Ya꞉suwa꞉ Eneno꞉ Yo꞉nbo꞉wo꞉ Fanda Widabikiyo꞉,

Kalaba To
We A꞉na Sa꞉sa꞉lo꞉
Asuluma꞉no꞉ towo꞉ we
Bugo꞉ we Yo꞉n e sa꞉sa꞉lo꞉. O꞉g ho꞉len a꞉namio꞉, Keliso kaluka꞉isaleyo꞉ hida꞉yo꞉ nagalo꞉ alan diab ko꞉lo꞉, Yo꞉n eyo꞉ ili tilidabuwo꞉ halaido꞉ doma꞉ki, to we a꞉na sa꞉sa꞉lo꞉. A꞉la꞉ta꞉ga꞉ Gode eyo꞉ kelego꞉ tif amilo꞉ fa꞉la꞉doma꞉no꞉ a꞉no꞉ Yo꞉nbo꞉ wido꞉ ko꞉lo꞉, Yo꞉n eyo꞉ Keliso kaluka꞉isalemo꞉wo꞉ fanda widakiyo꞉, bugo꞉ we a꞉na sa꞉sa꞉lo꞉. Ya꞉su Keliso e ili misa꞉ alandeyo꞉ e ko꞉lo꞉, iliyo꞉ e amio꞉ mada halale tilidabuma꞉ki sa꞉sa꞉lo꞉.
Bugo꞉ amilo꞉ sa꞉sa꞉lo꞉ wema꞉yo꞉, Keliso kaluka꞉isaleyo꞉ halale alitaki, hida꞉yo꞉ alan fa꞉la꞉dowab amio꞉ iyo꞉ tininima꞉ki sa꞉sa꞉lo꞉. Bugo꞉ wema꞉lo꞉ bale sio꞉ modo꞉ ko꞉li ko꞉lilo꞉ da꞉fe sio꞉ a꞉no꞉, tif amilo꞉ fa꞉la꞉doma꞉nigab a꞉no꞉ ko꞉lo꞉ sa꞉sa꞉lo꞉.
Bugo꞉ wema꞉lo꞉ to alande ko꞉lo꞉ sio꞉wo꞉ we. Ya꞉su Kelisowo꞉ alandeyo꞉ e ko꞉lo꞉, halaido꞉ elo꞉ma꞉yo꞉ Gode o꞉lia꞉lo꞉ gisdo꞉ diab kalu a꞉no꞉ tambo sana to꞉loma꞉ib. Ya꞉su Keliso E nanogo꞉ dia꞉i ha꞉na꞉la꞉ga꞉ ditandalab amio꞉, Gode eyo꞉ kaluka꞉isale Ya꞉su amilo꞉ halale dowa꞉i ha꞉na꞉la꞉ga꞉lo꞉ tilidabuwo꞉ mo꞉ta꞉tab o꞉mo꞉wo꞉ mewa꞉lo꞉ dimia꞉ib. Kaluka꞉isale i a꞉no꞉ Gode o꞉lia꞉ dowaliki, iyo꞉ nagalo꞉wo꞉ mo꞉ba꞉daki nafale mesa꞉ib. Mo꞉wo꞉ Gode eyo꞉ kelego꞉wo꞉ tambo ho꞉gi nafale a꞉ta꞉fa꞉ib.

