Mo꞉mo꞉do꞉ 9

Gode eyo꞉ Noamo꞉ dinali sio꞉

1 [a]Gode eyo꞉ Noa o꞉lia꞉ inso꞉ otalen o꞉lia꞉yo꞉ nafale mesea꞉ki, towo꞉ imo꞉wo꞉ a꞉la꞉dinali sio꞉, “Giliyo꞉ so꞉wayo꞉ sa꞉la꞉la꞉i ha꞉nakiyo꞉, modo꞉ fa꞉la꞉dowaki, henfelo꞉ we tambo ilila꞉bi. 2 No꞉ ilaboda꞉lo꞉ a꞉lab ko꞉li ko꞉lilo꞉wo꞉lo꞉, o꞉ba꞉ iwalulo꞉ a꞉labo꞉lo꞉, no꞉ kelego꞉ galin hen amilo꞉ dalolia꞉ ha꞉nano꞉lo꞉, a꞉la꞉ta꞉ga꞉ ka꞉ ho꞉n amilo꞉ a꞉labo꞉lo꞉, tambowo꞉ ge ba꞉da꞉ga꞉yo꞉ tagi doma꞉ib ko꞉lo꞉, iyo꞉ gi halaido꞉ a꞉ma꞉ ha꞉ga doma꞉ib. 3 Tamin amio꞉ i fo꞉s gemo꞉lo꞉ maiya꞉kilo꞉ dimi o꞉leaumbo꞉, o꞉go꞉ no꞉ henfelo꞉ amilo꞉ dalale san a꞉no꞉ tambo gi na꞉melea꞉ki ta꞉to꞉l. 4 [b]Ko꞉sega ho꞉bo꞉ a꞉namio꞉ mela꞉no꞉wo꞉ a꞉lab ko꞉lo꞉, no꞉ ho꞉bo꞉lo꞉ a꞉lab a꞉no꞉ na꞉so꞉boka꞉. 5 Noma꞉yo꞉ gio꞉ nowo꞉ ho꞉bo꞉wo꞉ tulaki sana sowalega, elo꞉ hala dimido꞉ amilo꞉ wa꞉l dia꞉ib a꞉no꞉ ni da꞉fema꞉no꞉. No꞉wa꞉le, kaluwa꞉le, ge sana sowalega, e wa꞉dema꞉no꞉wo꞉ ni da꞉fema꞉no꞉. Hendele, kaluka꞉isale abeyo꞉ kalu nowo꞉ ko꞉lo꞉ sana sowalega, wa꞉l elo꞉ dia꞉no꞉ a꞉no꞉ ni da꞉fema꞉no꞉.

6 [c]“Kaluka꞉isaleyo꞉ Gode eyo꞉ inin misido꞉ dimido꞉. A꞉la꞉fo꞉ko꞉lo꞉ kalu abeyo꞉ kaluka꞉isale nowo꞉ ko꞉lo꞉ sana sowalega, kalu a꞉no꞉lo꞉ sanala꞉bi a꞉la꞉saeto꞉l.

7 [d]A꞉la꞉ta꞉ga꞉ giliyo꞉ so꞉wayo꞉ sa꞉la꞉la꞉i ha꞉nakiyo꞉, modo꞉ fa꞉la꞉dowaki, henfelo꞉ we tambo ilila꞉bi.” Gode eyo꞉ a꞉la꞉sio꞉.

8 A꞉la꞉sa꞉la꞉sa꞉ga꞉ Gode eyo꞉ Noa o꞉lia꞉ inso꞉ otalen o꞉lia꞉mo꞉wo꞉ a꞉la꞉sio꞉, 9 “Dabuma! O꞉go꞉ niyo꞉ gi o꞉lia꞉ so꞉wa gilo꞉ sa꞉la꞉la꞉i ha꞉na꞉no꞉ o꞉lia꞉mo꞉wo꞉, to nowo꞉ dinali saefa꞉no꞉. 10 To a꞉no꞉ henfelo꞉ amilo꞉ mela꞉no꞉lo꞉ kelego꞉ gi o꞉lia꞉lo꞉ a꞉lab a꞉no꞉, o꞉ba꞉yo꞉lo꞉, no꞉ fofano꞉lo꞉, no꞉ ilaboda꞉lo꞉ sano꞉lo꞉ a꞉no꞉ tambo ho꞉n ko꞉su usa a꞉la꞉ta꞉ga꞉ ge o꞉lia꞉ handalowo꞉ ko꞉lo꞉, to saeto꞉l we uaya꞉no꞉ ko꞉lo꞉ saeto꞉l. 11 Niyo꞉ to we gi o꞉lia꞉ saetakiyo꞉ a꞉la꞉so꞉lo꞉l. Niyo꞉ henfelo꞉ amio꞉ mela꞉no꞉lo꞉ a꞉lab a꞉no꞉ tambo ho꞉na꞉yo꞉ wa꞉kabiyo꞉ mo꞉yasa danela꞉ma꞉no꞉. A꞉la꞉ta꞉ga꞉ henfelo꞉ wiyo꞉ ho꞉no꞉ galusana yakiyo꞉, wa꞉kabiyo꞉ mo꞉mogagila꞉ma꞉ib.” Gode eyo꞉ a꞉la꞉saefa꞉.

