1 [a]Ni mili, gio꞉ Alan Ya꞉su Keliso malilo꞉ e amio꞉ tilidabu ko꞉lo꞉, kaluka꞉isale nolo꞉ nafale a꞉la꞉ aloba꞉dakiyo꞉, giliyo꞉ nolo꞉ dianila꞉so꞉bo. 2-4 Gio꞉ tolo꞉ wida꞉sen aya kegeakiyo꞉, kelego꞉ modo꞉lo꞉ da꞉lab kalu nowo꞉, helebeso꞉go꞉ o꞉lia꞉ momado꞉wo꞉ nafale kagedela꞉sa꞉ga꞉ mesa꞉ni mio꞉. A꞉la꞉ta꞉ga꞉ kelego꞉lo꞉ma kalu nowo꞉ helebeso꞉go꞉ heyo꞉ kata꞉ga꞉ mesa꞉ni mio꞉ ko꞉lo꞉, giyo꞉ wabulun kaluwo꞉ dinafa tilidowaki, “ge uwo꞉b nafa wena mesea” a꞉laki, ko꞉sega kelego꞉lo꞉ma kalu o꞉mo꞉wo꞉ “ge fa꞉s doba꞉da꞉ mesa꞉ hamana” mo꞉ “ge ha꞉la꞉ya kagafo꞉melea” a꞉la꞉sa꞉lalega, go꞉no꞉n kele asulo꞉ mogago꞉ a꞉ma꞉ ilikiyo꞉, kaluwo꞉ a꞉na aloba꞉dakigab.

5 [b]Ni milile, gio꞉ dabuma. Henfelo꞉ wenamio꞉ kelego꞉lo꞉ma kaluka꞉isale a꞉lab a꞉no꞉ ini tilidabuwo꞉ alan doma꞉ki, Gode eyo꞉ iyo꞉ da꞉feyo꞉. A꞉la꞉ta꞉ga꞉ tamin amio꞉ Gode eyo꞉ “kalu abeyo꞉ ne alan asulalega, amisa꞉n nilo꞉ bo꞉fo꞉lab a꞉namio꞉ tina꞉ib” a꞉la꞉dinali sio꞉ ko꞉lo꞉, o꞉go꞉ kelego꞉lo꞉ma kaluka꞉isale i wema꞉ ti hamana꞉ki, Godeya꞉ da꞉feyo꞉ ko꞉lo꞉lab. 6-7 Ko꞉sega gililo꞉ man dimidab a꞉ma꞉yo꞉, kelego꞉lo꞉ma kalu a꞉no꞉ dianilakigab. Gio꞉ asula꞉bi. Gio꞉ abe wa꞉la꞉ sa꞉ndano꞉? Gio꞉ abe mo꞉walilano꞉? A꞉la꞉ta꞉ga꞉ Ya꞉suwa꞉ wi nafa gililo꞉ di a꞉no꞉ abe dio꞉ge sa꞉la꞉leno꞉? Kelego꞉ modo꞉lo꞉ da꞉lab kalu iliyo꞉ a꞉la꞉dimida꞉sen.

8 [c]Godeya꞉ to sa꞉sa꞉lo꞉ amio꞉, nili misa꞉ kalu Gode elo꞉ ele difa꞉ a꞉ma꞉yo꞉ a꞉la꞉sio꞉ “Gio꞉ go꞉no꞉n asulan o꞉leaumbo꞉, giasi kaluka꞉isale nolo꞉lo꞉ a꞉la꞉asulaki ha꞉fo꞉wo꞉ disa꞉la꞉bi.” A꞉la꞉sio꞉ ko꞉lo꞉ giliyo꞉ ele a꞉no꞉ hendele kudu ha꞉nalega, gio꞉ digalo꞉ dowab. 9 [d]Ko꞉sega giyo꞉ kaluka꞉isale nolo꞉ ha꞉fo꞉ disa꞉laki, nolo꞉ dianilalega, Godeya꞉ ele saefa꞉yo꞉ gi o꞉go꞉saki, ge mogago꞉ dowab. 10 [e]Mo꞉wo꞉ kalu imilig noma꞉yo꞉ Godeya꞉ ele saefa꞉yo꞉ tambo kudu ha꞉naki, ele imilise nowo꞉ o꞉go꞉salega, kalu a꞉no꞉ ele saefa꞉ a꞉no꞉ tambo o꞉go꞉sano꞉ a꞉ngab. 11 [f]A꞉la꞉do꞉ sio꞉wo꞉ mo꞉wo꞉ we. Gode imilise eyo꞉ ele a꞉la꞉ we e saefa꞉. Nowo꞉ “gayo꞉ afa dia꞉so꞉bo.” Nowo꞉ “kalu nowo꞉ sana sowa꞉so꞉bo,” a꞉la꞉bo꞉ E saefa꞉ ko꞉lo꞉, kalu abeyo꞉ gayo꞉ mo꞉afa diaki, kaluwo꞉ sana sowalega, kalu a꞉no꞉ Godeya꞉ ele saefa꞉lo꞉ o꞉go꞉san kalu dowab.

