Gwaeyao Tupwadi ꞌadi Lihasao

Caisi - Ceguma weꞌaha ꞌigogai hededa beno nata ꞌipaꞌala, sanina ꞌaisi.

Caki - Nowa ꞌina waga madouna ꞌipaihoweya.

Caleꞌo biliupa - Yehoba ꞌina Hada Heꞌasisi solana Tupwa Heꞌasisi Hedade sibiliupeya ꞌaleꞌo madouna ꞌoinega, eeta gesowana tomota siluhuluhu Yehoba matana, ma hesi Topwaoli Madouna sawasawahina ꞌiluhu bolime ma ꞌaigeda ꞌoidiya.

Casa ꞌalaꞌalatana - Tupwaina ꞌoina togala ꞌabwa miya mwau hataya ꞌoina siloba, Seitani baꞌidanao. Yehoba geya nuwana ma tomota siluhuluhu ꞌoina, ꞌoinega Natuna ꞌitagwaleya ma ꞌiꞌamasa kelose ꞌoina ma ꞌabehega ꞌida puiyao ꞌinuwasamudi, ꞌeguma tanuwabui ma tahemisa.

Case - Hebai gide hosi sanina ꞌase bo “donkey.”

Cebe ꞌabiheseseha - Pwalawa ꞌana ꞌabiheseseha sasina “Yeast”. Ceguma geya ꞌana ꞌabihesesehamo pwalawa ꞌana ꞌai geya bwebweꞌana, weyahina ꞌipaꞌala.

Cebegesoha - Me Yudiya ꞌidi tanoha ꞌana ꞌebegesoha taudi hebai bulumakau bo ꞌase ꞌ eluwa ꞌaigeda ꞌaiwe tagitagina silisilisi, ma ꞌana toꞌitayahina ꞌiloiloinae ma sigesogesoha, sanina “plow.”

Cinisenisi - Caiwe ꞌaigeda masina, ꞌana maisa madouna, ꞌeguma ꞌipatu ma paꞌalina, oinega sigabu ma mahaina ꞌausalana.

Cwapi ꞌebesiwa - Me Yudiya ꞌidi ꞌebesiwa gide botolo ꞌoinega ꞌadi weꞌaha sigoigoi, ma hesi hebai ꞌwapidi ꞌoidiyega sipaihoweya.

Cwapiꞌupwa - Yehoba ꞌina loina Ebalahamo ꞌoina, beno buki Nugeta 17:9-14 ꞌoina ꞌabehega tauna ma natunao ta tubunao meloheyadi mabwaiyadi ꞌidi ꞌebeselolo ꞌwapidi matana sida ꞌupwadi, beno ꞌila ꞌilala nuwana ꞌebe ꞌinana sida paihowa, ta ꞌana sanapu beno taudi Yehoba ꞌina tomotaiyao hesihesinuwadi.

Aisake - Ebalahamo natuna sanina Aisake.

Aliyopego - Caigeda ꞌoya ꞌasa Ateni deina, meAteni ꞌidi ꞌebe ꞌetoꞌauta.

Alowesi - Caiwe masina gide holowa, toꞌamasao me Yudiya siheholoidi, gide ꞌadi mulamula ꞌoinega toꞌamasa wawanidi siheheloidi.

Anelose - Taudi yaluyaluwa bwebweꞌadi, Yehoba ꞌina topaihowao. Taudi Yehoba ꞌana tohemisao silemelemegita. Sauga baibaiwana geya tada ꞌitediya, ma hesi sauga tupwadi ꞌoidiya taꞌitadi.

Baꞌala - MeKenani ꞌidi yaubada galena, gide ꞌidi Tomudulele.

Baꞌali - Ceꞌahai ꞌana ꞌita gide laisi bo witi, ta ꞌoinega sipaihowadi pwalawa ma beledi.

Balabala ꞌawawa - Tupwaina ꞌoina geya tomota ma geya hada simiyamiya, ma wete tupwa Yudiya ꞌoina geya ꞌaiwe madoudi.

Balami - Yehoba ꞌina palopita ꞌaigeda, ma hesi ꞌihetopaihowa meIsileli ꞌadi ꞌalehao weyahidi, ꞌoinega Yehoba ꞌiꞌausiya.

Banika - Mane ꞌana lagu hada madouna ꞌoina, ma ꞌimiya bwebweꞌana.

Beya - Hebai ꞌaigeda ꞌana ꞌita gide ꞌedewa, ma hesi madouna.

