1 Ya꞉su eyo꞉ bale sio꞉ we enedo꞉ tiliwida꞉sen kalu imo꞉ widakiyo꞉ a꞉la꞉sio꞉, “Kelego꞉wo꞉ modo꞉lo꞉ da꞉lab kalu nowo꞉ elen ko꞉lo꞉, ene kelego꞉lo꞉ bo꞉fo꞉mela꞉no꞉ nanog kalu nowo꞉ a꞉na ta꞉fo꞉. Ho꞉len no amio꞉, kalu nowo꞉ elo꞉wa ya꞉sa꞉ga꞉yo꞉, gi nanogdo꞉ dian kalu a꞉ma꞉yo꞉ gi kelego꞉wo꞉ wala꞉lab a꞉la꞉liki sa꞉ma꞉ni mio꞉. 2 A꞉la꞉sa꞉labiki eyo꞉ nanogdo꞉ dian kalu a꞉no꞉ ho꞉lelia꞉sa꞉ga꞉, emo꞉wo꞉ a꞉la꞉sio꞉. ‘Gilo꞉ hala dimida꞉len a꞉no꞉ ne dabu ko꞉lo꞉ waigo꞉wo꞉? Niyo꞉ ge dugula꞉ma꞉no꞉ ko꞉lo꞉, ne kelego꞉ gilo꞉ bo꞉fo꞉len a꞉no꞉ tambo fanda sa꞉sa꞉la꞉sa꞉ga꞉, nemo꞉wo꞉ dimia꞉bi.’

3 “A꞉la꞉sa꞉labiki nanogdo꞉ dian kalu eyo꞉ enena꞉ma꞉la꞉ asulaki a꞉la꞉sio꞉, ‘Ni misa꞉ kalu eyo꞉ nilo꞉ nanog dia꞉leno꞉ dugula꞉ma꞉nigab ko꞉lo꞉, ne waima꞉no꞉wa꞉le? Ne gana gedema꞉no꞉wo꞉ halaido꞉wo꞉ aundo꞉ma dowaki, a꞉la꞉ta꞉ga꞉ mole nolbo꞉lo꞉ ha꞉iya꞉li sima꞉no꞉wo꞉ sendelowab. 4 A꞉, ne eyo꞉ ko꞉lo꞉ dugulalikiyo꞉, kalu nolba꞉yo꞉ ili ayamio꞉ ne sagala꞉li tililia꞉ hamana꞉kiyo꞉, nilo꞉ dimidama꞉no꞉wo꞉ no꞉no꞉no꞉ o꞉li asulo꞉l.’ 5 A꞉la꞉fo꞉ko꞉lo꞉ nanogdo꞉ dian kalu a꞉ma꞉yo꞉ kalu o꞉ba꞉le ene misa꞉ kalu o꞉lia꞉lo꞉ mewa꞉ldo꞉ da꞉lab a꞉no꞉ ho꞉le kegea꞉sa꞉ga꞉, ina꞉lile dabu kedo꞉. Kalu tamin amilo꞉ yab emo꞉wo꞉ a꞉la꞉dabu ba꞉ba꞉, ‘Giyo꞉ ni misa꞉ kalu o꞉lia꞉yo꞉ me wa꞉lo꞉ o꞉biba꞉s da꞉laba?’ 6 Kalu a꞉ma꞉yo꞉ a꞉ma꞉la꞉bo꞉ a꞉la꞉sio꞉, ‘Ni mewa꞉l a꞉no꞉, o꞉lifa꞉ ho꞉n ko꞉lo꞉ go꞉fo꞉ alan amilo꞉ wasula꞉ a꞉no꞉ do꞉la꞉lowo꞉wo꞉ do꞉la꞉fo꞉ ko꞉lo꞉ difa꞉.’ A꞉la꞉sa꞉labiyo꞉ nanogdo꞉ dian kalu a꞉ma꞉yo꞉ a꞉la꞉sio꞉, ‘Tamin amilo꞉ mewa꞉l difa꞉ gilo꞉ sa꞉sa꞉lo꞉ da꞉lab a꞉no꞉ bo꞉bo꞉ge hala꞉sa꞉ga꞉, bugo꞉ a꞉namio꞉ do꞉la꞉lowo꞉wo꞉ bila꞉fo꞉ a꞉la꞉sa꞉sa꞉li alifoma.’ 7 Kalu a꞉ma꞉ fa꞉s amilo꞉ yab emo꞉wo꞉lo꞉ a꞉la꞉dabu ba꞉ba꞉, ‘Giyo꞉ mewa꞉lo꞉ o꞉biba꞉s da꞉laba?’ Eyo꞉ a꞉ma꞉la꞉bo꞉ a꞉la꞉sio꞉, ‘Ni mewa꞉l a꞉no꞉, da꞉si wit fo wo꞉fa꞉yo꞉ 1,000 ko꞉lo꞉ da꞉lab.’ A꞉la꞉sa꞉labiyo꞉ nanogdo꞉ dian kalu a꞉ma꞉yo꞉ a꞉la꞉sio꞉, ‘Tamin amilo꞉ mewa꞉l difa꞉ gilo꞉ sa꞉sa꞉lo꞉ da꞉labo꞉ we ko꞉lo꞉ giyo꞉ bugo꞉ a꞉namio꞉ 800 a꞉la꞉sa꞉sa꞉li alifoma.’

