Hibulu 3

Ya꞉su eyo꞉ Mo꞉sa꞉so꞉ tinio꞉ ko꞉lo꞉lab

1 Ni mili, Gode eyo꞉ gio꞉ ho꞉ida꞉sa꞉ga꞉ malilo꞉ doma꞉ki da꞉fe alifa꞉ ko꞉lo꞉, gio꞉ Ya꞉suwo꞉ fanda asuluma. Godeya꞉lo꞉ iliga꞉fo꞉ kaluwo꞉ Ya꞉su e, a꞉la꞉ta꞉ga꞉ bobalo꞉ so꞉mea꞉sen misa꞉ kaluwo꞉lo꞉ Ya꞉su eko꞉ dowo꞉ ko꞉lo꞉, niliyo꞉ e tilida꞉da꞉ga꞉yo꞉, kalab amio꞉ wida꞉lo꞉l. 2 Mo꞉sa꞉s eyo꞉ Godeya꞉ ene ayo꞉* dinafa bo꞉fo꞉likilo꞉ Godeya꞉ towo꞉ kudu ane o꞉leaumbo꞉, Ya꞉su eyo꞉ elo꞉ iliga꞉fo꞉ Gode a꞉ma꞉ asulo꞉wo꞉ mada kudu ane. 3-4 Henfelo꞉ wenamio꞉ ayo꞉ tambo kaluwa꞉ dialifelo꞉ ko꞉lo꞉lab. Ko꞉sega henfelo꞉ wenamilo꞉ kelego꞉ tambolo꞉ dimido꞉ a꞉no꞉ Gode e dimido꞉ ko꞉lo꞉, biso꞉wo꞉ e. Kalu noma꞉yo꞉ ayo꞉ nafale dialitalikiyo꞉, kaluka꞉isale nolba꞉yo꞉ a a꞉no꞉ mo꞉wabulu sa꞉laki, alo꞉ di kalu a꞉no꞉ ko꞉lo꞉ iwalu dia꞉taki wabulu sa꞉ma꞉ib. A꞉la꞉do꞉ gab o꞉leaumbo꞉, Mo꞉sa꞉s elo꞉ wi alan di a꞉no꞉, Ya꞉suwa꞉ ene wi alan a꞉ma꞉ tinio꞉ ko꞉lo꞉lab. 5 Godeya꞉ a us a꞉na iliki, Mo꞉sa꞉s e nanog dian kalu dofo꞉likiyo꞉, to sio꞉wo꞉ kudu ha꞉naki nanog a꞉no꞉ hendele dinafa bo꞉fo꞉len. A꞉la꞉dimidab amio꞉, to Godeya꞉lo꞉ tif amilo꞉ sa꞉ma꞉no꞉ a꞉no꞉ nanog elo꞉ dimida꞉len a꞉ma꞉yo꞉ kalaba wido꞉. 6 Ko꞉sega Ya꞉su Keliso e, Godeya꞉ so꞉wa ko꞉lo꞉, Godeya꞉ ene alo꞉ biso꞉ kaluwo꞉ e dowaki, iya Godeya꞉lo꞉ asulab au kudu ha꞉na꞉len. A꞉la꞉ta꞉ga꞉ nili tilidabu a꞉namio꞉ halale kagayakiyo꞉, Gode eyo꞉ nio꞉ asuwa꞉fa꞉ib a꞉la꞉tili asula꞉sa꞉ga꞉ sagala꞉liki yasisalega, nio꞉ Godeya꞉ ene a dowab.

Mo꞉tilida꞉dalega ha꞉sayo꞉ mo꞉mesa꞉ib

7 A꞉la꞉fo꞉ko꞉lo꞉ Godeya꞉ Mamaya꞉lo꞉ to sio꞉ a꞉no꞉ nio꞉ da꞉ba꞉niki. Eyo꞉ a꞉la꞉sio꞉,

“O꞉go꞉ gio꞉ Godeya꞉ towo꞉ da꞉dakiyo꞉,

8-9 gili asulo꞉ nodoma꞉no꞉wo꞉ halaido꞉ dowakiyo꞉, gola ba꞉da꞉so꞉bo!

Mo꞉luwo꞉ Isolael kaluka꞉isale ililo꞉ ne gola ba꞉dakilo꞉ a꞉la꞉iyo꞉ o꞉leaumbo꞉, giliyo꞉ dimida꞉so꞉bo.

Iyo꞉ kalaleli hena ha꞉nakiyo꞉, iliyo꞉ ne a꞉da꞉fe ba꞉ba꞉.

Dona do꞉la꞉fo꞉ fa꞉la꞉da꞉in us a꞉namio꞉ molo ha꞉na꞉no꞉wo꞉ nilo꞉ dimido꞉ a꞉no꞉ iyo꞉ ba꞉da꞉sen ko꞉sega mo꞉tilidabu.

10 A꞉la꞉fo꞉ko꞉lo꞉ niyo꞉ kalu i o꞉mo꞉wo꞉ kulufa꞉yakiyo꞉ a꞉la꞉sio꞉,

‘Ho꞉leno꞉ tambo ini asulo꞉wo꞉ hala kudu ha꞉naki,

man nilo꞉wo꞉ iyo꞉ babale dowab.’