Botolo - Cebe siwa weꞌaha bo holowa weyahina.

Butu - Caheda ꞌana ꞌebe lagu suꞌwana.

Buyubuyuwa - Caiwe ꞌiꞌiuna paꞌalina ta wete galana.

Bwebweso - Toꞌamasa yaluyaluwadi ꞌidi ꞌasa ma ꞌoina siyamwayamwana bwaꞌomatana ꞌana tuta weyahina. MeYudiya sibwauweya Edesi, ta meDuwau sibwauweya Bwebweso.

Damaya - MeYudiya ꞌidi ꞌaiwe mahuwaina, ꞌana ꞌita gide damaya huwaina, ma hesi madouna ta hotohotona, sanina “fig.”

Debida - Tauna meIsileli ꞌidi kini ꞌaigeda ta sanina ꞌihane hedada, ta wali Same tupwana baibaiwadi ꞌibuidiya. Debidaina ꞌina susu ꞌoinega Toꞌabihetena Keliso ꞌitauyama.

Ebalahamo - Mwalo hene Ebalahamo Yehoba ꞌina bwau ꞌimuliyeya ta ꞌabehega ꞌina ꞌasa ꞌiꞌebesine Ebalahamo natuna Aisake.

Ebeli - Tauna Adama natuna, ta Keni tasina.

Eloni - Tauna Mosese tasina, Libai ꞌina susu ꞌoinega, ta Topwaoli Madouna nugenugetaina.

Epikulo - MeGilisi ꞌidi tupwa taudi Epikulo wete gide taudi Sitoike loheloheya sansanpuidi, ta sauga baibaiwana sihehegwaegwae sanapu weyahina.

Gadoꞌa - Caiwe masina ꞌipaꞌala ma ꞌoinega sigabudi ma mahaina bwebweꞌana, meYudiya ꞌidi ꞌinisenisi gidemusa.

Ganamuli - Tomiya ganamuli, taudi geya meYudiya, ꞌoinega Yehoba ꞌina loinao geya sisanapu ta geya sida muliyeya. Taudi ꞌidi ꞌasao Gilisi ma Loma ma ꞌasa bwaga baibaiwadi ꞌoidiya. MeYudiya ꞌidi nuwatuhu ꞌabehega taudimo Yehoba ꞌina tomota hesihesinuwadi, ꞌoinega tomiya ganamuli mabwaiyadi sisinasinalidi.

Gileipa - MeYudiya ꞌidi ꞌaiwe huwaina hotohotona sanina gileipa, ma huwaina sibibi ma masina ꞌoinega ꞌadi weꞌaha sinumanuma, sanina waini.

Gilisi - Tomiya ganamuli ꞌidi tupwa ꞌaigeda sanina Gilisi. Tupwaina ꞌasa madouna sanina Ateni, wete ꞌaigeda ꞌasa sanina Kolinita. Taudi ꞌenadi ꞌena Gilisi ꞌenana madouna ꞌasa baibaiwadi ꞌoidiya, gide Dobu Milne Bay Mabwaiyana ꞌoina. Loina Tabu Hauhauna ꞌana toleleyao ꞌena Gilisi ꞌoinega sileleya, beno Madiu ma Maki ma Paulo ma bodaidi, weyahina maYudiya ma wete tomiya ganamuli baibaiwadi ꞌena Gilisi sisanapuya. Ta hesi meYudiya meGilisi sihesaniyediya tomiya ganamuli.

Gomola - Casa sodoma ma Gomola ꞌasa galadi, ꞌoinega Yehoba ꞌigabu hegumwalidiya, ma hesi Lota ma natunao ꞌiꞌabihetediya.

Goti - Hebai ꞌaigeda ꞌana sinabwa gide ꞌedewa madouna.

Goula - Goula tuwa pwawati, ma maisana madou hedadena.

Hada Heꞌasisi - Yehoba ꞌina hada madouna Yelusalema ꞌoina tomota sipwaopwaoli.

Hada Tapwalolo - Casa ꞌaigeda ꞌaigeda ꞌoidiya meYudiya ꞌidi Hada Tapwalolo simiyamiya, ta ꞌoidiya Sabati ꞌaigeda ꞌaigeda ꞌoina Buki Heꞌasisi sihasihasili, ma siheheꞌita, ma wete siꞌahwaꞌahwanoi Yehoba ꞌoina.

