Amola na da baligiwane fofogadigisa.

Wali, ninia esalebe eso amoga,

Dia musa: gasa bagade hamoi amo bu hamoma.

Di da ninima ougi gala, be amomane ninima asigima!

3 Gode da bu Idome soge amoganini mana.

Hadigi Gode da Ba:ila:ne agolo amoganini mana.

Ea noga:idafa isisima:goi hou da mu amo dedebosa.

Amola osobo bagade da Ema nodone sia:ne gadosu amoga nabai gala.

4 E da ha:ha:na ea nenegala:be defele maha.

Ea gasa da Ea lobo ganodini wamolegei.

Amoga hadigi da digaga:gala:!

5 E da olo bisili iasisa!

E da Bogosu Ema fa:no bobogema:ne sia:sa!

6 E da aligisia, osobo bagade da fogosa.

E da hedolole ba:legasea, fifi asi gala ilia da fofogosa.

Eso huluane dialumu goumi da goudane sa:i ba:sa.

Eso huluane dialumu agolo

(amogawi E da musa: hemonega lalu) da magufalala.

7 Na da Gusia:ne fi dunu beda:igia:be ba:i.

Na da Midia:ne fi dunu beda:ga yagugulalebe ba:i.

8 Hina Gode! Di da hano ilia houba:le ougibala:? Di da hano wayabo bagade ea hou ba:beba:le, bagadewane ougibala:?

Di da mu mobi da:iya fila heda:le ahoasu.

Mulu mobi ginafoi amo da Dia ‘sa:liode’ hamoi.

Amanoba, Di da Dia fi dunuma hasanasisu hou i dagoi.

9 Di da Dia oulali amoga gala:musa: dadi momagei.

Dia ha:ha:na amoga da osobo bagade odahidale yalesi.

10 Goumi alelaloi da Di ba:loba, fofogosu. Hano da mu da:iya gadonini sogadigi.

Osobo bagade hagudu hano da goi.

Amola amo hano gafului da gado heda:i.

11 Dia dadi da dogona ahoa foloa gala:loba amola Dia goge agei da dogona ahoa digagala:loba, eso amola oubi da mae fogole lelu.

12 Dia da ougiliwane, osobo bagade amodili mogodigili asi. Di da ougi bagadedafa agoane, fifi asi gala ilima ososa:gisa asi.

13 Di da Dia fi dunu gaga:musa: gadili asi. Amola Dia ilegei hina bagade dunu gaga:musa: gadili asi. Be Di da wadela:i hamosu dunu ilia ouligisu dunu amo fane sali. Amola ema fa:no bobogesu dunu amo Di da wadela:lesili, gugunufinisi dagoi.

14 Wadela:i hamosu dunu ouligisu dunu ea dadi gagui wa:i da mulu agoane nini afagogolesimusa: manebe ba:i. Ilia da hidale, dunu amo da hame gagui dunu wamowane banenesisu defele, ninima osa:le heda:musa: manebe ba:i. Be amo dadi gagui wa:i ilia ouligisu dunu amo, Dia da Dia dadiga sone, fane sali dagoi.

15 Di da Dia hosiga hano wayabo bagade ososa:gi dagoi. Amola hano bagade da dubu hamonesi.

16 Na da amo huluane naba amola yagugusa. Na lafi gadofo da beda:ga yagugusa.

Na da:i da fofogosu agoane hamosa, amola na emoga ahoasea, gigiawasa.

Gode da Ea eso ilegei amoga, ninima doagala:su dunu ilima se dabe imunu. Na da amo eso doaga:ma:ne, asabole ouligimu.

17 Be amomane, figi ifa da fage hame legei galea, amola waini efe da dulu hame legei galea, amola olife ifa da fage hame legei galea, amola bugili nasu sogega, gagoma da hame heda:i galea, amola sibi huluane da bogogia:i dagoi galea, amola bulamagau sanasisu gagili amo ganodini bulamagau hamedafa esalebe ba:sea,

18 na da amoma mae dawa:le, gebewane, nodone hahawane esalumu. Bai Hina Gode da na Gaga:sudafa esala.

19 Ouligisudafa Hina Gode da nama gasa iaha. Ea hamobeba:le, na da ‘dia’ ohe agoane noga:le ososa: ahoa. Na da goumi da:iya ahoasea, Hina Gode da na noga:le gaga:le ouligisa.