17[k]Ya꞉su eyo꞉ towo꞉ a꞉la꞉sio꞉, “Mo꞉sa꞉sa꞉ ele difa꞉ o꞉lia꞉ dinali sa꞉lana꞉lo꞉ to difa꞉ a꞉no꞉lia꞉yo꞉ niyo꞉ dila꞉ma꞉ mio꞉ a꞉la꞉bo꞉ giliyo꞉ asula꞉so꞉bo. Ne kolo꞉ mio꞉ we, to a꞉no꞉ kolo꞉ ilili alifa꞉ni mio꞉. 18[l]Niyo꞉ to we gimo꞉wo꞉ hendele so꞉lo꞉l. Akin o꞉lia꞉ henfelo꞉ o꞉lia꞉yo꞉ semo꞉ kelege dowab amio꞉, Godeya꞉ ele to difa꞉ a꞉namio꞉ to ha꞉lula꞉su heb sa꞉sa꞉lo꞉ nowo꞉ mada mo꞉kelege doma꞉ib. To a꞉no꞉ tambo o꞉semo꞉ ilili alitab amio꞉ o꞉dofo꞉mela꞉ib. 19[m]A꞉la꞉go꞉ko꞉lo꞉ kalu abeyo꞉ ele difa꞉ a꞉namio꞉ to ha꞉lula꞉su nowo꞉ o꞉go꞉sa꞉sa꞉ga꞉, kalu nolo꞉lo꞉ to a꞉no꞉ o꞉go꞉sema꞉ki widalega, kalu a꞉no꞉ Godeya꞉lo꞉ bo꞉fo꞉mela꞉no꞉ hen a꞉namio꞉ e wilo꞉ma doma꞉ib. Ko꞉sega kalu abeyo꞉ ele to difa꞉ a꞉no꞉ dinafa kudu ha꞉na꞉ga꞉, nolbo꞉wo꞉ dinafa wida꞉lalega, Godeya꞉lo꞉ bo꞉fo꞉mela꞉no꞉ hen a꞉namio꞉ e wi alan dia꞉ib. 20 Niyo꞉ gimo꞉wo꞉ a꞉la꞉so꞉lo꞉l. Man digalo꞉ gililo꞉ dimida꞉lab a꞉ma꞉yo꞉, Fa꞉lisi kalu o꞉lia꞉ elelo꞉ wida꞉sen kalu o꞉lia꞉ma꞉lo꞉ man digalo꞉ dimida꞉lab a꞉no꞉ mo꞉tininilalega, gio꞉ Godeya꞉lo꞉ bo꞉fo꞉mela꞉no꞉ hen a꞉namio꞉ mada mo꞉tiha꞉na꞉ib.
Kaluwo꞉ sana sowa꞉so꞉bo a꞉la꞉wido꞉
21[n]“Tamin amilo꞉ gili ma꞉mumo꞉lo꞉ to saefa꞉ a꞉no꞉ gio꞉ dabu ko꞉lo꞉ to a꞉no꞉ we, ‘Kalu nowo꞉ sana sowa꞉so꞉bo. Kaluka꞉isale abeyo꞉ nowo꞉ sana sowab a꞉no꞉, e mo꞉walila꞉sa꞉ga꞉ hida꞉yo꞉ dia꞉ib’ a꞉la꞉sio꞉. 22[o]Ko꞉sega niyo꞉ towo꞉ gimo꞉wo꞉ a꞉la꞉so꞉lo꞉l. Kaluka꞉isale abeyo꞉ ene ao nowo꞉mbo꞉lo꞉ kulufa꞉yab a꞉no꞉ elo꞉ mo꞉walila꞉sa꞉ga꞉ hida꞉yo꞉ dia꞉ib. A꞉la꞉ta꞉ga꞉ to nowo꞉ a꞉la꞉so꞉lo꞉l. Kaluka꞉isale abeyo꞉ ene ao nowo꞉mbo꞉lo꞉ towo꞉ fisa꞉le sa꞉lab a꞉no꞉, ganisolowa꞉ siwa꞉la kagama꞉ib. A꞉la꞉ta꞉ga꞉ kaluka꞉isale abeyo꞉ ene ao nowo꞉mbo꞉lo꞉ wa꞉la꞉ sana sa꞉lab a꞉no꞉ de hena sandifa꞉ib.