8 “Misa꞉ kalu a꞉ma꞉yo꞉ ene nanogdo꞉ dian kalu wema꞉yo꞉ mo꞉tilidowano꞉lo꞉b a꞉la꞉asulo꞉ ko꞉sega, enena꞉ma꞉la꞉lo꞉ asuwa꞉fa꞉no꞉wo꞉ asulo꞉wo꞉ alan dowo꞉lo꞉bi ba꞉dakiyo꞉, eyo꞉ e wabudo꞉. Henfelo꞉ kaluka꞉isale i a꞉ma꞉yo꞉ nanogo꞉ egele dimidama꞉nikiyo꞉, asulo꞉ ko꞉li ko꞉lilo꞉ dia꞉sa꞉ga꞉ dimida꞉len. Ko꞉sega kaluka꞉isale ho꞉len usamilo꞉ dowab iliyo꞉ a꞉la꞉bo꞉ mo꞉dimida꞉sen. 9 Niyo꞉ gimo꞉wo꞉ a꞉la꞉so꞉lo꞉l. O꞉go꞉ gio꞉ nolo꞉ asuwa꞉taki, i o꞉lia꞉yo꞉ mili doma꞉niki, henfelo꞉ mole we wala꞉ma. A꞉la꞉galega ho꞉len moleya꞉lo꞉ nanog dimida꞉leno꞉ kedetalikiyo꞉, gimo꞉wo꞉ Hebene mela꞉no꞉ mela꞉no꞉ doma꞉ki mena a꞉la꞉sa꞉ma꞉ib.

10 Luk 19.17-26“Kalu abeyo꞉ ni asulo꞉wo꞉ kudu ha꞉naki, kelego꞉ ha꞉luwo꞉ ko꞉lo꞉ dinafa tili dofo꞉lalega, eyo꞉ alan kelego꞉wo꞉lo꞉ o꞉li tili doma꞉ib. A꞉la꞉ta꞉ga꞉ kalu abeyo꞉ ha꞉lu kelego꞉ amio꞉ ko꞉lo꞉, eyo꞉ man digalo꞉wo꞉ mo꞉dimidalega, eyo꞉ alan kelego꞉ amio꞉lo꞉ man digalo꞉wo꞉ mo꞉dimidama꞉ib. 11 A꞉la꞉fo꞉ko꞉lo꞉ giliyo꞉ ne asulo꞉ a꞉no꞉ mo꞉kudu ha꞉naki, henfelo꞉ wenamilo꞉ mole da꞉lab a꞉no꞉ mo꞉dinafa bo꞉fo꞉lalega, Godeya꞉ siwa꞉l amilo꞉ kelego꞉ wa꞉la꞉b dowab a꞉no꞉ gili bo꞉fo꞉melea꞉kiyo꞉ gimo꞉wo꞉ mada mo꞉dimia꞉ib. 12 A꞉la꞉ta꞉ga꞉ giliyo꞉ kalu noma꞉ kelego꞉wo꞉ mo꞉dinafa tili dofo꞉lalega, Gode eyo꞉ kelego꞉ go꞉no꞉ndo꞉leyo꞉ gimo꞉wo꞉ mada mo꞉dimia꞉ib.