Hataona Guyaina - Mwalo meYudiya ꞌasa Itipita ꞌoina simiya mwauwa, ma Yehoba ꞌina anelose ꞌihesumaneya ma tautuwa ꞌilohe ꞌamasi hada ꞌaigeda ꞌoidiya. Ma hesi meoidiya. Ma hesi meYudiya lami sihunudi ma bweyahidi ꞌoidiyega ꞌidi ꞌahwaꞌeda ꞌaigeda ꞌaigeda sisaudi. Ceguma aneloseina bweyahaina ꞌiꞌita beno ꞌihataone hali tupwa, ma hadaina ꞌalona maꞌidi bwebweꞌana. Ma hesi meItipita ꞌidi hada mabwaiyana ꞌoina ꞌiluhu tautuwa mabwaiyadi ꞌiloheꞌamasidi.

Coinega bolime ꞌaigeda meYudiya ꞌebe nuwatuhuyahina sipaipaihowa sanina Hataona Guyaina ma ꞌoina ꞌadi beledi geya ꞌana ꞌabi hesesehamo siꞌaiꞌaiꞌ.

Helodi - Taudi toloinao tupwa Yudiya ꞌoina ꞌidi mumuga gala hedadena.

Caigeda Helodi saugaina Yesu ꞌiliꞌuwa nuwanuwana ma ꞌiloheꞌamasi.

Helodi heluwena Yoni toꞌabihebabitaiso ꞌiloheꞌamasiya, ma wete Yesu ꞌiloinaeya ta sisapiya ma ꞌihesumaneya Pailato ꞌoina.

Helodi hetoina Yoni tasina Yemesa ꞌiloheꞌamasiya.

Helodi hepowana Pauloꞌiloinaeya ma ꞌihesumaneya ꞌitauya Loma ꞌoina sabi heyatala kini Sisa matana.

Hiꞌahiꞌa - Yaluyaluwa galadi, ꞌeguma siluhu tomota ꞌoidiya siꞌabihe yauyauledi bo mumugadi siꞌabihegaladi bo nuwana siꞌabihe lohaladi.

Hisopa - Caiwe ꞌaigeda maYudiya sihepaihowa ꞌidi pwaoli weyahidi.

Hosi - Hebai madouna, sowasowana ꞌoina tagelu ma ꞌitauyegita.

Hudi - Tapwalolo weyahina ꞌana heꞌasisi beno geya sowana siꞌai ma sinuma. Tuwa sihudihudi ma siꞌahwaꞌahwanoi Yehoba ꞌoina.

Ibeliu - Beno meYudiya, nuwana meIsileli taudi ꞌenadi sanina wete Ibeliu.

Ilaisa - Tauna palopita Ilaitiya ꞌina ꞌaliꞌe ma wete ꞌana miyalaena.

Ilaitiya - Mwalo tauna Yehoba ꞌina palopita waiwaina. Geya ꞌiꞌamasa, ma hesi mabwebweꞌana Yehoba ꞌitoeya.

Isileli - Aisake natuna Yakobo, sanina heluwena Yehoba ꞌihesaniyeya Isileli. Tauna natunao meloheyadi site tuwelo ma tubudiyao beno meIsileli, wete ꞌidi ꞌasa sanina Isileli, beno meYudiya ꞌidi ꞌasa.

Iso - Tauna Aisake natuna tautuwa, ma hesi ꞌeꞌahai weyahina ꞌina ꞌebeloina ꞌihegimwaneyeya tasina Yakobo ꞌoina.

Kameli - Hebai madouna gide hosi, tobwatobwa ꞌana toꞌahala. Wete tomota ꞌilemedi ma ꞌoinega sigelu.

Keliso - Keliso ꞌana sanapu beno Toꞌabihetena tauna Yehoba ꞌihesinuweya. Cena Ibeliu ꞌoinega sigwae Mesaiya, ta ꞌena Gilisi beno Keliso.

Kenani - Casa Kenani Yehoba ꞌigwae hemisaeya Ebalahamo ꞌoina. Sauga bewa sihesaniyeya Isileli. Wete gide sihesaniyeya Palestine.

Keni - Adama natuna, ta tasina Ebeli ꞌana toloheꞌamasa.

Kihi - Dedewaga bo ꞌahwaꞌeda ꞌana ꞌebe soꞌe sanina kihi bo ꞌihi.

Kola - Tauna ꞌina tohanugetao Mosese ma Eloni ꞌiloꞌalehediya, ꞌoinega baleꞌu ꞌiꞌesoꞌeya ta ꞌitoneya.

Laiyoni - Hebai madouna ma ꞌilolosasa, tomota ꞌiloloheꞌamasidi ta ꞌiꞌaiꞌaidi.

