115
Gode da Afadafa Fawane Esala
1 Hina Gode! Ninia da Dia hadigidafa hou amoma fawane nodomu da defea.
Dunu da nini hadigi gala sia:mu da defea hame.
Bai Di fawane da mae fisili, asigidafa hou hamonana,
amola nini fisima:ne hame dawa:.
2 Fifi asi gala dunu da abuliba:le,
“Dilia Gode da habila:?” amane sia:sala:?
3 Bai ninia Gode da Hebene ganodini esala.
Amola E da Hi hanaiga fawane hamosa.
4 [a]Eno fifi asi gala ilia ‘gode’ da silifa amola gouliga hamoi liligi,
osobo bagade dunu ilia loboga hamoi fawane.
5 Ilia da lafi gala, be sia: baoumu hame dawa:.
Ilia da si gala, be ba:mu gogolesa.
6 Ilia da ge gala be nabimu hamedei.
Ilia da mi gala, be amoga gaha amola gabusiga: nabimu hamedei.
7 Ilia da lobo gala, be digili ba:mu hamedei.
Ilia da emo gala be masunu gogolesa.
Ilia da ouiya:le diala.
8 Dunu da amo loboga hamoi ogogosu ‘gode’ hahamoi
amola ilima dafawaneyale dawa:sa,
ilia da amo ogogosu liligi ilia hamoi, amo defele hamomu da defea.
9 Be dilia Isala:ili fi dunu! Hina Godema dafawaneyale dawa:ma!
E da dili fidisa amola gaga:sa.
10 Dilia Gode Ea gobele salasu dunu!
Hina Godema dafawaneyale dawa:ma!
E da dili fidisa amola gaga:sa.
11 Dilia Hina Godema nodone sia:ne gadolalebe dunu!
Hina Godema dafawaneyale dawa:ma.
E da dili fidisa amola gaga:sa.
12 Hina Gode da nini dawa:lala, amola ninima hahawane hou imunu.
E da Isala:ili fi dunu amola Gode Ea gobele salasu dunu huluane
Ilima hahawane imunu.
13 [b]E da dunu huluane, bagade amola fonobahadi defele,
ilia da Ema nodone dawa:sea, ilima hahawane hou imunu.
14 Hina Gode da dili amola diligaga fi dunuma mano imunu da defea.
15 Hina Gode da mu amola osobo bagade hahamoi.
E da dilima hahawane hou imunu da defea.
16 Hebene da Hina Gode Ea Hisu soge.
Be E da osobo bagade amo nini osobo bagade dunuma i dagoi.
17 Bogoi dunu ilia da ouiya:i soge amoga gudu daha.
Bogoi dunu, ilia Hina Godema nodone sia:mu hamedei ba:sa.
18 Be nini esalebe dunu, ninia da Ema eso huluane mae fisili, nodonanumu.