13 Madi 6.24“Nanogdo꞉ dian kalu imili nowo꞉ bo꞉fo꞉lowan kalu a꞉la꞉ya꞉ ha꞉g amio꞉ mo꞉doma꞉ib. A꞉la꞉galega, eyo꞉ bo꞉fo꞉lowan kalu nowo꞉mbo꞉wo꞉ ha꞉fo꞉ disa꞉laki, no o꞉lia꞉yo꞉ mo꞉bema꞉ib. Bo꞉fo꞉lowan kalu nowo꞉ ko꞉lo꞉ kudu ha꞉naki, nowo꞉ gola ba꞉ba꞉ib. O꞉leaumbo꞉ Gode asuluma꞉no꞉ tog o꞉lia꞉ mole alan asuluma꞉no꞉ tog a꞉no꞉lia꞉yo꞉ giliyo꞉ mada mo꞉kudu ha꞉na꞉no꞉ dowo꞉ ko꞉lo꞉lab.”

19 Ya꞉su eyo꞉ to a꞉no꞉ a꞉kudu sa꞉lakiyo꞉ a꞉la꞉sio꞉, “Moleyo꞉ modo꞉lo꞉ delen kalu nowo꞉ elen ko꞉lo꞉, eyo꞉ helebeso꞉g nafaleyo꞉ ha꞉ga sa꞉ga꞉la꞉sa꞉ga꞉, helebeso꞉g ho꞉mo꞉solo꞉ sambowo꞉ wa꞉la sa꞉ga꞉la꞉sen. A꞉la꞉ta꞉ga꞉ ho꞉leno꞉ tambo e ma꞉no꞉wo꞉ nafale na꞉len. 20-21 Ene abayamio꞉ wa꞉feyo꞉ kalu nowo꞉ tog anib a꞉na ha꞉iya꞉liki sa꞉sen. Kalu a꞉ma꞉ wiyo꞉ Lasalas. Moleyo꞉ modo꞉lo꞉ delen kaluwa꞉ ma꞉n mudo꞉ sudufa꞉lab a꞉no꞉ e ma꞉no꞉ a꞉la꞉liki yasisen. Ko꞉sega elo꞉ mo꞉diaki yasila꞉labi, gasayo꞉ ya꞉ga꞉ ogen e amilo꞉ kandayo꞉ a꞉no꞉ da꞉ba꞉len.

22 “A꞉la꞉ga꞉lena, Lasalas e sowabiki, ma꞉mula꞉ kalu iliyo꞉ dia꞉ha꞉na꞉sa꞉ga꞉, Ablaham elo꞉ sab hen a꞉na mesea꞉ki ta꞉fo꞉. A꞉la꞉ta꞉ga꞉ moleyo꞉ modo꞉lo꞉ delen kalu a꞉no꞉lo꞉ sowabiki, hena dali alifa꞉. 23 E dane ane hena silikiyo꞉, nagalo꞉wo꞉ alan ba꞉da꞉liki, alolo ba꞉ba꞉ amio꞉, Ablahamo꞉ ko꞉na꞉ siliki, Lasalaso꞉ e aniba sabi ba꞉ba꞉. 24 A꞉la꞉ta꞉ga꞉ eyo꞉ ho꞉le sa꞉lakiyo꞉ a꞉la꞉sio꞉, ‘Do Ablahamo꞉, de wiyo꞉ nagalo꞉wo꞉ odo꞉ bo꞉do꞉l ko꞉lo꞉, giyo꞉ ne nofola꞉sa꞉ga꞉, Lasalas koma꞉ dagi gasa to꞉ hebda꞉suwo꞉ ho꞉na degela꞉sa꞉ga꞉, ne eana golaliki agoloma꞉ki iliga꞉foma’ a꞉la꞉sio꞉.

