Link to home pageLanguagesLink to all Bible versions on this site

1 A꞉la꞉ta꞉ga꞉yo꞉ ne Hebene halonamio꞉ modo꞉ ko꞉lo꞉ kegeakilo꞉ halale tolano꞉ o꞉ngo꞉ ko꞉lo꞉ dabu. Iliyo꞉ a꞉la꞉sa꞉labi dabu.

“Yawe ene wiyo꞉ dulugu sama! [a]
Nili Gode wema꞉yo꞉ nio꞉ a꞉ma꞉la꞉ di.
E wilo꞉ alan a꞉la꞉ta꞉ga꞉ halaido꞉lo꞉ di.
2 [b]Elo꞉ mo꞉walila꞉sa꞉ga꞉lo꞉ wa꞉deab a꞉no꞉ mada digalo꞉le gab ko꞉lo꞉,
niliyo꞉ e wabulu so꞉lo꞉l.
Babilon kaluka꞉isale ili man mogago꞉ dimidan a꞉ma꞉yo꞉ henfelo꞉ kaluka꞉isale a꞉no꞉lo꞉ man mogago꞉ dimidama꞉ki, sendelia꞉ga꞉ ta꞉fo꞉.
Iliyo꞉ Godeya꞉ ene nanogdo꞉ dian kaluka꞉isaleyo꞉ yasala꞉len ko꞉lo꞉, Gode eyo꞉ iyo꞉ mo꞉walila꞉sa꞉ga꞉ wa꞉de alifa꞉.”
3 A꞉la꞉ta꞉ga꞉ iliyo꞉ wa꞉ka halale sa꞉laki a꞉la꞉sio꞉,
“Yawe ene wiyo꞉ dulugu sama!
Babilon e deya꞉ so꞉dabilo꞉ de ho꞉mo꞉n e amilo꞉ fa꞉la꞉dowa꞉lab a꞉no꞉ mela꞉no꞉ mela꞉no꞉le mela꞉nigab.”

4 Iliyo꞉ a꞉la꞉sa꞉la꞉sa꞉ga꞉, Gode e misa꞉ kalulo꞉ mesa꞉no꞉ fofodo꞉ a꞉na sab ko꞉lo꞉, ko꞉go꞉do꞉ kalu do꞉la꞉fo꞉ a꞉la꞉ a꞉la꞉ta꞉ga꞉ fa꞉la꞉da꞉in a꞉no꞉lia꞉, mela꞉no꞉lo꞉ a꞉lab fa꞉la꞉da꞉in o꞉lia꞉ma꞉yo꞉ Godeyo꞉ wabudaki, e milifa gulalu asitaki misa꞉fu fufudakiyo꞉ a꞉la꞉sio꞉,

“Mada hendele o꞉m. Yawe ene wiyo꞉ dulugu sama!”
Sibi inso꞉ a꞉ma꞉ ga tililiaki ma꞉no꞉wo꞉ ma꞉ib
5 A꞉la꞉ta꞉ga꞉ to nowo꞉ misa꞉ kalulo꞉ mesa꞉no꞉ fofodo꞉lo꞉ a꞉na a꞉la꞉ta꞉ga꞉ handalowakiyo꞉ a꞉la꞉sio꞉,
“Kalu wilo꞉wo꞉lo꞉, kalu wilo꞉malo꞉lo꞉,
Ene nanog dian kaluka꞉isaleyo꞉lo꞉, a꞉la꞉ta꞉ga꞉ Godelo꞉ tagilab kaluka꞉isale a꞉no꞉ tambo,
Giliyo꞉ Godeya꞉ ene wiyo꞉ ko꞉lo꞉ dulugu sama!”

6 [c]A꞉no꞉ ko꞉lo꞉ dabu amio꞉, kalu modo꞉ kegeo꞉ a꞉ma꞉lo꞉ to sio꞉wo꞉, ho꞉nsa gu amilo꞉ fodo꞉ o꞉ngo꞉ fa꞉la꞉dowakiyo꞉, gun guiyan a꞉gaki ho꞉le sa꞉laki a꞉la꞉sio꞉

“Nili Alan Gode Halaido꞉le eyo꞉ henfelo꞉ kaluka꞉isaleyo꞉ tambo e bo꞉fo꞉lab ko꞉lo꞉,
Yawe ene wiyo꞉ dulugu sama!
7 [d]Nio꞉ sagalo꞉ dowaki, ha꞉sa mesa꞉niki.
Ene wiyo꞉ wabuluma.
Mo꞉wo꞉ Sibi inso꞉wa꞉ ga tililia꞉no꞉wo꞉ o꞉ma mio꞉.
A꞉la꞉ta꞉ga꞉ ene gayo꞉[e] momadelia꞉ga꞉ a꞉lab.
8 Helebeso꞉g nafa, ho꞉lo꞉ fo꞉fo꞉lesodo꞉ a꞉no꞉ emo꞉ kama꞉ki dimi.”
Helebeso꞉g nafa a꞉no꞉ man digalo꞉ nafale ko꞉lo꞉ tilidabu kaluka꞉isale i a꞉ma꞉lo꞉ dimida꞉leno꞉ o꞉m.