1 Kala 22.6Kalaba to we wo꞉no꞉le delen ko꞉lo꞉, tif amilo꞉ fa꞉la꞉doma꞉nigab a꞉no꞉ Ya꞉su Keliso eyo꞉ ene nanogdo꞉ dian kalumo꞉ walama꞉ki, Gode eyo꞉ emo꞉ wido꞉. A꞉la꞉ta꞉ga꞉ to a꞉no꞉ walama꞉kiyo꞉ Ya꞉su eyo꞉ ma꞉mul kalu nowo꞉ ene nanogdo꞉ dian kalu Yo꞉nbo꞉ walama꞉ki iliga꞉fo꞉. 2 Yo꞉n elo꞉ ho꞉le ba꞉ba꞉ a꞉no꞉ tambo hendeleka꞉ a꞉la꞉liki widakiyo꞉, Godeya꞉ to o꞉lia꞉ Ya꞉su Kelisowa꞉lo꞉ to wido꞉ o꞉lia꞉ a꞉no꞉ ko꞉lo꞉ sio꞉. 3 Kala 22.7,10Kelego꞉ welo꞉ fa꞉la꞉doma꞉no꞉ ho꞉len a꞉no꞉ ko꞉na꞉ma dowo꞉ ko꞉lo꞉, kaluka꞉isale abeyo꞉ dinali sio꞉ to sa꞉sa꞉lo꞉ welo꞉ agelakilo꞉ kudu ha꞉nab a꞉no꞉ Gode eyo꞉ iyo꞉ nafale mesea꞉ki ta꞉fa꞉ib.

4-5 Kis 3.14-15,Kala 3.1, 4.5 Song 89.27, Kolo 1.18Ne Yo꞉n ko꞉lo꞉, niyo꞉ to we A꞉sia us amilo꞉ sa꞉s dom a꞉la꞉fo꞉ a꞉lab o꞉mo꞉wo꞉ sa꞉sa꞉liga꞉felo꞉.

Gode e tamin amio꞉ elen. O꞉go꞉lo꞉ e mela꞉no꞉ a꞉lab, a꞉la꞉ta꞉ga꞉ tif amio꞉ e mia꞉ib. Ene kanulan man o꞉lia꞉ ha꞉sa dowan man o꞉lia꞉yo꞉ gio꞉ dima꞉ki dulugu so꞉lo꞉l. A꞉la꞉ta꞉ga꞉ Ya꞉su o꞉lia꞉ mama nafa dom a꞉la꞉fo꞉ o꞉lia꞉ma꞉ kanulan man o꞉lia꞉ ha꞉sa dowan man a꞉no꞉lia꞉yo꞉ gio꞉ dima꞉ki dulugu so꞉lo꞉l. Ya꞉su Kelisowo꞉ e Godeya꞉ to hendelelo꞉ sa꞉lano꞉ e. Sowa꞉sa꞉ga꞉lo꞉ a꞉ma꞉la꞉lo꞉ dasilan a꞉no꞉ Ya꞉su e ko꞉le dimido꞉. A꞉la꞉ta꞉ga꞉ henfelo꞉ wenamilo꞉ misa꞉ alan dosdo꞉ a꞉labdo꞉ bo꞉fo꞉lab alandeyo꞉ Ya꞉su e.

Ya꞉su eyo꞉ kaluka꞉isale nimo꞉wo꞉ ha꞉fo꞉ disa꞉laki, e sowakilo꞉ ho꞉bo꞉ ko꞉lo꞉ tulo꞉ a꞉ma꞉yo꞉ nili mogago꞉wo꞉ hala꞉sa꞉ga꞉ ga꞉li mesea꞉ki ta꞉fo꞉. 6 A꞉la꞉ta꞉ga꞉ eyo꞉ nio꞉ so꞉lo꞉ imilise ta꞉ta꞉ga꞉yo꞉, nio꞉ ene bobalo꞉ so꞉mea꞉sen kalu dowaki, Iya Godeya꞉ nanog dimidama꞉ki ta꞉fo꞉. Ya꞉su Kelisowa꞉ ene halaido꞉ o꞉lia꞉ ene ho꞉len fo꞉fo꞉lesodo꞉ o꞉lia꞉ a꞉na dowaki, e ko꞉ngo꞉ mela꞉no꞉ mela꞉no꞉ mela꞉ib. Hendele o꞉m.

7 Dabuma. Ya꞉su e kola꞉ wa꞉l amilo꞉ yab a꞉no꞉,

kaluka꞉isaleyo꞉ tambo ini siya꞉yo꞉ ba꞉ba꞉ib.

A꞉la꞉ta꞉ga꞉, elo꞉ so꞉no꞉ kalu i a꞉ma꞉yo꞉lo꞉ ba꞉ba꞉ib.