12 A꞉la꞉saeta꞉ga꞉yo꞉ Gode eyo꞉ wa꞉ka a꞉la꞉sio꞉, “To saefa꞉ a꞉no꞉ gi o꞉lia꞉, gililo꞉ sa꞉la꞉la꞉i ha꞉na꞉lab o꞉lia꞉yo꞉lo꞉, a꞉la꞉ta꞉ga꞉ mela꞉no꞉lo꞉ a꞉lab kelego꞉ gi o꞉lia꞉lo꞉ a꞉lab a꞉no꞉lia꞉yo꞉lo꞉ tambo dinali saefa꞉ a꞉no꞉, o꞉go꞉lo꞉ tif amio꞉lo꞉ dowa꞉i ha꞉na꞉mela꞉ib ko꞉lo꞉ ele ba꞉da꞉mela꞉no꞉wo꞉ we. 13 Ne o꞉lia꞉ henfelo꞉ o꞉lia꞉yo꞉ towo꞉ saeto꞉l ko꞉lo꞉, gio꞉ ele ba꞉da꞉melea꞉kiyo꞉, niyo꞉ kola꞉ us amio꞉ sowa꞉silo꞉wo꞉ dia꞉to꞉l. 14-15 Henfelo꞉ amio꞉ niyo꞉ kolo꞉ iliga꞉takiyo꞉, sowa꞉silo꞉wo꞉ kola꞉ us amio꞉ fa꞉la꞉dowalikiyo꞉, no꞉no꞉ndo꞉ gi o꞉lia꞉ a꞉la꞉ta꞉ga꞉ henfelo꞉ amilo꞉ mela꞉no꞉lo꞉ a꞉lab o꞉lia꞉mo꞉lo꞉ to dinali saefa꞉ a꞉no꞉ niyo꞉ asula꞉mela꞉no꞉. A꞉la꞉fo꞉ko꞉lo꞉ henfelo꞉ wiyo꞉ ho꞉no꞉ galu sana yakiyo꞉, mela꞉no꞉lo꞉ a꞉lab a꞉no꞉ wa꞉kabiyo꞉ mo꞉yasa danela꞉ma꞉ib. 16 Kol amio꞉ sowa꞉silo꞉wo꞉ ba꞉dakiyo꞉, no꞉no꞉ndo꞉ i o꞉lia꞉lo꞉ to dinali saefa꞉ a꞉no꞉ a꞉na a꞉asuluma꞉no꞉. To a꞉no꞉ ne o꞉lia꞉ henfelo꞉ amilo꞉ mela꞉no꞉wo꞉ a꞉lab o꞉lia꞉ tambo saefa꞉ ko꞉lo꞉ to a꞉no꞉ ko꞉ngo꞉ dowa꞉i ha꞉na꞉mela꞉ib.” Gode eyo꞉ a꞉la꞉saefa꞉. 17 A꞉la꞉fo꞉ko꞉lo꞉ Gode eyo꞉ Noamo꞉wo꞉ a꞉la꞉sio꞉, “Niyo꞉ henfelo꞉ amilo꞉ mela꞉no꞉lo꞉ a꞉lab kelego꞉ o꞉lia꞉lo꞉ tambo to dinali saefa꞉ a꞉no꞉ ele ba꞉da꞉mela꞉no꞉wo꞉ o꞉m.”

Noaya꞉ eso꞉lo꞉wa꞉ wiyo꞉ we

18 Noaya꞉ ene inso꞉, e o꞉lia꞉lo꞉ ho꞉n ko꞉suwa a꞉la꞉ta꞉ga꞉lo꞉ handalowo꞉ a꞉no꞉ we, Sa꞉m, Ham, Yafa꞉d. Ham eyo꞉ Ka꞉ina꞉n ko꞉lo꞉ sa꞉la꞉li. 19 A꞉la꞉fo꞉ko꞉lo꞉ kaluka꞉isale henfelo꞉ amilo꞉ ta꞉i ha꞉nab we, tambo Noaya꞉ inso꞉ otalen a꞉na a꞉la꞉ta꞉ga꞉ fa꞉la꞉dowo꞉.