11 A꞉la꞉fo꞉ko꞉lo꞉ ne gadia꞉sa꞉ga꞉ imo꞉wo꞉ towo꞉ saetakiyo꞉ a꞉la꞉sio꞉,

‘Ha꞉salo꞉ mesa꞉no꞉ hen nilo꞉ dimidaefa꞉ a꞉namio꞉, iyo꞉ mada mo꞉tima꞉ib.’ ” Godeya꞉ Mama eyo꞉ a꞉la꞉sio꞉.

12 Ne mili, gio꞉ dinafa bo꞉fo꞉melea! Asulo꞉ mogago꞉ gilo꞉ a꞉ma꞉ ilikiyo꞉, tilidabu gilo꞉wo꞉ ta꞉ta꞉ga꞉, mela꞉no꞉lo꞉ a꞉lab Gode o꞉mo꞉wo꞉ fa꞉s dimiabena꞉ki dinafa dowa꞉bi. 13 Gio꞉ man mogago꞉ a꞉ma꞉yo꞉ dikilima꞉ki ta꞉talega, giliyo꞉ Godemo꞉wo꞉ mo꞉bema꞉ib ko꞉lo꞉, a꞉la꞉bo꞉ fa꞉la꞉dowabena꞉kiyo꞉, ho꞉leno꞉ tambowo꞉ giliyo꞉ nolba꞉ asulo꞉wo꞉ digidalitakiyo꞉ halale alita꞉lubi. Ho꞉leno꞉ tambowo꞉ niliyo꞉ “o꞉g” a꞉la꞉sa꞉la꞉sen ko꞉lo꞉, ho꞉leno꞉ tambowo꞉ niliyo꞉ nolo꞉ asuwa꞉ta꞉lubi. 14 Nio꞉ ho꞉gi da꞉dakiyo꞉ tilidabuwo꞉ halaido꞉ dowo꞉ ko꞉lo꞉, niliyo꞉ tilidabu a꞉naka halale kudu ha꞉na꞉la꞉ga꞉ sowaki edalega, nio꞉ Ya꞉su e o꞉lia꞉ ege dowo꞉ a꞉la꞉widakigab. 15 Hibu 3.7-8Godeya꞉ bugo꞉ amio꞉ a꞉la꞉sa꞉sa꞉lo꞉,

“O꞉go꞉ gio꞉ ene towo꞉ da꞉dakiyo꞉,

gili asulo꞉ nodoma꞉no꞉wo꞉ halaido꞉ dowakiyo꞉, gola ba꞉da꞉so꞉bo!

Mo꞉luwo꞉ Isolael kaluka꞉isale ililo꞉ ne gola ba꞉dakilo꞉ a꞉la꞉iyo꞉ o꞉leaumbo꞉, giliyo꞉ dimida꞉so꞉bo.”

16 Nam 14.1-35Kaluka꞉isale Godeya꞉ to sa꞉labo꞉ da꞉da꞉sa꞉ga꞉ a꞉la꞉iyakilo꞉ sandifo꞉ a꞉no꞉, kaluka꞉isale o꞉ba꞉le? Mo꞉sa꞉s elo꞉ Isibo꞉ ta꞉ta꞉ga꞉lo꞉ tililia꞉ mio꞉ kaluka꞉isale tambo a꞉ma꞉ dimido꞉. 17 1Kol 10.10Dona do꞉la꞉fo꞉ fa꞉la꞉da꞉in us a꞉namio꞉ Gode eyo꞉, o꞉bmo꞉ gadio꞉wo꞉? Eyo꞉ kaluka꞉isale mogago꞉lo꞉ dimida꞉len o꞉mo꞉ gadio꞉. E gadia꞉sa꞉ga꞉, iyo꞉ kalaleli hen a꞉na sia꞉lena sowo꞉ ko꞉lo꞉, do꞉mo꞉ ililo꞉wo꞉ a꞉naka ta꞉fo꞉. 18 A꞉la꞉ta꞉ga꞉ Gode eyo꞉ ene ha꞉salo꞉ doma꞉no꞉ hen a꞉namio꞉ mo꞉mia꞉ib a꞉labo꞉ o꞉bmo꞉ saefa꞉yo꞉? Kaluka꞉isale elo꞉ to sa꞉labo꞉ da꞉da꞉sa꞉ga꞉lo꞉ mo꞉kudu ha꞉nab i o꞉mo꞉ saefa꞉. 19 A꞉la꞉fo꞉ko꞉lo꞉ nio꞉ a꞉la꞉asulo꞉. Kaluka꞉isale i we Godeya꞉ towo꞉ mo꞉tilidabu ko꞉lo꞉, dimido꞉ a꞉na ilikiyo꞉ iyo꞉ Godeya꞉ ene ha꞉salo꞉ mesa꞉no꞉ hen a꞉namio꞉ mo꞉tiha꞉na꞉no꞉ dowo꞉.

<- Hibulu 2 Hibulu 4 ->