Loma 10

1 Ma ꞌiyagwao, moisa ꞌigu bodaowedi yanuwanuwa tuhuyahidi madouna togidega ma ꞌetolema siloba, ee ꞌoinega tuta mabwaiyana weyahidi yaꞌahwaꞌahwanoi waiwai Yehoba ꞌoina. 2 Ta yasanapu bwaibwainidiya Yehoba weyahina sihematamatana madouna, ma hesiyage geya ꞌana ꞌeda moisa ꞌoinega sida tauya. 3 Cedaina sihemata hwadiyeya, ꞌoinega siboidimo ꞌidi nuwatuhu simuliyediya ma ꞌabehega ꞌoidiyega Yehoba ꞌiꞌahwa dumwaluwedi, ta siꞌaipate ꞌasaya, weyahina Yehoba ꞌina nuwatuhuina ꞌadi ꞌahwadumwalu weyahina geya sihemise. 4 Ma Keliso ꞌina paihowega Mosese ꞌina loina ꞌoidega ꞌigumwala, eeta bewa tutaina tauna ꞌina loina ꞌihegaineya ma ꞌeguma taiya Kelisoina ꞌihemisae, nata Yehoba ꞌiꞌahwa dumwaluwe.

Yehoba ꞌina ꞌetolema mabwaiyada weyahida.

5 Bewa gide Mosese ꞌigwae ꞌesa ꞌada ꞌahwadumwalu weyahina ma ꞌilelediya, ꞌigwaeya,

“Ceguma taiya loina mabwaiyana ꞌimuliyedi, nata yawasi bwebweꞌana ꞌiloba, bewa tutaina ma wete tuta ꞌinaonaoma ꞌoidiya.”

6 Ma bewa tutaina tauda ꞌida hemisa ꞌabehega Yehoba tauna ꞌiꞌabi ꞌehaugita, ma tauna weyahina Yehoba ꞌina Buki ꞌoina ꞌihepwaila, ꞌigwaeya, “Geya sowana ꞌeta taiya ꞌoimiyega ꞌinuwatuhu ma ꞌigwae, ‘Taiya nata ꞌihane Galewa?’ ” Bewa gwaeina ꞌana sanapu ꞌabehega, “Taiya nata Keliso ꞌitoeyama.”

7 “Ta wete geya sowana ꞌeta ꞌoimiyega ꞌigwae, ‘Taiya nata ꞌidobi baleꞌu dudunina?’ ” Gwae bewa ꞌana sanapu ꞌabehega “Taiya nata Keliso ꞌamasega ꞌiꞌabihetoholo hileyama?”

8 Ma heꞌita moisa Yehoba ꞌina Buki ꞌoina bewa gide,

“Gwaeina deimiya tuwa ꞌimiyamiya beno ꞌahwamiya ma wete ꞌatemiya.”

Gwaeinaina beno hemisa weyahina ꞌalologuguyae ꞌoimiya, 9 ma ꞌabehega Yehoba ꞌiꞌetolemegita ꞌeguma ꞌahwadega tatagwatagwala ma tagwae, “Yesu ꞌowa ꞌigu Bada”, ma ꞌatedega tahemisae ꞌabehega Yehoba Yesu ꞌiꞌabihe toholohileya ꞌamasega. 10 Weyahina ꞌatedega tahemiseya eeta Yehoba ꞌiꞌahwa dumwaluwegita. Ta wete tahetohepwaila weyahina, ma ꞌiꞌetolemegita. 11 Gide Yehoba ꞌina Bukiya ꞌihepwaila, ꞌigwaeya,

“Ceguma taiyawedi sihemisa, nata geyaꞌabwa siweꞌaweꞌa.”

12 Ta geya ꞌeta wataha ꞌomi tomiya ganamuli ma tauma meYudiya gamwagamwanida, weyahina mabwaiyada tauna ꞌida Bada, ꞌoinega ꞌeguma taꞌahwanoi ꞌoina, nata ꞌihelau bwaibwainigita. 13 Weyahina ꞌeguma taiya Badaina ꞌoina ꞌiꞌahwanoi, nata ꞌetolihasa ꞌiloba.

14 Moisa, tomota geya sowasowahina ma ꞌetolihasa weyahina siꞌahwanoi ꞌoina, ꞌeguma geya sihemisae. Geya sihemisae weyahina geya Badaina sanina sihesagohe. Ma geya sihesagohe weyahina geya ꞌidi tologuguyamo. 15 Ta ꞌeguma Bada tologuguya ꞌihewasaedi sitauya ꞌoidiya, nata Yesu wasana sihesagohe ma sihemisae, eema ꞌeguma saninega siꞌahwanoi nata ꞌiꞌabihetedi, weyahina Yehoba ꞌina Buki ꞌoina gide wete ꞌihepwaila pwaiya, ꞌigwaeya,

“Tologuguyaowedi taudi tetela bwebweꞌana siꞌeweyama weyahidi tayaliyaya.”

16 Ma tupwadi geya sihemisa, weyahina Aiseya ꞌihepwaila pwaiya weyahidi, ꞌigwaeya,

“Bada yo, ꞌino gwaeina weyahina geya siꞌahwa moisaegau.”

17 Eeta ꞌeguma Keliso weyahina taloguguya, nata hisahisadimo sihesagoha ma sihemisa. 18 Ma togidega meYudiyaedi ꞌina gwaeina sihesagoheya, bo geya? Cehe sihesagoheya, ta Yehoba ꞌina Buki ꞌoina ꞌihepwaila pwaiya, ꞌigwaeya,

“Cidi loguguyaina ꞌasa mabwaiyadi sihesagoheya, weyahina gogo gabulena mabwaiyana ꞌoidiya ꞌiꞌedadana.”

19 Ta gwae bewama togidega weyahina meIsileli sinuwa sabwalena, bo geya? Cehe, sinuwa sabwalena, weyahina Yehoba mwalo Mosese ꞌoina ꞌihepwaila ꞌigwaeya,

“Comi meIsileli nata ꞌigu paihowega hali tomota matahwadi waheꞌipiꞌipiyedi, ma nata wete wagamwasowaledi weyahina ꞌabehega taudi geya ꞌigu bodao moisa.”

20 Ma Aiseya Yehoba ꞌina gwaeina wete ꞌigwae waiwaiya, ꞌigwaeya,

“Tomotaiyedi taudi geya siꞌebesegau, nuwana sihesilalegau, ꞌoidiya yalatuwa, ma baꞌidagwao ꞌaheꞌiyaꞌiyaguwa.”

21 Ma ꞌina gwae wete paꞌalina meIsileli weyahidi ꞌigwaeya,

“Tuta mabwaiyana yabwaubwauwedi eema ꞌabehega sitauyama ꞌoiguwa, ma hesi siꞌitaꞌita guipailegau, weyahina taudi tuwa mumugadi gide, toheguipaila.”

<- Loma 9 Loma 11 ->