Lami - Lami hebai sipi natuna ꞌiꞌiuna. MeYudiya sihunuhunudi ꞌabehega ꞌidi pwaoli Yehoba ꞌoina.

Libai - Libai tauna Yakobo natuna ꞌaigeda. Tauna tubunao topwaoliyao ma topaihowao Yehoba ꞌina Hada Heꞌasisi ꞌoina. Caigeda ꞌoidiyega Topwaoli Madouna nugenugetaina sanina Eloni, tauna Mosese tasina.

Loheyaiguina - Ceguma Yesu ꞌiheheꞌita ꞌabehega tauna Toꞌabihetena Mesaiya, tauna ꞌibwauweya “The Son of Man,” ta ꞌana sanapu “Tomota moisa,” Yehoba ꞌoinega ꞌitauyama, ta ꞌana bui ꞌena Bunama ꞌoinega beno Loheyaiguina.

Loina ꞌana toheꞌitao - Taudi Buki Heꞌasisi ꞌana sanapu siheꞌita tomota ꞌoidiya, ma wete ꞌana gwae silelebaledi, beno buki hauhauna ꞌana paihowa weyahina.

Lota - Lota tauna Ebalahamo tasina natuna ta Ebalahamo ꞌiꞌwayabuya sitauya Kenani ꞌoina, ma nobwa Lota Ebalahamo ꞌiꞌebesineya ꞌitauya ꞌasa Sodoma ma Gomola ꞌoidiya.

Mana - Mwalo meIsileli sitautauya yoho ꞌawawa ma Yehoba ꞌeꞌahai sanina mana ꞌiꞌebwaediya ma siꞌaiꞌai. Ceguma gonegonega sitoholo mana ꞌimiyamiya baleꞌuwa.

Mane - MeYudiya ꞌidi ꞌebe gimwane ma ꞌoinega ꞌidi tobwatobwa sigimwagimwane, ta goula ma siliba ꞌoidiyega sipaihowediya ꞌidi maneyedi.

Melikisedeki - Mwalo tauna kini ꞌasa Salema ꞌoina, nuwana Yelusalema ꞌoina, ta ꞌina gwae helau ꞌiꞌebwaeya Ebalahamo ꞌoina, saugaina Ebalahamoina ꞌihilama loꞌaleha ꞌoinega eema Ebalahamo Melikisedekiina ꞌina tobwatobwa tupwana ꞌiꞌebwaeya.

Mesaiya - Tauna toꞌabihetena, ꞌena Ibeliu Mesaiya, ta ꞌena Gilisi beno Keliso.

Mosese - Mwalo hene meIsileli tupwa Itipita ꞌoina simiyamwauwa, ma Yehoba ꞌina palopita sanina Mosese ꞌihanugetedi ma sihapwesa sitauya ꞌidi ꞌasa Kenani weyahina.

Mulo - Caiwe masina ꞌaigeda ꞌana maisa madouna, ta mahaina ꞌausalana, meYudiya ꞌadi mulamula, ta wete toꞌamasa wawanidi ꞌoidiya siheholoidi.

Mwali ma bagi - Madiu 13:46 ꞌoina Yesu ꞌiheheꞌita wasawasa Yehoba ꞌoina weyahina, ta ꞌigwae hegehegedi tohewasawasa baleꞌu weyahina. Tauna wasawasa madouna ꞌilobeya ma nuwana ꞌiꞌeweya, gide Yehoba ꞌina helau ta ꞌina loina ꞌoida.

Mwawaꞌi - Caiwe huwaina ꞌebeꞌita tuwa gide meYudiya ꞌidi olibe.

Nidili - Caleꞌo ꞌana ꞌebe sahila sanina nidili.

Olibe - MeYudiya ꞌidi ꞌaiwe ma huwaina ꞌoinega sipaihowadi ꞌidi holowa ta ꞌidi mulamula, ma wete ꞌadi ꞌana ꞌebeꞌeꞌule.

Palisi - MeYudiya ꞌidi tapwalolo ꞌadi tosanapuwao ꞌaigeda boda sibwauwediya Palisi. Yehobaꞌina loinao siheꞌasisiyane bwaibwaininidi.

Palopisai - Beno palopitao sigwae nugeta ꞌabwa toꞌaha ꞌilatu, beno nuwatuhu gide Yehoba ꞌiꞌebwaediya.

Palopita - Yehoba ꞌina togwaeyao, sigwae nugeta toꞌaha ꞌabwa ꞌilatu, beno nuwatuhu gide Yehoba ꞌiꞌebwaediya.

