Amola ilia moilai bai bagade ganodini da muni

amola liligi bagadewane diala.

Be Ninefe da wadela:lesi dagoi ba:mu,

amola ilima doagala:su dunu da ilia liligi huluane lidili dagomu.

2 Nabima! Defasu da hosi baligia fegasa manebe ba:mu,

amola hosi ilia emo da gibogibosa ahoa

amola sa:liode ea emo da genenagenenasa ahoa.

Sa:liode amola da hehenane dagini heheda:fuli ahoa.

3 Gegesu dunu huluane ilia da hosi baligia gado fila heda:le gegesa manebe,

amola ilia dadi amo daiya ba:su ganodini, baba gala:i hamobe agoane ba:sa.

Amola ilia dunu bagohamewane medole legei amola ilia idimu hame gala, lelegela heda:i agoane ba:sa.

Amola bogogia:i amo da:iya osa:gili afia:lebe ba:sa.

4 Ninefe amo da aie uda defele agoai ba:sa.

Amaiba:le, Gode da ema se bagade iaha.

Ea soge amo noga:i ba:beba:le,

dunu fi ilia hawa: hamomusa: bagohamewane gilisi.

Dunu fi ilia gilisiba:le, ilia da ea wadela:i hou lalegaguiba:le, lala:giba:le, udigili hawa: hamosu dunu defele ba:i.

5 Hina Gode Bagadedafa da amane sia:sa, “Ninefe dunu!

Na da dilima se bagade imunu.

Nifawane da dilia abula gisa:mu,

amola dilia da gogosiama:ne da:i nabadowane lalumu.

Dunu fifi asi gala huluane da dilia gogosia:i

amola da:i nabado amo ba:ma:ne Na da logo doasimu.

6 Nifawane dili da isu ha:digibi agoane ba:mu.

Amola gaha huluane di da:iya ligisili dedebomu.

Amo osobo bagade fi huluane ilia diliba:le bagade beda:gia:mu.

7 Be ilia dili ba:sea, ili huluane beda:ga sinidigimu.

Ilia amane sia:mu,

‘Goe ba:ma Ninefe da wadela:lesi dagoi.

Dunu afae da ema hamedafa asigisa,

amola dunu ilia da Ninefe fi ilia dogo denesima:ne,

asigi sia: hame sia:mu.’ ”

8 Ninefe, dia dawa:lobada, dia nimi o gasa goga da Dibisi (moilai bai bagade baligi bagade Idibidi soge ganodini) amo osobo dogone fi dunu amo ilia gasa baligibala:? Amo soge ea da hano bagade gala. Amo Naile hano da Dibisi moilai bai bagade gilisisu amo sisiga:le disiba:le, gaga:su defele ba:i. 9 Dibisi da Idibidi osobo dogone fi amola Suda:ne osobo dogone fi ouligi amola gasa bagade ba:i. Amola Libia fi ilia da gegemusa:, Dibisi amoma na:iyado fidisu hamoi. 10 Be amomane Dibisi fi amo da mugululi asi dagoi ba:i. Ilia mano da moilai bai bagade logoga fane legei dagoi ba:i. Amola ilima ha lai dunu da Dibisi mimogo dunu amo sia:ine efega la:la:gili, mugululi afugili asili, momogili ilia ha lai dunu ilia udigili hawa: hamosu dunu hamoi dagoi.

11 Ninefe fi dili amola da adini mai feloabe agoai ba:mu amola dilima ha lai dunu amo sodole hobeale masasa: dawa:mu. 12 Dilia gagili sali diasu huluane da figi dulu yoi agoane ba:mu. Dunu da figi ifa ugugusia, figi dulu da faili sa:ili, ilia lafi ganodini daha.

13 Dilia gegesu dunu da uda agoai, amola dia osobo dogone fi da gasa hame agoai galebe. Dilia soge logo ga:su huluane da dilia ha lai dunu udigili misa:ne doasi dagoi ba:sa amola dilia logo ga:su fesonoi huluane da laluga nei dagoi. 14 Dilia ha lai dunu da dilima doaga:la:musa manebeba:le, momagema:ne hano dima amola dilia gagili sali diasu huluane gasa ima:ne hamoma. Laga osobo amo daeyane magufu sagama amola gagado dafawane gagosa heda:ma. 15 Be amomane, dilia adi hamosea, dili da laluga nene bogomu amola gegene fane legei dagoi ba:mu. Dilia da danuba:ga ifa lubi na dagoi agoai dunu fi huluane ebelei dagoi ba:mu.

16 Dilia bidiga lasu dunu ilia idi da gasumuni ilia idi baligi agoai ba:i. Be wali ilia da danuba: agoane hedofo hamone wa:le asi dagoi, amo hamedafa ba:sa. 17 Dilia eagene ouligisu dunu da danuba: agoai galebe. Ilia da hahabe ifa lubi nanu eso diga:gala:sea wa:le ahoabe agoai, amola dunu afae da amo wa:le ahoabe sogebi hame dawa:.

18 Asilia hina bagade, di! Dia eagene ouligisu dunu ilia da bogoi dagoi galebe, amola dia dunu mimogo huluane da maedafa nedigima:ne golai dialebe. Dia fi dunu da huluane goumia gado afagogoi galebe, amola ili bu oule misunu dunu da hame galebe.

19 Gui da manoma aiya bahoma:ne gui legesu da hamedafa galebe, amola dilia fofa:gi da bahomu hamedei ba:sa. Musa: dilia da dunu huluane ilima mae asigili wadela:lesi dagoi. Dunu afae hobeale masunu hamedeiwane ba:i. Be wali Gode da dili gugunufinisi dagoi. Amola dunu huluane da amo sia: nabaloba, ilia da hahawaneba:le lobo fasa.