23-24 [p]“A꞉la꞉fo꞉ko꞉lo꞉ ge Godemo꞉lo꞉ bobalo꞉ so꞉mea꞉sen mu gulu a꞉namio꞉ boba kelego꞉wo꞉ Godemo꞉ dimia꞉no꞉ dowa꞉sena, gao noma꞉lo꞉ gilo꞉ emo꞉lo꞉ hala dimido꞉wo꞉ o꞉a꞉la꞉b a꞉la꞉bo꞉ asulalega, ge boba kelego꞉wo꞉ a꞉naka dia꞉ta꞉ga꞉ hamana. Ge gaomo꞉wo꞉ tamin amio꞉ o꞉ko꞉le sa꞉ma꞉ ha꞉na꞉sa꞉ga꞉, e o꞉lia꞉ digalela꞉sa꞉ga꞉ go꞉go꞉dela꞉bi. Go꞉go꞉dela꞉sa꞉ga꞉yo꞉, ge a꞉ma꞉la꞉ ya꞉ga꞉ Godemo꞉wo꞉ bobayo꞉ a꞉na dimea꞉bi. 25 Kalu noma꞉yo꞉ ge mo꞉walilima꞉no꞉ a꞉la꞉ta꞉ga꞉ tililia꞉ ha꞉nalega, toga o꞉ha꞉na꞉ga꞉ ha꞉nakiyo꞉, giyo꞉ e o꞉lia꞉yo꞉ bo꞉bo꞉ge dinafala꞉bi. A꞉la꞉bo꞉ mo꞉dimidalega eyo꞉ aloba꞉dan kaluwa꞉ dagiya dia꞉fa꞉ib. A꞉la꞉galikiyo꞉, aloba꞉dan kalu eyo꞉ da꞉la꞉di kaluwa꞉ dagiya dia꞉fa꞉ib. A꞉la꞉ta꞉ga꞉ da꞉la꞉di kaluwa꞉yo꞉ ge dibolowa to꞉loma꞉ib. 26 Niyo꞉ gemo꞉wo꞉ hendele so꞉lo꞉l. Ge dibolo a kabilo꞉ seno꞉, su mole da꞉fe sio꞉ a꞉no꞉ tambo semo꞉ kedetalikiyo꞉, ge mada mo꞉sili alifa꞉ib.”
Ga afa dian mano꞉ ko꞉lo꞉ sio꞉
27[q]Ya꞉suwa꞉ to heb a꞉kudu sa꞉lakiyo꞉ a꞉la꞉sio꞉, “Gili ma꞉mu ima꞉lo꞉ to saefa꞉ a꞉no꞉ gio꞉ dabu ko꞉lo꞉, to nowo꞉ we, ‘Uwo꞉wo꞉ dia꞉so꞉bo.’ 28 Ko꞉sega niyo꞉ gimo꞉wo꞉ towo꞉ a꞉la꞉so꞉lo꞉l. Kalu abeyo꞉ ga nowo꞉ ba꞉da꞉sa꞉ga꞉, ga a꞉no꞉ nelo꞉ afa dimo꞉losa꞉ a꞉la꞉bo꞉ asulalega, kalu a꞉ma꞉yo꞉ ga a꞉no꞉ ene asulo꞉ amio꞉ o꞉ma afa di ko꞉lo꞉ a꞉lab. 29[r]A꞉la꞉fo꞉ko꞉lo꞉ gi si ililib a꞉ma꞉yo꞉, Godeya꞉ digalo꞉ man kudu ha꞉na꞉no꞉wo꞉ ka꞉lalega, si a꞉no꞉ dugulia꞉ga꞉ sandifoma. Do꞉mo꞉ gilo꞉ ko꞉ de hen amio꞉ tambo sanditabena꞉kiyo꞉, do꞉mo꞉ heb nowo꞉ dilalega a꞉no꞉ o꞉li doma꞉ib. 30[s]A꞉la꞉ta꞉ga꞉ gi dagi ililiba꞉yo꞉ Godeya꞉ digalo꞉ man kudu ha꞉na꞉no꞉wo꞉ ka꞉lalega, dagi a꞉no꞉ gedelia꞉ga꞉ sandifoma. Do꞉mo꞉ gilo꞉ ko de hen amio꞉ tambo ha꞉nabena꞉kiyo꞉, do꞉mo꞉ heb nowo꞉ gedelalega, a꞉no꞉ o꞉li doma꞉ib.”