Pelo - Kini madoudi mwalo tupwa Itipita ꞌoina sibwauwedi Pelo.

Hataona Guyaina ꞌeguma ꞌigumwala, ma pipiti sabwelo mulina beno Penitikosi, ma witi ꞌana ꞌetahi sihegaina, ta siguyai, sauga bewa tanuwatuhu yahiya Yaluyaluwa Tabuna ꞌina suluma Penitikosi ꞌana tuta ꞌoina.

Piyoi - Caiwe huwaina ꞌebeꞌita tuwa gide meYudiya ꞌidi gileipa.

Pwaoli - Mumuga galana ꞌana ꞌabihelolagu eema ꞌoinega tomota simiya bwebweꞌana, nuwana hebai sihunudi bo tobwatobwa ꞌoinega sihelau ꞌadi ꞌalehao ꞌoidiya, ma ꞌoinega ꞌaleha mabwaiyana ꞌigumwala. Mwalo tomota ꞌidi pwaoli Yehoba ꞌoina gidemusa hebai bo ꞌeꞌahai bo ꞌebe numa.

Sabati - MeYudiya ꞌidi sabwelo ꞌaiyawasi beno Saturday, ta Yesu ꞌina toholohila ꞌamasega Sunday, ꞌoinega sauga bewa Sunday ꞌebe tapwalolo gide Sabati.

Sadusi - MeYudiya ꞌidi tapwalolo ꞌadi tohanugetao, beno topwaoli madoudi sibwauwediya Sadusi. Taudi towasawasa madoudi. Cidi hemisa ꞌabehega ꞌamasa hataya, geya wete toholohila.

Saido - Cebeꞌita tuwa, weyahina meYudiya ꞌidi ꞌaiwe “fig” huwaina gide damaya ma hesi nabaina sigubagubala gide saido.

Saiyoni - Saiyoni ꞌoyana, ta ꞌoina ꞌasa Yelusalema siꞌabiya.

Sameliya - Yelusalema ma Galili gamwagamwanidiya beno tupwa Sameliya. MeSameliya tubudiyao mwalo meYudiya ma hesi hali tupwa wahiwahinedi sihaihaidi, ma wete mumugadi sihebweliyeya, ꞌoinega taudi gide meYudiya moisa silogwahatediya.

Seitani - Tauna mwalo anelose ꞌidi tohanugeta gide Maikeli ma Gebeliyela, ma hesi ꞌinuwa hane, ꞌoinega Yehoba ꞌiꞌ ahusepaleya ꞌidobiya baleꞌuwa ta ꞌihe Tomudulele. Ta ꞌina ꞌaliꞌeyao taudi yaluyaluwa galadi gide hiꞌahiꞌa, welabana, balahu, toꞌwatoꞌwai ma tupwadi wete. Seitani saninao baibaiwadi gide Diyabolo, Lusipa, Apoliyoni, ta Mwata Nugenugetana.

Seyala - Caiwe ꞌaigeda, ta patuna ꞌiꞌiudi, gide meYudiya ꞌidi “mustard.”

Sikamole - Caiwe ꞌaigeda sanina sikamole ꞌitotoholo tupwa Yudiya ꞌoina.

Siliya - Yudiya ꞌoinega tupwa bomatu ꞌoina tupwa sanina Siliya ꞌimiyamiya.

Sipi - Sipi hebai tuwa, ta hunuhunuwadi ꞌoinega ꞌwama sipaihowadi.

Sisa - MeLoma ꞌidi toloina madouna.

Sitoike - MeGilisi ꞌidi tupwa taudi Sitoike gide sanasanapuidi, ta sauga baibaiwana sihehegwaegwae sanapu weyahina.

Sodoma - Mwalo ꞌasa Sodoma ma Gomola ꞌoidiya Lota ꞌimiyamiya. Lota loheya bwebweꞌana ma hesi meSodoma ma meGomola ꞌidi mumuga gala hedadena, ꞌoinega Yehoba ꞌigabu hegumwalidiya.

Takesi - Gabemani mane siꞌewaꞌewa tomota ꞌoidiyega sanina takesi.

Tawelo - Tawelo ꞌebe talaꞌiꞌila tuwa.

Tomodaba - Cipwala madouna ꞌisae nugeta ma muliyetega ꞌiꞌasale.

Tomudulele - Yaluyaluwa galadi ꞌidi bada madouna, mwalo meIsileli sihesaniyeya Bielisibubi bo Seitani.

