8 Ma꞉mul kalu fa꞉la꞉lamel a꞉ma꞉yo꞉ fafo elo꞉wo꞉ ofa kolodabikiyo꞉, ofo꞉ de o꞉ngo꞉ fa꞉la꞉dowaki halaido꞉ ta꞉ndakiyo꞉, kaluka꞉isaleyo꞉ deya꞉lo꞉ mo꞉no꞉ o꞉ngo꞉ dowo꞉. 9 [d]Hida꞉yo꞉ alan we, Gode eyo꞉ bo꞉fo꞉len ko꞉lo꞉, kaluka꞉isaleyo꞉ ofa꞉yo꞉ de o꞉ngo꞉ma꞉ so꞉dabikiyo꞉, iliyo꞉ Godeyo꞉ wa꞉sa꞉le sio꞉. Ko꞉sega iliyo꞉ Godemo꞉wo꞉ mo꞉foga꞉le sa꞉laki, a꞉la꞉ta꞉ga꞉ e wiyo꞉ mo꞉dulugu sio꞉.

10 [e]Ma꞉mul kalu bi a꞉ma꞉yo꞉ fafo elo꞉wo꞉ no꞉ mogago꞉wa꞉ misa꞉ kalulo꞉ sa꞉sen fofodo꞉ wa꞉l a꞉na kolodabiki, elo꞉ bo꞉fo꞉len hen a꞉namio꞉ sololi fa꞉la꞉dowo꞉. Kaluka꞉isale a꞉namilo꞉ sen a꞉no꞉ nagalo꞉wo꞉ alan diakiyo꞉, eano꞉ inin gegede mo꞉no꞉. 11 I amilo꞉ nagalo꞉ alan diab o꞉lia꞉ ogen fa꞉la꞉dowab a꞉no꞉ ba꞉dakiyo꞉, Hebenelo꞉ Gode sab o꞉mo꞉wo꞉ wa꞉sa꞉le sio꞉. Ko꞉sega ililo꞉ dimida꞉sen a꞉no꞉ ko꞉lo꞉ foga꞉le sa꞉ma꞉no꞉wo꞉ mo꞉asulo꞉.

12 [f]Ma꞉mula꞉ kalu do꞉go꞉fe a꞉ma꞉yo꞉ fafo elo꞉wo꞉ ho꞉n alan Yufuletis a꞉namio꞉ kolodo꞉. Misa꞉ kalu, ofdo꞉ yando꞉ doba꞉da꞉lo꞉ mia꞉no꞉wo꞉ a꞉ma꞉ togo꞉ dimidalima꞉ki, ho꞉n a꞉no꞉ tambo kalaleli. 13 A꞉la꞉ta꞉ga꞉ niyo꞉ a꞉na bo꞉fo꞉len amio꞉ mama mogago꞉ otaleno꞉, wa꞉la꞉no꞉ o꞉ngo꞉ ko꞉lo꞉ fa꞉la꞉dowabi ba꞉ba꞉. Iyo꞉ sowa꞉ mogago꞉ o꞉lia꞉ no꞉ mogago꞉ o꞉lia꞉, a꞉la꞉ta꞉ga꞉ madalilo꞉ dinali sa꞉lan kalu o꞉lia꞉ma꞉ mego꞉fa fa꞉la꞉dowo꞉. 14 [g]Mama mogago꞉ se otalen a꞉ma꞉yo꞉ molo ha꞉na꞉no꞉ dimidakiyo꞉, henfelo꞉ amilo꞉ misa꞉ kalu i a꞉no꞉ tambolo꞉wa ane. Gode Alana꞉lo꞉ mo꞉walilima꞉no꞉ ho꞉len a꞉namio꞉, bubo꞉wo꞉ alan fa꞉la꞉doma꞉no꞉ ko꞉lo꞉, ame kaluwo꞉ tambo kegenema꞉ki, mama mogago꞉ a꞉ma꞉yo꞉ misa꞉ kalulo꞉wa sa꞉ma꞉ni ane. 15 [h]Ko꞉sega iyo꞉ elo꞉ mia꞉no꞉ ho꞉leno꞉ mo꞉asuluma꞉ib a꞉lakiyo꞉, Ya꞉su eyo꞉ a꞉la꞉sio꞉, “Dabuma! Ne afalo꞉ dian kalu o꞉ngo꞉ ko꞉lo꞉ mia꞉nigo꞉l. Kaluka꞉isale abeyo꞉ sikaga siliki, helebeso꞉go꞉ dimidalia꞉ga꞉lo꞉ yasilab a꞉no꞉ gio꞉ hagulabowo꞉ mo꞉ha꞉naki mo꞉sendeloma꞉ib. Gi a꞉no꞉ sagale alifa꞉ib” a꞉la꞉sio꞉. 16 [i]A꞉la꞉ta꞉ga꞉ mama mogago꞉ a꞉ma꞉yo꞉ misa꞉ kalu a꞉no꞉ tambo kegenelia꞉ ha꞉na꞉ga꞉, Hibulu towo꞉ Amagedon a꞉la꞉do꞉ sa꞉lab hen a꞉na kegeo꞉.