Ga di ta꞉tan man a꞉no꞉ ko꞉lo꞉ sio꞉
Madi 19.9, Mak 10.11,12, Luk 16.18
31[t]Ya꞉suwa꞉ to heb a꞉kudu sa꞉lakiyo꞉ a꞉la꞉sio꞉, “Gili ma꞉muwa꞉yo꞉ a꞉la꞉saefa꞉, ‘Kalu abeyo꞉ ga di enedo꞉ a꞉no꞉ ta꞉fa꞉nikiyo꞉, eyo꞉ “Niyo꞉ ga we ta꞉fo꞉” a꞉la꞉bo꞉ mo꞉fo꞉s sa꞉sa꞉lo꞉wo꞉ gedea꞉sa꞉ga꞉yo꞉, gamo꞉wo꞉ dimiaki ta꞉ta꞉bi.’ 32[u]Ko꞉sega niyo꞉ gimo꞉wo꞉ towo꞉ a꞉la꞉so꞉lo꞉l. Kalu abeyo꞉ ingayo꞉ uwo꞉ dia꞉nikiyo꞉ mo꞉ane ko꞉sega, eyo꞉ ga a꞉no꞉ ka ta꞉talega, kalu a꞉ma꞉yo꞉ inga a꞉no꞉ uwo꞉wo꞉ dima꞉ki ta꞉takigab. A꞉la꞉ta꞉ga꞉ kalu abeyo꞉ ga ta꞉fo꞉ elen a꞉no꞉ ko꞉lo꞉ a꞉dialega, e uwo꞉ dia꞉lab.”
Elela꞉ sa꞉lan aumbo꞉ dimida꞉so꞉bo
33[v]Ya꞉suwa꞉ to heb a꞉kudu sa꞉lakiyo꞉ a꞉la꞉sio꞉. “Tamin amilo꞉ gili ma꞉mumo꞉lo꞉ to saefa꞉ a꞉no꞉ gio꞉ dabu ko꞉lo꞉ to nowo꞉ we. ‘Giliyo꞉ wo꞉lokano꞉ golakiyo꞉, Godemo꞉ dinali sa꞉lalega, giliyo꞉ towo꞉ madaliyo꞉ sa꞉la꞉so꞉bo. To gililo꞉ Kalu Alanbo꞉lo꞉ dinali sio꞉ aumbo꞉ hendele dimidaki kudu ha꞉na꞉bi.’ 34[w]Ko꞉sega niyo꞉ gimo꞉wo꞉ towo꞉ a꞉la꞉so꞉lo꞉l. Nolba꞉yo꞉ to gilo꞉ sa꞉lab a꞉no꞉ hendele a꞉la꞉tili asuluma꞉kiyo꞉, giliyo꞉ kelego꞉ wi no amio꞉ halale alitakiyo꞉, dinali sa꞉la꞉so꞉bo. Giliyo꞉ towo꞉ halale alitaki Hebene wi sa꞉lakiyo꞉, dinali sa꞉la꞉so꞉bo. Mo꞉wo꞉ Hebene a꞉no꞉ Godelo꞉ mesa꞉no꞉ i fofodo꞉ halaido꞉wo꞉ o꞉m. 35[x]A꞉la꞉ta꞉ga꞉ giliyo꞉ towo꞉ halale alitaki henfelo꞉ wema꞉ wi sa꞉lakiyo꞉, dinali sa꞉la꞉so꞉bo. Mo꞉wo꞉ henfelo꞉ we Godeya꞉ eno꞉ ko꞉lo꞉, ene gido꞉fo꞉lo꞉ dia꞉fo꞉labo꞉ o꞉m. Ya꞉lusalema꞉ wi sa꞉lakiyo꞉, dinali sa꞉la꞉so꞉bo. Mo꞉wo꞉ Ya꞉lusalem a꞉no꞉ Misa꞉ Kalu Alana꞉ ene amisa꞉no꞉ o꞉m. 36 A꞉la꞉ta꞉ga꞉ wo꞉lokano꞉ golakiyo꞉ towo꞉ dinali sa꞉la꞉so꞉bo. Mo꞉wo꞉ gi misa꞉ a꞉namio꞉, misa꞉ fo꞉n ko heyo꞉wa꞉le ululo꞉wa꞉le fa꞉la꞉doma꞉kiyo꞉ giyo꞉ mada mo꞉dimidama꞉ib. 37 Towo꞉ sa꞉lakiyo꞉, ‘A꞉’ a꞉lalega, o ‘A’ a꞉lalega, to a꞉no꞉ko꞉ hende sa꞉laki auma꞉ib. To nol ko꞉lo꞉ a꞉kudu sa꞉lab a꞉no꞉ mogago꞉lo꞉ dimida꞉sen Sa꞉da꞉na꞉ eya a꞉la꞉ta꞉ga꞉ fa꞉la꞉dowab.”