Topwaoli - Libai tubunao taudi topwaoliyao, ta sipwaopwaoli Yehoba ꞌoina tomota weyahidi, beno tomota ꞌidi hebahebai sihunuhunudi ta sigabudi Hada Heꞌasisi ꞌoina, ma ꞌoinega Yehoba ꞌidi puiyao ꞌoidiyega ꞌinuwasamudi.

Tupwa Heꞌasisi - Hada Heasisi ꞌalona beno ꞌaigeda ꞌaliupa, ma ꞌoina topwaoliyao siluhuluhu sipwaopwaoli Yehoba ꞌoina. Geya hali tomota sida luhuwa.

Tupwa Heꞌasisi Hedade - Tupwa Heꞌasisi ꞌalona beno ꞌaliupa ꞌiꞌiuna, ꞌaleꞌo ꞌoinega siꞌaliupeya, ma hesi Topwaoli Madouna ꞌiboima ꞌiluhuluhu bolime ma ꞌaigeda ꞌoidiya, ta ꞌipwaoli Yehoba matana tauna ꞌina puiyao ma tomota ꞌidi puiyao weyahidi.

Waga lisilisi - Cebe gelu gide talaka, ma hesi hebai hosi silisilisi ma ꞌipilipilihe.

Wagahata - Cebemiya ma ꞌoinega toloina ꞌimiyatoi ma ꞌiloiloina, gide seya (chair).

Waini - Gileipa huwaina ꞌeguma tomota sibibi beno masina ꞌoinega ꞌadi weꞌaha sinumanuma, sanina waini. Ceguma waini ꞌimiya tuta saliyana ꞌihewaiwai ma ꞌeguma tomota sinuma hedada nata siheyauyaule.

Witi - Witi gide laisi sibegubeguli, ma huwaina ꞌoinega pwalawa sipaihowa.

Yakobo - Aisake natuna Yakobo, sanina heluwena Yehoba ꞌihesaniyeya Isileli. Tauna natunao meloheyadi site tuwelo ma tubudiyao beno meIsileli, wete ꞌidi ꞌasa sanina Isileli, beno meYudiya ꞌidi ꞌasa.

Yaso - Tomota ꞌadi sinabwa mahemahetena.

Yese - Yese tauna kini Debida tamana.

Yoheyohe Guyaina - MeYudiya ꞌidi ꞌebe yaliyaya saugaina ꞌidi ꞌetahi ꞌigumwala, ta ꞌoina sinuwatuhuyahi tubudiyao ꞌidi latu Itipita ꞌoinega ma ꞌidi tauya yoho ꞌawawa bolime poti ꞌoidiya, ta yoheyohe ꞌoidiya siꞌenoꞌeno ma ꞌana siga sihapwesa ꞌidi ꞌasa Kenani ꞌoina.

Yoho ꞌawawa - Tupwaina ꞌoina geya tomota ma geya hada simiyamiya, ma wete tupwa Yudiya ꞌoina geya ꞌaiwe madoudi.

Yona - Yona mwalo Yehoba ꞌina palopita ꞌaigeda ta genuwana ꞌiloguguya meNininbe ꞌoidiya ma ꞌidena ta ꞌigeluwa wagai, ma yaumai madouna silobeya, ꞌoinega Yona siula suluheya holai, ta silahana madouna ꞌitoneya. Muliyetega silahanaina Yona ꞌimaiweya dabala, ma ꞌitoholowa ta ꞌitauya Ninibe, ꞌiloguguya.

Yosepa - Yosepa tauna Yakobo natuna ta tasinao siheꞌipiꞌipiyeya ta ꞌoinega sihegimwaneyeya meMidiyani ꞌoidiya, ta sitauyeya Itipita, ta nobwa ꞌiheloheya madouwa, ma ꞌina susuwao ꞌilemediya sauga gomale ꞌoina.

Yosuwa - Tauna Mosese ꞌana miyalae ma meIsileli ꞌihanugetedi ma siluhu ꞌidi ꞌasa Kenani ꞌoina.

Yudiya - Yuda tauna Yakobo natuna, ta tubunao taudi susu Yuda, ta ꞌidi tupwa sanina Yudiya, ta ꞌina ꞌasa madouna Yelusalema. Debida ma tubuna Yesu ꞌidi susu Yuda. Sauga bewa meIsileli mabwaiyadi tabwauwedi meYudiya, beno “Jews”, bo meDiu, weyahina ꞌidi tupwa sanina Yudiya.