9 [f]Ne a꞉no꞉ ko꞉lo꞉ da꞉da꞉len amio꞉, ma꞉mul kaluwa꞉yo꞉, “To we sa꞉sa꞉lima” a꞉la꞉sio꞉. “Sibi inso꞉wa꞉ galo꞉ silialitab amilo꞉ ma꞉no꞉lo꞉ ma꞉no꞉ mena꞉kilo꞉ ho꞉ido꞉ a꞉no꞉, Gode eyo꞉ gio꞉ sagale alifa꞉ib.” A꞉la꞉ta꞉ga꞉ ma꞉mul kaluwa꞉ a꞉kudu sa꞉lakiyo꞉, “To we mada hendele Godelo꞉wa a꞉la꞉ta꞉ga꞉ mio꞉ ko꞉lo꞉ so꞉lo꞉l.”

10 [g]A꞉la꞉sa꞉labiki, niyo꞉ e wabuluma꞉niki, e gibdo꞉wa gulalu asi ko꞉sega, e sa꞉lakiyo꞉, “A, gio꞉ nemo꞉wo꞉ wabulu sa꞉la꞉so꞉bo. Ge o꞉lia꞉ gado nado o꞉lia꞉ma꞉yo꞉ to hendele Ya꞉suwa꞉lo꞉ kalab amilo꞉ wido꞉ a꞉no꞉ tili asulo꞉ ko꞉lo꞉lab. Godeya꞉ nanog dian kalu gi o꞉ngo꞉wo꞉ nowo꞉ ne. Godeya꞉ wiyo꞉ imiliko꞉ wabulu sama! Mo꞉wo꞉ Ya꞉suwa꞉lo꞉ to hendele kalab amilo꞉ wido꞉ a꞉ma꞉yo꞉, kalu nolba꞉yo꞉ Godeya꞉ to walama꞉no꞉wo꞉ halaido꞉wo꞉ dimiakigab.”

Kaluwo꞉ ho꞉s ho꞉lo꞉ wa꞉la asita꞉ga꞉ bubo꞉
11 [h]Hebeneyo꞉ kolaetabiki ba꞉ba꞉ amio꞉, ho꞉s ho꞉lo꞉ nowo꞉ a꞉na ba꞉ba꞉. Kalu ho꞉s wa꞉l amilo꞉ sab a꞉ma꞉ wi nowo꞉ we, Tilidabuwo꞉ Mo꞉ta꞉ta꞉sen. A꞉la꞉ta꞉ga꞉ wi nowo꞉ we, Hendele. Eyo꞉ digalo꞉le mo꞉walila꞉sen, a꞉la꞉ta꞉ga꞉ e gis o꞉lia꞉ bubakiyo꞉, man digalo꞉le kudu ha꞉naki buba꞉sen. 12 [i]Ene siyo꞉ de wa꞉sowa alan o꞉ngo꞉ dowo꞉ ko꞉lo꞉, misa꞉ kaluwa꞉lo꞉ misa꞉ amilo꞉ sa꞉ga꞉lan a꞉no꞉ ene misa꞉ amio꞉ modo꞉ sa꞉ga꞉le alifelo꞉. Wi nowo꞉ e amio꞉ sa꞉sa꞉lilia꞉ga꞉ delen a꞉no꞉ nolo꞉ mo꞉asulaki, ina꞉li e asulo꞉. 13 [j]Helebeso꞉g sambo ho꞉bo꞉ amilo꞉ to꞉lolo꞉ a꞉no꞉ e tigili sa꞉ga꞉lo꞉ ko꞉lo꞉, ene wiyo꞉ nowo꞉, Godeya꞉ To. 14 Ame kalu Hebenelo꞉ sen i a꞉no꞉ helebeso꞉g nafa, ho꞉lo꞉ fo꞉fo꞉lesodo꞉ a꞉no꞉ ko꞉lo꞉ sa꞉ga꞉lela꞉sa꞉ga꞉, ho꞉s ho꞉lo꞉ wa꞉la kandaya꞉sa꞉ga꞉, e ko꞉lo꞉ kudu ane. 15 [k]Kalu a꞉ma꞉ mego꞉f amio꞉ helebesi sambo miyo꞉[l] ko꞉lo꞉ handalowa꞉sa꞉ga꞉yo꞉, helebesi a꞉ma꞉yo꞉ henfelo꞉ kaluka꞉isale o꞉lia꞉ bubalikiyo꞉ tiginima꞉ib. Eyo꞉ kaluka꞉isaleyo꞉ mo꞉nofolaki, halaido꞉ bo꞉fo꞉mela꞉ib. Wain fo ib a꞉no꞉ fa꞉la꞉doma꞉kilo꞉ basian aumbo꞉, eyo꞉ Gode halaido꞉le a꞉ma꞉ gadio꞉ alan a꞉no꞉ kalaba fa꞉la꞉doma꞉ki walama꞉ib. 16 [m]Ene wi nowo꞉ ene fe o꞉lia꞉, helebeso꞉g sambo ko꞉lo꞉ a꞉ma꞉ wa꞉l amio꞉lo꞉ a꞉la꞉sa꞉sa꞉lo꞉,
Misa꞉ kaluwa꞉ misa꞉yo꞉ e, a꞉la꞉ta꞉ga꞉
kalu alana꞉ Alano꞉ e.