Henfelo꞉ kaluka꞉isaleyo꞉ tambo Ya꞉su e ba꞉dakiyo꞉ ya꞉foloma꞉ib.

A꞉la꞉bo꞉ hendele fa꞉la꞉doma꞉ib. Hendele o꞉m.

8 Kala 21.6,22.13Gode Alan eyo꞉ a꞉la꞉sio꞉, “Tamindeyo꞉ ne, a꞉la꞉ta꞉ga꞉ tifo꞉ ne. Ne tamin amio꞉ elen, o꞉go꞉lo꞉ mela꞉no꞉ o꞉lo꞉l, a꞉la꞉ta꞉ga꞉ tif amio꞉ ne mia꞉no꞉. No꞉no꞉n ne amio꞉ halaido꞉leyo꞉ mada alan ko꞉lo꞉lab.”

Yo꞉n eyo꞉ Ya꞉suwo꞉ ho꞉le ba꞉ba꞉

9 Ne Yo꞉n, gi gaowo꞉ ne. Nio꞉ Ya꞉suwa꞉ ha꞉ga dowaki, hida꞉yo꞉wo꞉ dia꞉li ha꞉na꞉la꞉ga꞉ halale kagayo꞉l. Ne Godeya꞉ towo꞉ widaki a꞉la꞉ta꞉ga꞉ Ya꞉su amio꞉ tilidabuka꞉ a꞉la꞉li wida꞉len amio꞉, ne ta꞉lia꞉sa꞉ga꞉ ho꞉na꞉lo꞉ hegefa꞉ hen Batamos a꞉na to꞉loma꞉ni mio꞉ ko꞉lo꞉ so꞉l. 10 Ho꞉len dom a꞉namio꞉, Godeya꞉ Mamayo꞉ ne amio꞉ dowabikiyo꞉, ni fa꞉s amio꞉ towo꞉ halale sa꞉lakiyo꞉, belo so꞉no꞉ o꞉ngo꞉ ko꞉lo꞉ dabu. 11 A꞉na sa꞉lakiyo꞉ a꞉la꞉sio꞉, “Gilo꞉ ba꞉dab a꞉no꞉ mo꞉fo꞉s amio꞉ sa꞉sa꞉la꞉sa꞉ga꞉, sa꞉s dom a꞉la꞉fo꞉ a꞉na iliga꞉foma. A꞉fesa꞉smo꞉, Semenamo꞉, Begamumo꞉, Taiatailamo꞉, Sadismo꞉, Filado꞉fiamo꞉, a꞉la꞉ta꞉ga꞉ Laodisiamo꞉ a꞉ma꞉no꞉ sa꞉sa꞉lima.”

12-13 Dan 7.13,10.5To a꞉no꞉ sa꞉labi, ne nodola꞉sa꞉ga꞉ nemo꞉lo꞉ tolo꞉ sa꞉lab a꞉namida꞉ ba꞉ba꞉ amio꞉, nafa dom a꞉la꞉fo꞉ go꞉l amilo꞉ dimido꞉ a꞉no꞉ ko꞉lo꞉ elena ba꞉ba꞉. Nafa dom a꞉la꞉fo꞉ us a꞉namio꞉ kalule o꞉ngo꞉ kagafo꞉labi ba꞉ba꞉. E helebeso꞉g samboka tigili sa꞉ga꞉la꞉sa꞉ga꞉, wa꞉l amio꞉ bul go꞉l amilo꞉ dimido꞉ a꞉no꞉ ko꞉lo꞉ kafo꞉labi ba꞉ba꞉. 14 Ese 43.2,Dan 7.9, 10.6, Kala 2.18, 19.12Ene misa꞉ o꞉lia꞉ misa꞉ fo꞉no꞉ mada kol ho꞉lo꞉ o꞉ngo꞉, a꞉la꞉ta꞉ga꞉ si elo꞉wo꞉ de wa꞉sowayo꞉ o꞉ngo꞉ ko꞉lo꞉ ba꞉ba꞉. 15 Gib elo꞉wo꞉ mada malilo꞉ fo꞉fo꞉lesodo꞉, go꞉fo꞉ ki ko꞉lo꞉ de amilo꞉ so꞉da꞉sa꞉ga꞉lo꞉ malilo꞉ ta꞉fo꞉ o꞉ngo꞉ ba꞉ba꞉. A꞉la꞉ta꞉ga꞉ to elo꞉ tola꞉yo꞉, ho꞉nsa gu amilo꞉ fodo꞉ o꞉ngo꞉ dabu. 16 Hibu 4.12,Kala 2.12, 19.15Ene dagi ililib amio꞉ tamin dom a꞉la꞉fo꞉ ko꞉lo꞉ ta꞉li dofo꞉labi ba꞉ba꞉. A꞉la꞉ta꞉ga꞉ ene mego꞉f amio꞉ helebesi sambo nodowo꞉lo꞉ miya꞉b, nodowo꞉lo꞉ miya꞉b o꞉ngo꞉ ko꞉lo꞉ handalowabiki ba꞉ba꞉. A꞉la꞉ta꞉ga꞉ e wo꞉lokan a꞉no꞉ fo꞉fo꞉lesodaki, of yan o꞉ngo꞉ ba꞉ba꞉.

