Hibulu 5

1 Bobalo꞉ so꞉mea꞉sen misa꞉ kalu fa꞉la꞉doma꞉nikilo꞉ man dimidano꞉ we. Gode eyo꞉ kalu imilig nowo꞉ da꞉fea꞉sa꞉ga꞉, ene siwa꞉l amio꞉ us kalu doma꞉ki ta꞉fo꞉. Eyo꞉ bobayo꞉ Godemo꞉ dimia꞉sen a꞉la꞉ta꞉ga꞉ kaluwa꞉lo꞉ mogago꞉ dimido꞉ a꞉no꞉ ko꞉lo꞉ su dimiaki, no꞉wo꞉ Godemo꞉ so꞉mea꞉sen. 2 Kaluka꞉isale iyo꞉ babale dowaki, hala ha꞉na꞉lab amio꞉, bobalo꞉ so꞉mea꞉sen kalu eyo꞉ i a꞉no꞉ nofolakiyo꞉ ha꞉sa dowa꞉sen. Mo꞉wo꞉ elo꞉ halaido꞉lo꞉ma dowaki, hala ha꞉na꞉sen. 3 [a]A꞉la꞉go꞉ko꞉lo꞉ kaluka꞉isaleya꞉ mogago꞉ hama꞉kilo꞉ sulo꞉ dimiab a꞉namio꞉, mogago꞉ enedo꞉ dimido꞉ a꞉no꞉lo꞉ hama꞉ki dimia꞉sen. 4 [b]Bobalo꞉ so꞉mea꞉sen misa꞉ kalu a꞉no꞉ wi alan dowo꞉ ko꞉sega kalu nowo꞉ wi alan a꞉no꞉ dia꞉no꞉ enena꞉ma꞉la꞉yo꞉ mo꞉da꞉fema꞉ib. Godeya꞉lo꞉ tamin amilo꞉ A꞉lon ko꞉lo꞉ ho꞉lelia꞉sa꞉ga꞉lo꞉ da꞉feyo꞉ o꞉leaumbo꞉, Gode eyo꞉ iyo꞉lo꞉ a꞉la꞉ho꞉lelia꞉sa꞉ga꞉ da꞉fea꞉i mio꞉. 5 [c]A꞉la꞉do꞉ go꞉ aumbo꞉, Keliso eyo꞉ enena꞉ma꞉la꞉yo꞉ bobalo꞉ so꞉mea꞉sen misa꞉ kalu doma꞉no꞉ a꞉lakiyo꞉, ene wi duludakiyo꞉ mo꞉da꞉feyo꞉. Ko꞉sega Gode eyo꞉ Ya꞉su da꞉feakiyo꞉, emo꞉wo꞉ a꞉la꞉sio꞉,

“Ge na꞉ so꞉wa dowab.

O꞉go꞉ ne gi go꞉l dowo꞉l.”

6 [d]A꞉la꞉ta꞉ga꞉ to sa꞉sa꞉lo꞉ no amio꞉ Gode eyo꞉ a꞉la꞉sio꞉ ko꞉lo꞉ sa꞉sa꞉lo꞉ da꞉lab.

“Ma꞉kisedeg elo꞉ nanog di o꞉leaumbo꞉ gi diaki,

Ge bobalo꞉ so꞉mea꞉sen kalu ko꞉ngo꞉ mela꞉no꞉ dofo꞉ ha꞉na꞉mela꞉ib.”

7 [e]Ya꞉su e henfelo꞉ wena ilikiyo꞉, e mo꞉soma꞉no꞉ a꞉lakiyo꞉ Gode eyo꞉ o꞉li asuwa꞉fa꞉ib a꞉la꞉asulo꞉ ko꞉lo꞉, eyo꞉ Gode emo꞉wo꞉ dulugu sa꞉lakiyo꞉, si ho꞉n o꞉lia꞉ iliki halale ya꞉lo꞉. Ya꞉su e ha꞉ga dowaki, Godeyo꞉ wabuda꞉len ko꞉lo꞉, Gode eyo꞉ Ya꞉suwa꞉lo꞉ dabu ba꞉dab a꞉no꞉ dabu. 8 Ya꞉su e Godeya꞉ so꞉wa ko꞉sega, nagalo꞉ hida꞉yo꞉ elo꞉ di a꞉ma꞉ ilikiyo꞉, Gode kudu ha꞉nan man a꞉no꞉ e a꞉na fanda asululi.

9 Man elo꞉ dimido꞉ a꞉na ilikiyo꞉, Gode eyo꞉ e ilili alitaki ego꞉le ta꞉ta꞉ga꞉yo꞉, kaluka꞉isale e tolo꞉ kudu ha꞉nab a꞉no꞉ gasiliakilo꞉ ko꞉ngo꞉ mela꞉no꞉wo꞉ mo꞉wo꞉ e ko꞉lo꞉ ta꞉fo꞉. 10 A꞉la꞉ta꞉ga꞉ Gode eyo꞉ Ya꞉su e bobalo꞉ so꞉mea꞉sen misa꞉ kalu, Ma꞉kisedeg elo꞉ nanog di o꞉leau da꞉feyo꞉.

To hendeleya timana꞉ki, halale sio꞉

11 Ya꞉su e Ma꞉kisedeg o꞉ngo꞉ dowo꞉ a꞉la꞉likiyo꞉, to nolo꞉ sa꞉ma꞉no꞉wo꞉ o꞉a꞉lab ko꞉sega, gio꞉ mo꞉iligi da꞉da꞉lab ko꞉lo꞉, niyo꞉ to nolo꞉ gimo꞉wo꞉ fanda walama꞉no꞉wo꞉ halaido꞉. 12 [f]Gio꞉ Kelisowo꞉ mo꞉lu dowo꞉ ko꞉lo꞉, giliyo꞉ kalu nolbo꞉wo꞉ Godeya꞉ to mano꞉ o꞉li walama꞉no꞉ dowo꞉ ko꞉sega, Godeya꞉ to man ho꞉gi di a꞉no꞉ nolba꞉yo꞉ gimo꞉wo꞉ wa꞉ka a꞉walama꞉no꞉ dowo꞉lo꞉b. Gio꞉ so꞉wa tuo꞉lun o꞉ngo꞉ dowakiyo꞉, ma꞉n halaido꞉wo꞉ mo꞉naki, bo ibko꞉ na꞉lab. 13 Kaluka꞉isale abeyo꞉ bolo꞉ na꞉lab a꞉no꞉ so꞉wa tuo꞉lun o꞉ngo꞉ o꞉iliki, man digalo꞉ dimidama꞉no꞉wo꞉ e babale dowo꞉ ko꞉lo꞉lab. 14 Ko꞉sega kalu analia꞉sa꞉ga꞉lo꞉ asululiab a꞉no꞉, ma꞉n halaido꞉wo꞉ a꞉ma꞉ nan. Inino꞉ man nafa o꞉lia꞉ mogago꞉ o꞉lia꞉yo꞉ ho꞉leno꞉ tambo aloba꞉da꞉likilo꞉ dinafa asululiabo꞉ o꞉m.

<- Hibulu 4 Hibulu 6 ->