1 [a]A꞉la꞉fo꞉ko꞉lo꞉ niyo꞉ a꞉la꞉dabu bo꞉do꞉l. Isolael kaluka꞉isale enedo꞉ a꞉no꞉ Gode eyo꞉ gola ba꞉ba꞉ya꞉le? A eyo꞉ a꞉la꞉bo꞉ mada mo꞉dimido꞉. Nelo꞉ Isolael kalu. Ablaham eya a꞉la꞉ta꞉ga꞉lo꞉ e ma꞉mu i fa꞉la꞉dowo꞉ nowo꞉ ne. Ne Ba꞉nsamena꞉ so꞉lo꞉wa a꞉la꞉ta꞉ga꞉ fa꞉la꞉dowo꞉. 2 Gode eyo꞉ kaluka꞉isale eno꞉le ko꞉lo꞉ tamin amilo꞉ elo꞉ da꞉feyo꞉ a꞉no꞉ mada mo꞉gola ba꞉ba꞉ ko꞉lo꞉ a꞉lab. Elaiya eyo꞉ Godeya꞉ bugo꞉ amilo꞉ sa꞉sa꞉lo꞉ da꞉lab we gio꞉ asulaya? Eyo꞉ Isolael kaluka꞉isaleya꞉lo꞉ hala dimido꞉ a꞉no꞉ Godemo꞉ sa꞉lakiyo꞉ a꞉la꞉sio꞉. 3 [b]“Alan, iliyo꞉ dinali sa꞉lan kalu gilo꞉ a꞉no꞉ yasala꞉, a꞉la꞉ta꞉ga꞉ bobalo꞉ so꞉mea꞉sen u dibido꞉ a꞉no꞉ tambo bidila꞉. Dinali sa꞉lan kaluwo꞉ imilise neko꞉ dowab ko꞉lo꞉, iliyo꞉ nelo꞉ sanala꞉ma꞉no꞉ dowaki migi kudab.” 4 [c]Eyo꞉ a꞉la꞉sa꞉labikiyo꞉, Gode eyo꞉ a꞉ma꞉la꞉ towo꞉ emo꞉wo꞉ waga sio꞉wo꞉? Gode eyo꞉ Aisayamo꞉wo꞉ a꞉la꞉sio꞉, “Niyo꞉ 7,000 kaluka꞉isale no꞉no꞉ndo꞉wo꞉ ga꞉li o꞉sab. I a꞉no꞉ madali gode Bal o꞉mo꞉wo꞉ gulalu silikiyo꞉, mo꞉wabulu sa꞉la꞉sen ko꞉lo꞉lab.” 5 Gode eyo꞉ a꞉la꞉sio꞉ ko꞉lo꞉, o꞉g wenamio꞉lo꞉ o꞉leo꞉ngo꞉ dowab. Gode eyo꞉ Isolael kaluka꞉isale ha꞉fo꞉wo꞉ disa꞉lakiyo꞉, nolo꞉ da꞉fe alifelo꞉ ko꞉lo꞉, iliyo꞉ Godeyo꞉ o꞉kudu ha꞉na꞉lab. 6 [d]Godeya꞉lo꞉ da꞉fe alifelo꞉ a꞉no꞉ ini nanog nafa dimido꞉ a꞉namima. Godeya꞉ ene ha꞉fo꞉ disa꞉ man a꞉na iliki da꞉feyo꞉. Gode eyo꞉ ili man dimido꞉ a꞉na iliki da꞉feai kibo꞉bowo꞉, Godeya꞉ ha꞉fo꞉ disa꞉lan man a꞉no꞉ o꞉ngo꞉malo꞉ngo꞉ domabe.

7 A꞉la꞉fo꞉ko꞉lo꞉ niliyo꞉ waima꞉no꞉wa꞉le? Isolael kaluka꞉isale iliyo꞉ Godeya꞉ siwa꞉l amio꞉ digalo꞉ doma꞉no꞉ a꞉lakiyo꞉ halaido꞉ keda꞉len ko꞉sega, iyo꞉ digalo꞉leyo꞉ mo꞉dowo꞉. Ko꞉sega Godeya꞉lo꞉ da꞉feyo꞉ kaluka꞉isale iyo꞉ digalo꞉ dowo꞉. A꞉la꞉ta꞉ga꞉ Gode eyo꞉ kaluka꞉isale nol a꞉ma꞉ asulo꞉ nodoma꞉no꞉wo꞉ halaido꞉ ta꞉fo꞉ ko꞉lo꞉lab. 8 [e]To a꞉no꞉ Godeya꞉ bugo꞉ amio꞉ a꞉la꞉sa꞉sa꞉lo꞉ ko꞉lo꞉ da꞉lab.