17 [n]A꞉la꞉ta꞉ga꞉ niyo꞉ ba꞉ba꞉ amio꞉, ma꞉mul kalu nowo꞉ of a꞉na kagafo꞉liki, o꞉ba꞉ ko꞉lo꞉ akin amilo꞉ ha꞉lelia꞉ sia꞉lab o꞉mo꞉ tambo halale sa꞉lakiyo꞉ a꞉la꞉sio꞉, “Gio꞉ Godeya꞉lo꞉ ma꞉n alando꞉ ma꞉no꞉ a꞉namio꞉ kegenema꞉ni mena. 18 Gio꞉ misa꞉ kaluwa꞉ howo꞉lo꞉, da꞉la꞉di bo꞉fo꞉lowan kaluwo꞉lo꞉, halaido꞉ kaluwo꞉lo꞉, ho꞉s a꞉no꞉lo꞉, kalu ho꞉s wa꞉l amilo꞉ asita꞉ga꞉lo꞉ ha꞉nab a꞉no꞉lo꞉, kalu wilo꞉ a꞉lab o꞉lia꞉ wilo꞉malo꞉lo꞉, madali nanogdo꞉ dian kalu o꞉lia꞉, kalu ga꞉lilo꞉ a꞉lab a꞉no꞉lo꞉, henfelo꞉ kaluka꞉isale i a꞉ma꞉ howo꞉ tambo ma꞉ni mena.” Ma꞉mul kaluwa꞉yo꞉ a꞉la꞉sio꞉.

19 A꞉ma꞉ fa꞉s amio꞉ ne ba꞉ba꞉yo꞉, no꞉ mogago꞉wo꞉, a꞉la꞉ta꞉ga꞉ henfelo꞉ wema꞉ misa꞉ kalu iyo꞉, a꞉la꞉ta꞉ga꞉ ini ame kaluwo꞉ tambo kegea꞉sa꞉ga꞉, kalu ho꞉s wa꞉l amilo꞉ sab a꞉no꞉lia꞉ ene ame kalu o꞉lia꞉ babuma꞉niki kegeo꞉. 20 [o]Ko꞉sega iyo꞉ bubakiyo꞉, no꞉ mogago꞉ a꞉no꞉lia꞉ madalilo꞉ dinali sa꞉lan kalu o꞉lia꞉ a꞉no꞉ ta꞉lia꞉sa꞉ga꞉, a꞉la꞉yo꞉ mela꞉no꞉wo꞉ o꞉lab a꞉naka, u wanalo꞉ hudakilo꞉ wa꞉sowala꞉lab de hen a꞉na to꞉lolo꞉. Tamin amio꞉ kaluka꞉isale nolo꞉ no꞉ moga꞉go꞉wa꞉ ele ba꞉ba꞉no꞉wo꞉ dia꞉ga꞉, e misido꞉ momado꞉ a꞉no꞉ wabulu sa꞉la꞉sen ko꞉lo꞉, iliyo꞉ dikidakiyo꞉, madalilo꞉ dinali sa꞉lan kalu eyo꞉, no꞉ mogago꞉ a꞉ma꞉ wiya ilikiyo꞉, molo ha꞉na꞉no꞉ nolo꞉ a꞉na dimido꞉. 21 A꞉la꞉ta꞉ga꞉ kalu ho꞉s wa꞉l amilo꞉ sen a꞉ma꞉ mego꞉f amilo꞉ helebesi sambo miyo꞉ a꞉ma꞉yo꞉ no mogago꞉wa꞉ ame kalu a꞉no꞉ tambo yasala꞉ ko꞉lo꞉, o꞉ba꞉ i a꞉no꞉ tambo ya꞉ga꞉, ame kaluwa꞉ howo꞉ besagali mo꞉no꞉.

<- Kalaba To 18Kalaba To 20 ->