16 Na da hame lalelegeiawane, Dia na dawa:i.

Na da hame lalelegeiawane na esaloma:ne ilegei,

amo Di da Dia meloa amo ganodini dedene legei.

17 Gode! Dia asigi dawa:su amo na dawa:mu bagadewane gogolesa.

Dia asigi dawa:su da bagohame gala.

18 Na da Dia asigi dawa:su idisa ganiaba,

ilia da idimu gogolei, sa:i boso su idi agoai gala:loba.

Na da nedigisia, Di amola ani gilisili esalebe ba:sa.

19 Gode! Na dawa:loba da Dia wadela:i hamosu dunu fane lelegemu.

Na dawa:loba da mosolasu dunu na yolesima:mu.

20 Ilia Dima lasogole baligidu sia: daha.

Ilia Dia Dio amoma lasagole sia:sa.

21 Hina Gode! Na da Dima higabe dunu ilima bagade higasa.

Na da Dima ododoga:be dunu ilima higasa.

22 Na da ili dafawanedafa higasa.

Ilia da nama ha lai dunu agoai ba:sa.

23 Gode! Na asigi dawa:su, Dia abodema!

Nama adoba:le, na asigi dawa:su hogole ba:ma.

24 Na wadela:iyale, Dia hogole ba:ma!

Amola Dia fifi ahoanusu logoga masa:ne, nama logo olema.

<- Gesami Hea:su 138Gesami Hea:su 140 ->