11 [g]A꞉la꞉go꞉ko꞉lo꞉ niyo꞉ a꞉la꞉dabu bo꞉do꞉l. Isolael kaluka꞉isale iyo꞉ Ya꞉suwo꞉ gola ba꞉daki midi dowab a꞉namio꞉, ililo꞉ tili da꞉dan tog a꞉no꞉ tambo edo꞉wa꞉le? O꞉leaumbaka꞉! Yu kaluka꞉isale ililo꞉ mo꞉tilida꞉dab a꞉na ilikiyo꞉, Yu kaluka꞉isalema i a꞉no꞉ Godeya꞉ ene mela꞉no꞉wo꞉ dima꞉kiyo꞉ togo꞉ kolaefa꞉. Godeya꞉lo꞉ dimido꞉ a꞉no꞉, Isolael kaluka꞉isale iyo꞉ Yu kaluka꞉isalema a꞉no꞉ ba꞉da꞉sa꞉ga꞉ iligakiyo꞉ meselema꞉ki dimidalifa꞉. 12 Isolael kaluka꞉isale iyo꞉ Godeyo꞉ gola ba꞉daki, tog hala ane ko꞉lo꞉, inido꞉ dimido꞉ a꞉na ilikiyo꞉, Gode eyo꞉ henfelo꞉ kaluka꞉isale nolo꞉ mada asuwa꞉takiyo꞉, kelego꞉ nafale a꞉no꞉ imo꞉ dimi. A꞉la꞉fo꞉ko꞉lo꞉ Isolael kaluka꞉isaleyo꞉ a꞉tilida꞉daki, a꞉la꞉ta꞉ga꞉ agelo꞉ a꞉no꞉ ilili alitalikiyo꞉, Gode eyo꞉ kaluka꞉isale tambomo꞉wo꞉ kelego꞉wo꞉ mada nafale a꞉dimia꞉ib.

13 O꞉go꞉ niyo꞉ Yu kaluka꞉isalema gimo꞉wo꞉ a꞉la꞉so꞉lo꞉l. Gode eyo꞉ ne gilo꞉wa iliga꞉fo꞉ ko꞉lo꞉, nanog nilo꞉ dimida꞉lab a꞉no꞉ mada wa꞉la꞉b ko꞉lo꞉ ne sagala꞉li dimida꞉lo꞉l. 14 Ni nao, Yu kalu nolo꞉ nanog nilo꞉ dimido꞉l we ili asulo꞉wo꞉ digidalitaki, iyo꞉ meselaki tili dabuma꞉kiyo꞉, nanog we a꞉na dimido꞉l. 15 Gode eyo꞉ Yu kaluka꞉isalelo꞉ gola ba꞉ba꞉ amio꞉, henfelo꞉ kaluka꞉isale ha꞉la꞉ nol o꞉lia꞉ ha꞉fo꞉ disa꞉laki, ege dowo꞉. A꞉la꞉fo꞉ko꞉lo꞉ Yu kaluka꞉isaleyo꞉ Gode o꞉lia꞉ wa꞉ka ege dowalikiyo꞉, sowo꞉ kalu ko꞉lo꞉ a꞉ma꞉la꞉ dasiliyo꞉ o꞉ngo꞉ doma꞉ib. 16 Ma꞉n wo꞉fa꞉ ho꞉gi a꞉no꞉ halolia꞉ga꞉, heb a꞉no꞉ Godemo꞉ ko꞉le boba dimialega, wo꞉fa꞉ tambo a꞉no꞉lo꞉ Godeya꞉ siwa꞉l amio꞉ nafa malilo꞉ dowab. I tef a꞉no꞉ nafa malilo꞉ dowalega, i ele a꞉no꞉lo꞉ nafa malilo꞉ dowab. [h]

17 [i]Isolael i a꞉no꞉ o꞉lif i ko꞉lo꞉ egelo꞉ amilo꞉ gele alifa꞉ o꞉ngo꞉ ko꞉lo꞉lab. A꞉la꞉ta꞉ga꞉ Yu kaluka꞉isalema gio꞉ hena꞉ usamilo꞉ o꞉lif i a꞉s ko꞉lo꞉ madalilo꞉ fa꞉la꞉ne o꞉ngo꞉ ko꞉lo꞉lab. Gode eyo꞉ o꞉lif i ko꞉lo꞉ egelo꞉ amilo꞉ elen a꞉ma꞉ ele nolo꞉ gegedelia꞉ga꞉ dila꞉. A꞉la꞉ta꞉ga꞉yo꞉ hena꞉ usamilo꞉ o꞉lif a꞉s ele nowo꞉ Gode eyo꞉ gedelea꞉saga꞉, egelo꞉ amilo꞉ o꞉lif i a꞉na kudu alifa꞉. A꞉la꞉fo꞉ko꞉lo꞉ egelo꞉ amilo꞉ o꞉lifa꞉ tef a꞉ma꞉yo꞉ ho꞉no꞉ gimo꞉wo꞉ nafale dimia꞉lab.