17 Ais 44.6,48.12, Kala 2.8, 22.13Niyo꞉ e ba꞉da꞉sa꞉ga꞉yo꞉, e gido꞉fo꞉lo꞉wa sulufo꞉ tindaki, sowo꞉ kalu o꞉ngo꞉ dowabiyo꞉, eyo꞉ ene dagi ililibo꞉ ni wa꞉la dia꞉fo꞉liki a꞉la꞉sio꞉, “Ge tagila꞉so꞉bo. Tamindeyo꞉ ne, a꞉la꞉ta꞉ga꞉ tifo꞉lo꞉ ne. 18 Ne ko꞉ngo꞉ ka mela꞉no꞉wo꞉ ne. Ne sowa꞉sa꞉ga꞉ a꞉ma꞉la꞉ a꞉dasilia꞉ga꞉ mela꞉no꞉ mela꞉no꞉ ko꞉ngo꞉ so꞉l. Dane ane hen a꞉no꞉ ni bo꞉fo꞉lo꞉l, a꞉la꞉ta꞉ga꞉ sowo꞉lo꞉ dasima꞉kilo꞉ mela꞉no꞉lo꞉ a꞉dimia꞉no꞉ halaido꞉wo꞉ ne.

19 “A꞉la꞉ma꞉ika꞉ya, o꞉gdo꞉ gilo꞉ ba꞉dab a꞉no꞉ sa꞉sa꞉laki, o꞉gdo꞉ fa꞉la꞉dowab o꞉lia꞉ tif amilo꞉ fa꞉la꞉doma꞉ib a꞉no꞉lia꞉yo꞉ giyo꞉ sa꞉sa꞉lima. 20 Ni dagi ililib amilo꞉ tamin dom a꞉la꞉fo꞉ ba꞉ba꞉ a꞉no꞉lia꞉, nafa dom a꞉la꞉fo꞉ go꞉l amilo꞉ dimido꞉ ba꞉ba꞉ a꞉no꞉lia꞉yo꞉, to wo꞉no꞉lelo꞉ delen a꞉ma꞉ ha꞉go꞉ we. Tamin dom a꞉la꞉fo꞉ a꞉ma꞉ ha꞉go꞉ we. Sa꞉s dom a꞉la꞉fo꞉ o꞉lo꞉ bo꞉fo꞉lowan ma꞉mula꞉ kalu dom a꞉la꞉fo꞉ a꞉no꞉ ko꞉lo꞉ da꞉feaki sio꞉. Nafa dom a꞉la꞉fo꞉ a꞉no꞉, sa꞉s dom a꞉la꞉fo꞉ a꞉no꞉ ko꞉lo꞉ da꞉feaki sio꞉.”

Kalaba To 2 ->