12 [g]Tif amio꞉ nio꞉ Godeya꞉ aloba꞉dalikiyo꞉, ga꞉li mesea꞉kilo꞉ fase alifa꞉ ele a꞉ma꞉yo꞉ nio꞉ aloba꞉ma꞉ib. Gio꞉ a꞉no꞉ ko꞉lo꞉ asulufo꞉likiyo꞉, ho꞉leno꞉ tambo gili man dimidan o꞉lia꞉ to sa꞉lan o꞉lia꞉yo꞉ dinafa tilidowa꞉bi. 13 [h]Mo꞉wo꞉ kalu abeyo꞉ kalu nolo꞉ mo꞉nofola꞉lalega, tif amio꞉ Gode eyo꞉ kalu emo꞉wo꞉lo꞉ mo꞉nofolaki, halaido꞉ mo꞉walilima꞉ib. Ko꞉sega kalu abeyo꞉ nolo꞉ nofolo꞉ alita꞉seno꞉lalega, mo꞉walilab a꞉namio꞉ e ga꞉li doma꞉ib.

14 Ni mili gio꞉, kalu abeyo꞉ “Ne Keliso amio꞉ tili do꞉do꞉lka꞉” a꞉la꞉sa꞉la꞉li ko꞉sega, eyo꞉ man nafayo꞉ mo꞉dimida꞉seno꞉lalega, tilidabu o꞉leo꞉ngo꞉ma꞉yo꞉ kalu a꞉no꞉ o꞉li asuwa꞉fa꞉iba꞉le? Tilidabu a꞉ma꞉yo꞉ kaluka꞉isaleyo꞉ mada mo꞉gasilia꞉ib. 15-16 [i]Keliso kaluka꞉isale abeyo꞉ tilidabu kaluka꞉isale nowo꞉ ma꞉no꞉ o꞉lia꞉ so꞉g o꞉lia꞉yo꞉ aundo꞉ma ba꞉da꞉sa꞉ga꞉yo꞉, “Ha꞉iyo꞉, Gode eyo꞉ so꞉g o꞉lia꞉ ma꞉n o꞉lia꞉yo꞉ gemo꞉wo꞉ dimia꞉ib ko꞉lo꞉ ge ha꞉sa ta꞉bi” a꞉la꞉bo꞉ nofolo꞉ towo꞉ sa꞉laki ko꞉sega, kalu a꞉no꞉ mo꞉asuwa꞉talega, eyo꞉ kalu o꞉mo꞉wo꞉ man nafayo꞉ mo꞉dimidab. To elo꞉ sa꞉lab a꞉ma꞉yo꞉ e waga asuwa꞉fa꞉iba? 17 A꞉la꞉go꞉ko꞉lo꞉ tilidabu mosowo꞉ e amio꞉ a꞉lab ko꞉sega man nafa dimidano꞉ e amio꞉ mo꞉fa꞉la꞉dowalega, tilidabu elo꞉ a꞉no꞉ sowo꞉ ko꞉lo꞉lab.