17 Ma꞉mul kalu dom a꞉ma꞉yo꞉ fafo elo꞉wo꞉ akina kolodabiki, to nowo꞉ Godeya꞉ malilo꞉ ayamilo꞉ misa꞉ kalulo꞉ mesa꞉no꞉ fofodo꞉ a꞉na a꞉la꞉ta꞉ga꞉ halale sa꞉laki a꞉la꞉sio꞉, “Edaka꞉!” 18 [j]A꞉la꞉sa꞉labikiyo꞉ wabelego꞉ tili tandeaki, gun bosolakiyo꞉, fowo꞉ alan dowa꞉sa꞉ga꞉, hiniyo꞉ alan tilo꞉. Hini a꞉no꞉ mada alan tilo꞉ ko꞉lo꞉, kaluka꞉isale henfelo꞉ wenamilo꞉ tamin amilo꞉ sen a꞉ma꞉yo꞉ dimido꞉ wengo꞉wo꞉ mada mo꞉ba꞉ba꞉. 19 [k]Hini alan a꞉ma꞉yo꞉ Babilon amisa꞉n alan a꞉no꞉ otalen alobanalia꞉ difa꞉. A꞉la꞉ta꞉ga꞉ henfelo꞉ amilo꞉ amisa꞉n ko꞉li ko꞉lilo꞉ delen a꞉no꞉ mada bidila꞉. Gode eyo꞉ Babilon amisa꞉n alan a꞉ma꞉lo꞉ man mogago꞉ dimido꞉ a꞉no꞉ asulakiyo꞉, eyo꞉ kulufa꞉yo꞉ elo꞉wo꞉ aluna꞉ ho꞉n o꞉ngo꞉ ko꞉lo꞉ go꞉fo꞉ amilo꞉ wasulia꞉ga꞉ wa꞉lifo꞉ a꞉no꞉ imo꞉ maiya꞉ki dimi. A꞉la꞉go꞉ko꞉lo꞉ iyo꞉ Godeya꞉ kulufa꞉yo꞉wo꞉ ba꞉dab. 20 [l]A꞉la꞉gabikiyo꞉ ho꞉na꞉lo꞉ hegefa꞉ hen a꞉no꞉ ho꞉bo꞉le ha꞉naki, hen misio꞉ a꞉no꞉lo꞉ kelege dowo꞉. 21 [m]Akin halona a꞉la꞉ta꞉ga꞉yo꞉ ais hido꞉ alan a꞉no꞉ henfelo꞉ wena tia꞉. Ais a꞉ma꞉ hida꞉yo꞉wo꞉ 45 kilo꞉ o꞉ngo꞉ ko꞉lo꞉ dowo꞉. Ais a꞉no꞉ kaluka꞉isale wa꞉la ti alilabikiyo꞉, iyo꞉ nagalo꞉wo꞉ mada alan diakiyo꞉, Godeyo꞉ wa꞉sa꞉le sio꞉.