20 Noa e, elo꞉ gela꞉mela꞉no꞉ kalu dowo꞉. Eyo꞉ me fo nolo꞉[e] wain ho꞉n dimidama꞉niki, gela꞉la꞉ga꞉ bo꞉fo꞉len. A꞉la꞉do꞉ dimidama꞉no꞉wo꞉ e mo꞉mo꞉do꞉. 21 Tif amio꞉ Noa e wain ho꞉no꞉ na꞉la꞉ga꞉ no꞉nolaki, ene so꞉g a usa hagulabo alifo꞉len. 22 A꞉la꞉dimida꞉sa꞉ga꞉ elena, Ka꞉ina꞉na꞉ iya Hamo꞉ ya꞉sa꞉ga꞉, iyayo꞉ hagulabo alifo꞉leno꞉ ba꞉da꞉sa꞉ga꞉, ene ao a꞉la꞉mo꞉wo꞉ ha꞉la꞉ya sa꞉ma꞉ni ane. 23 Ko꞉sega Sa꞉m o꞉lia꞉ Yafa꞉d o꞉lia꞉ma꞉yo꞉ helebeso꞉go꞉ fa꞉s doba꞉da꞉ go꞉lufo꞉ ha꞉na꞉ga꞉, iya ko꞉lo꞉ hagulabolo꞉ da꞉lab a꞉no꞉ helebeso꞉g a꞉ma꞉ go꞉lu alifa꞉. A꞉la꞉fo꞉ko꞉lo꞉ a꞉la꞉yo꞉ milifo꞉ iyalo꞉ doba꞉da꞉yo꞉ mo꞉ta꞉fo꞉ ko꞉lo꞉, iya hagulabolo꞉ da꞉lab a꞉no꞉ mo꞉ba꞉ba꞉. 24 Noa e no꞉nolo꞉ alifo꞉len a꞉no꞉ a꞉sikaga ga꞉ta꞉ga꞉yo꞉, inso꞉ tifa꞉lo꞉ emo꞉lo꞉ dimido꞉ a꞉no꞉ asulakiyo꞉ a꞉la꞉sio꞉,

25 “Hida꞉yo꞉ alano꞉ Ka꞉ina꞉n e dia꞉ib.

E mada wilo꞉ma dowaki,

ene ao iya꞉ madali nanog dian kalu doma꞉ib.”

26 A꞉la꞉ta꞉ga꞉ Noa eyo꞉ to nowo꞉ a꞉kudu sa꞉lakiyo꞉ a꞉la꞉sio꞉,

“Niyo꞉ Sa꞉ma꞉ Gode, Yawe emo꞉wo꞉ mada wabudaki so꞉lo꞉l.

Ka꞉ina꞉n e Sa꞉ma꞉ ene nanog dia꞉no꞉ kalu doma꞉ib.

27 Yafa꞉da꞉ eso꞉lo꞉wo꞉ modo꞉ doma꞉ki, niyo꞉ Godemo꞉ dulugu so꞉lo꞉l.

Yafa꞉da꞉ eso꞉lo꞉ a꞉no꞉, Sa꞉ma꞉ eso꞉lo꞉ o꞉lia꞉yo꞉ nafale mesea꞉ki so꞉lo꞉l.

A꞉la꞉ta꞉ga꞉ Ka꞉ina꞉n e Yafa꞉da꞉ madali nanog dia꞉no꞉ kalu doma꞉ki so꞉lo꞉l.”

28 A꞉la꞉fo꞉ko꞉lo꞉ ho꞉na꞉lo꞉ galu sana mio꞉ a꞉na a꞉la꞉ta꞉ga꞉yo꞉, Noayo꞉ dona nolo꞉ 350 a꞉la꞉fo꞉ ko꞉lo꞉ gulula꞉. 29 Noa e henfelo꞉ wenamilo꞉ seno꞉ donayo꞉ dikudu agelo꞉wo꞉ 950 a꞉la꞉fo꞉wo꞉ ta꞉ta꞉ga꞉, e a꞉na sowo꞉.

<- Mo꞉mo꞉do꞉ 8 Mo꞉mo꞉do꞉ 10 ->