18 [j]Ko꞉sega kalu noma꞉ sa꞉lakiyo꞉, “Kaluka꞉isale nolo꞉ tilidabuwo꞉ a꞉lab. A꞉la꞉ta꞉ga꞉ nolo꞉ man nafa dimidano꞉ a꞉lab” a꞉la꞉sa꞉ma꞉ib. Ko꞉sega niyo꞉ a꞉ma꞉la꞉bo꞉ a꞉la꞉sa꞉ma꞉no꞉, “Ge man nafa dimidano꞉ aundo꞉malalega, tilidabu gilo꞉wo꞉ waga walama꞉no꞉wo꞉? Ko꞉sega man nafa ko꞉lo꞉ nilo꞉ dimidab a꞉ma꞉yo꞉, tilidabu nilo꞉wo꞉ ko꞉lo꞉ widakigab” a꞉la꞉sa꞉ma꞉no꞉. 19 Godeyo꞉ imilig ko꞉lo꞉ a꞉lab a꞉la꞉bo꞉ giyo꞉ tilida꞉dab. A꞉no꞉ nafa ko꞉sega, mama mogago꞉ iyo꞉lo꞉ a꞉la꞉ka tili asulakiyo꞉, iyo꞉ tagilaki bibisoda꞉lab.

20 Ge babale dowab ko꞉lo꞉, ge fanda asuluma꞉ki walama꞉nigo꞉l. Tilidabu moso iliki man nafayo꞉ aundo꞉malalega, tilidabu a꞉no꞉ hendele o꞉ngo꞉malo꞉ngo꞉ dowab. 21 [k]Nili ma꞉mu Ablaham e asuluma. Ene so꞉wa Aisa꞉go꞉ u dibido꞉ wa꞉la dia꞉ta꞉ga꞉, Godemo꞉ dimi ko꞉lo꞉ Gode eyo꞉ elo꞉ dimidab a꞉no꞉ ba꞉da꞉sa꞉ga꞉yo꞉, e mada digalo꞉ kalu a꞉la꞉sio꞉. 22 [l]Ene tilidabu o꞉lia꞉ man elo꞉ dimido꞉ o꞉lia꞉yo꞉ ida꞉ni gasayabiki, elo꞉ dimido꞉ a꞉ma꞉yo꞉ ene tilidabuwo꞉ a꞉na ilili alifa꞉. 23 [m]Tamin amio꞉ Godeya꞉ bugo꞉ amio꞉ a꞉la꞉sa꞉sa꞉lo꞉, “Ablaham e Godeya꞉lo꞉ to sa꞉lab a꞉no꞉ hendele tilida꞉dabiki, Gode eyo꞉ e digalo꞉ kalu a꞉la꞉bo꞉ a꞉na saefa꞉.” A꞉la꞉sa꞉sa꞉lo꞉ ko꞉lo꞉ Ablaham eyo꞉ ene so꞉wayo꞉ dimiab amio꞉, to a꞉no꞉ ilili alifa꞉. A꞉la꞉ta꞉ga꞉ Godeya꞉ sa꞉lakiyo꞉, “Ablaham we no꞉no꞉n milile dowab” a꞉la꞉sio꞉. 24 Gio꞉ asuluma. Tilidabu moso dowab a꞉no꞉ ba꞉da꞉sa꞉ga꞉yo꞉, Gode eyo꞉ ge digalo꞉ kalu a꞉la꞉bo꞉ mo꞉sa꞉ma꞉ib. Tilidabu o꞉lia꞉ man nafale dimidab o꞉lia꞉ gasayalikiyo꞉, Gode eyo꞉ ge digalo꞉ a꞉la꞉bo꞉ a꞉na saefa꞉ib.

25 [n]O꞉leaumbo꞉ uwo꞉ diakilo꞉ molelo꞉ dia꞉sen ga, Lehab eyo꞉ o꞉lusendo꞉ mio꞉ kalu a꞉la꞉ nowo꞉ e bo꞉fo꞉la꞉ga꞉, gis kaluwa꞉yo꞉ mo꞉sanama꞉ki, kalu a꞉la꞉ a꞉no꞉ tog nowa iliga꞉fo꞉ ko꞉lo꞉, elo꞉ dimido꞉ a꞉no꞉ ba꞉da꞉sa꞉ga꞉, Gode eyo꞉ Lehab e digalo꞉ ka꞉isale a꞉la꞉saefa꞉. 26 A꞉la꞉ta꞉ga꞉ kalu mamalo꞉ma dowab a꞉no꞉ e sowo꞉ ko꞉lo꞉, e sowo꞉ o꞉leaumbo꞉ kaluwo꞉ tilidabu mosowo꞉ dowaki, man nafa dimidano꞉ aundo꞉malalega, kalu a꞉ma꞉ tilidabuwo꞉ sowo꞉ ko꞉lo꞉lab.

<- Ya꞉ma꞉s 1Ya꞉ma꞉s 3 ->