25 “Ko꞉sega Ablaham eyo꞉ a꞉ma꞉la꞉bo꞉ a꞉la꞉sio꞉, ‘So꞉wa, ge asuluma. Ge henfelo꞉ holona o꞉silikiyo꞉, ge kelego꞉wo꞉ modo꞉ nafale dia꞉lab amio꞉, Lasalas e kelego꞉lo꞉ma nagalo꞉ ba꞉da꞉liki sen. Ko꞉sega o꞉go꞉ Gode eyo꞉ Lasalas e ha꞉sa mesea꞉ki sagale alita꞉lab amio꞉, ge nagalo꞉wo꞉ alan odo꞉ ba꞉da꞉liki sab. 26 A꞉la꞉ta꞉ga꞉ mo꞉dimidama꞉no꞉ dowo꞉ nowo꞉ we. Gilo꞉ sab o꞉lia꞉ nilo꞉ o꞉lo꞉l we o꞉lia꞉yo꞉ us amio꞉ Gode eyo꞉ hen gede to꞉lolo꞉wo꞉ alan ta꞉fo꞉ ko꞉lo꞉, wena a꞉la꞉ta꞉ga꞉ gelo꞉ amilo꞉ ha꞉na꞉no꞉wo꞉ mo꞉ililo꞉, a꞉la꞉ta꞉ga꞉ gelo꞉ wenamilo꞉ mia꞉no꞉wo꞉lo꞉ mada mo꞉ililo꞉.’

27 “A꞉la꞉sa꞉labiki, moleyo꞉ modo꞉lo꞉ delen kalu eyo꞉ towo꞉ ha꞉nolo sa꞉laki a꞉la꞉sio꞉, ‘A꞉la꞉go꞉lalega giyo꞉ Lasalaso꞉ dowa꞉ aya hamana꞉ki iliga꞉foma. 28 Niyo꞉ nao i bila꞉fo꞉wo꞉ o꞉sab ko꞉lo꞉, iyo꞉ hen nagalo꞉lo꞉ diab wenamio꞉ yabena꞉ki, giyo꞉ Lasalaso꞉ hagugo꞉ towo꞉ sa꞉ma꞉ni hamana꞉ki iliga꞉foma’ a꞉la꞉sio꞉. 29 Ko꞉sega Ablaham eyo꞉ a꞉ma꞉la꞉ sa꞉laki, ‘Mo꞉sa꞉s elo꞉ to sa꞉sa꞉lo꞉ o꞉lia꞉ dinali sa꞉lan kaluwa꞉lo꞉ to sa꞉sa꞉lo꞉ a꞉no꞉ gao i o꞉lia꞉ a꞉lab ko꞉lo꞉ iliyo꞉ to a꞉no꞉ o꞉li da꞉ba꞉ib.’ 30 A꞉la꞉sa꞉labiki, moleyo꞉ modo꞉lo꞉ delen kalu eyo꞉ a꞉la꞉sio꞉, ‘Do Ablahamo꞉, iyo꞉ to a꞉no꞉ mo꞉tilida꞉ba꞉ib ko꞉sega, sowo꞉ kalu nowo꞉ a꞉ma꞉la꞉ dasila꞉sa꞉ga꞉ ilo꞉wa ha꞉na꞉sa꞉ga꞉ sa꞉lalega, iyo꞉ asulo꞉wo꞉ a꞉na nodoma꞉ib.’

31 “A꞉la꞉fo꞉ko꞉lo꞉ Ablaham eyo꞉ emo꞉wo꞉ a꞉la꞉sio꞉, ‘Iyo꞉ Mo꞉sa꞉s elo꞉ to sa꞉sa꞉lo꞉ o꞉lia꞉ dinali sa꞉lan kaluwa꞉lo꞉ to sa꞉sa꞉lo꞉ a꞉no꞉lia꞉yo꞉ mo꞉da꞉dalega, sowo꞉ kaluwo꞉ a꞉dasila꞉sa꞉ga꞉ towo꞉ sa꞉ma꞉no꞉ kibo꞉bowo꞉, iyo꞉ a꞉no꞉lo꞉ mo꞉tilida꞉babe.’ ”

<- Luk 15Luk 17 ->