18 Ko꞉sega giliyo꞉ ele gagadela꞉ a꞉no꞉ mogago꞉lo꞉b a꞉la꞉asulakiyo꞉, ginina꞉ma꞉la꞉yo꞉ kaila꞉so꞉bo. Asuluma! Gio꞉ ele o꞉ngo꞉ dowo꞉ ko꞉sega ele a꞉ma꞉yo꞉ tefo꞉ mo꞉asuwa꞉ta꞉sen. Tef a꞉ma꞉yo꞉ mela꞉no꞉ ho꞉no꞉ gimo꞉ dimia꞉sen. 19 Giliyo꞉ a꞉la꞉ sa꞉ma꞉nigaba꞉le, “Gode eyo꞉ nio꞉ i amio꞉ o꞉li kuduma꞉kiyo꞉, ele nolo꞉ tamina gagadela꞉.” 20 To a꞉no꞉ hendele ko꞉sega, ililo꞉ mo꞉tilidabu a꞉ma꞉ iliki gagadela꞉. A꞉la꞉ta꞉ga꞉ gini tilidabu a꞉na ilikiyo꞉, gio꞉ halale dofo꞉lab. A꞉la꞉fo꞉ko꞉lo꞉ go꞉no꞉na꞉ma꞉la꞉yo꞉ ge nafale a꞉lakiyo꞉ kaila꞉so꞉bo. Gelo꞉ amio꞉ a꞉la꞉bo꞉ fa꞉la꞉dowando꞉ a꞉lakiyo꞉, molo asulaki tagi dowa꞉bi. 21 Mo꞉wo꞉ Gode eyo꞉ ene egelo꞉ amilo꞉ o꞉lif ele nolo꞉ gagadelia꞉ga꞉ dila꞉ ko꞉lo꞉, gio꞉lo꞉ tilidabu amio꞉ mo꞉dowalega, o꞉leauka dimidama꞉ib. 22 [j]A꞉la꞉fo꞉ko꞉lo꞉ giliyo꞉ Godeya꞉ ene ha꞉fo꞉ disa꞉lan man o꞉lia꞉ ene halaido꞉ dimidan man o꞉lia꞉yo꞉ asuluma. Gode eyo꞉ mo꞉tilida꞉dab kaluka꞉isale o꞉mo꞉wo꞉ mada halaido꞉ dimida꞉sen. A꞉la꞉ta꞉ga꞉ gio꞉ e o꞉lia꞉yo꞉ ege dofo꞉ko꞉lalega, eyo꞉ gimo꞉wo꞉ ha꞉fo꞉wo꞉ disa꞉la꞉mela꞉ib. Ko꞉sega ge mo꞉tilida꞉dalega, gelo꞉ a꞉la꞉ galila꞉ma꞉ib. 23 Yu kaluka꞉isale iliyo꞉ nodolaki, wa꞉ka a꞉tilida꞉dalega, Godeyo꞉ halaido꞉wo꞉ a꞉lab ko꞉lo꞉ eyo꞉ kaluka꞉isale a꞉no꞉ o꞉lif i amio꞉ wa꞉ka kudu alifa꞉ib. 24 Yu kaluka꞉isalema gio꞉, o꞉lif a꞉s a꞉ma꞉ ele o꞉ngo꞉ ko꞉lo꞉, Gode eyo꞉ gio꞉ galilia꞉sa꞉ga꞉, o꞉lif i hendele a꞉nami kudu alifa꞉. A꞉la꞉bo꞉ ene asulo꞉wo꞉ mo꞉fa꞉la꞉dowan ko꞉sega, Godeya꞉ ene halaido꞉wa꞉ dimido꞉. Ko꞉sega Yu kaluka꞉isale iyo꞉ egelo꞉ amilo꞉ o꞉lifa꞉ eleleyo꞉ o꞉m ko꞉lo꞉, a꞉ma꞉la꞉ o꞉lif i inin amilo꞉ kuduma꞉no꞉wo꞉ halaido꞉ma.

25 Yu kaluka꞉isalema gio꞉ ginina꞉ma꞉la꞉yo꞉ kailabena꞉kiyo꞉, niyo꞉ to wo꞉no꞉lelo꞉ elen we gimo꞉wo꞉ kalaba fanda walama꞉nigo꞉l. Yu kaluka꞉isale nolo꞉ mo꞉tilida꞉daki, iyo꞉ asulo꞉ a꞉nodoma꞉no꞉wo꞉ halaido꞉ dofo꞉ ha꞉na꞉lab. Ko꞉sega Yu kaluka꞉isalema Godeya꞉lo꞉ tamin amilo꞉ da꞉feyo꞉ i a꞉no꞉ tambo Keliso amio꞉ tilida꞉dabikiyo꞉, Yu kaluka꞉isaleyo꞉ wa꞉kabilo꞉ tilida꞉ba꞉no꞉ ho꞉leno꞉ a꞉na fa꞉la꞉doma꞉ib. 26 [k]A꞉la꞉dimidalikiyo꞉ Gode eyo꞉ Yu kaluka꞉isale tambowo꞉ a꞉na asuwa꞉taki gasilia꞉ib. Godeya꞉ bugo꞉ amio꞉ a꞉la꞉sa꞉sa꞉lo꞉.