1 Isolael e sowabiki, Yosa꞉b eyo꞉ iyaya꞉ wa꞉la alifo꞉liki, mimila꞉liki ya꞉lo꞉. 2 A꞉la꞉ta꞉ga꞉yo꞉ Yosa꞉b eyo꞉ iya sowo꞉ a꞉no꞉ bo꞉bo꞉gebo꞉ mo꞉hesema꞉ki, mulumulo꞉lo꞉ asulo꞉ kalu iliyo꞉ Isolaela꞉ do꞉mo꞉ amio꞉ mulumulo꞉wo꞉ dia꞉foma꞉ki sio꞉ ko꞉lo꞉, kalu i a꞉ma꞉yo꞉ do꞉mo꞉wo꞉ mo꞉hesema꞉kilo꞉ mululan a꞉no꞉ a꞉na difa꞉. 3 Mulumulo꞉lo꞉ mia꞉sen kaluwa꞉yo꞉ sowo꞉ do꞉mo꞉ amio꞉ mulumulo꞉wo꞉ ho꞉len do꞉la꞉fo꞉ fa꞉la꞉da꞉in usa a꞉namio꞉ mulu alita꞉sen ko꞉lo꞉, iliyo꞉ Isolaela꞉ do꞉mo꞉ amio꞉lo꞉ a꞉la꞉dimido꞉. A꞉la꞉ta꞉ga꞉ Isib kaluka꞉isale iyo꞉ kalu kuo꞉ya꞉likilo꞉ seno꞉, ho꞉leno꞉ do꞉la꞉fo꞉ dom a꞉la꞉fo꞉ ko꞉lo꞉ sen.

4-5 [a]Kalu kuo꞉ya꞉leno꞉ edabiki, Yosa꞉b eyo꞉ Fa꞉lo꞉wa꞉ nanog kalumo꞉wo꞉ a꞉la꞉sio꞉, “Gio꞉ nemo꞉wo꞉ sagalalega, ni to we Fa꞉lo꞉mo꞉wo꞉ sa꞉ma꞉ni ha꞉na꞉sa꞉ga꞉yo꞉ a꞉la꞉sa꞉la꞉bi, ‘Dowo꞉ soma꞉nikiyo꞉, nemo꞉wo꞉ a꞉la꞉sio꞉, “Ne soma꞉nigo꞉l ko꞉lo꞉, ne Ka꞉ina꞉n hen a꞉namio꞉ no꞉no꞉n do꞉mo꞉wo꞉ unanalifa꞉ a꞉na dia꞉fa꞉ni dia꞉ha꞉na꞉bi.” Nemo꞉wo꞉ a꞉la꞉sa꞉labiki, niyo꞉ emo꞉wo꞉ dinali saefa꞉ ko꞉lo꞉, o꞉go꞉ niyo꞉ ene do꞉mo꞉wo꞉ dia꞉ha꞉na꞉sa꞉ga꞉, enedo꞉ u no꞉no꞉ a꞉na dia꞉ta꞉ga꞉yo꞉, ne a꞉ma꞉la꞉ mia꞉no꞉’ a꞉la꞉liki Fa꞉lo꞉mo꞉wo꞉ a꞉la꞉dabu ba꞉da꞉bika꞉” a꞉la꞉sio꞉. 6 A꞉la꞉sa꞉labiki Fa꞉lo꞉ eyo꞉ Yosa꞉bo꞉wo꞉ a꞉la꞉sio꞉, “Giyo꞉ go꞉lbo꞉wo꞉ dinali sio꞉ au dimidaki, go꞉lo꞉ dalima꞉ni hamana” a꞉la꞉sio꞉. 7-8 A꞉la꞉fo꞉ko꞉lo꞉ Yosa꞉b eyo꞉ ene iyayo꞉ dia꞉sa꞉ga꞉, Ka꞉ina꞉n hen a꞉na dalima꞉ni ha꞉nabiki, Fa꞉lo꞉wa꞉ ene nanog dian kalu iyo꞉lo꞉, Fa꞉lo꞉wa꞉ ene ayamilo꞉ misa꞉ kaluwo꞉lo꞉, Isib hen amilo꞉ misa꞉ kaluwo꞉lo꞉, Yosa꞉b ene eso꞉lo꞉wo꞉lo꞉, ao iyo꞉lo꞉, a꞉la꞉ta꞉ga꞉ ene iya sowo꞉ a꞉ma꞉ eso꞉lo꞉wo꞉lo꞉, iyo꞉ tambo Ka꞉ina꞉n hen a꞉na ane. Iyo꞉ ha꞉nakiyo꞉, ini so꞉wagalino꞉ a꞉la꞉ta꞉ga꞉ no꞉ fofo꞉wo꞉lo꞉ Gosen hen a꞉naka ta꞉ta꞉i ane. 9 Kalu nolo꞉ ho꞉sa꞉ wa꞉la kandayaki, nolo꞉ i fofodo꞉ susululia꞉ ha꞉na꞉sen a꞉nami kandayaki, a꞉la꞉ta꞉ga꞉yo꞉ kaluwo꞉ modo꞉ ko꞉lo꞉ Yosa꞉b o꞉lia꞉ ha꞉na꞉ni ane. 10 Iyo꞉ ha꞉na꞉sa꞉ga꞉, da꞉si bebdo꞉ dila꞉sen hen, Atad, a꞉na fa꞉la꞉dowo꞉. Hen a꞉no꞉ ho꞉n Yodan a꞉no꞉ nodowa a꞉lab. Hen a꞉namio꞉ iyo꞉ ho꞉len dom a꞉la꞉fo꞉wo꞉ ene iyayo꞉ mada alan nofolaki, ogolo ya꞉la꞉liki kuo꞉ya꞉li sen. 11 Ka꞉ina꞉n kaluka꞉isale a꞉namilo꞉ sen a꞉ma꞉yo꞉, nofolakilo꞉ ya꞉fodab a꞉no꞉ ba꞉da꞉sa꞉ga꞉ a꞉la꞉sio꞉, “Isib kaluwo꞉ alan nofolaki ya꞉fodab.” A꞉la꞉gabi ba꞉da꞉sa꞉ga꞉yo꞉, iliyo꞉ hen a꞉no꞉ A꞉ibol-Mislaim a꞉la꞉wikilo꞉. Hen a꞉no꞉ ho꞉n Yodan a꞉no꞉ nodowa a꞉lab. 12-13 [b]A꞉la꞉go꞉ko꞉lo꞉ Ya꞉koba꞉ insiso꞉i iliyo꞉ elo꞉ tamin amilo꞉ imo꞉lo꞉ dinali sio꞉ au dimidaki, iliyo꞉ ene do꞉mo꞉wo꞉ Ka꞉ina꞉n hena a꞉ma꞉la꞉ dia꞉ha꞉na꞉sa꞉ga꞉, Mamele hen doba꞉da꞉, Makbela hen a꞉namio꞉, u a us a꞉nami dali alifa꞉. Tamin amio꞉ hen a꞉no꞉ Hit kalu Eflon eno꞉ ko꞉lo꞉ Ablaham eyo꞉ ilo꞉ dali alita꞉mela꞉no꞉ hen ko꞉lo꞉ kilili. 14 Yosa꞉b eyo꞉ iyayo꞉ dali alita꞉ga꞉yo꞉, e o꞉lia꞉, ene ao i o꞉lia꞉, a꞉la꞉ta꞉ga꞉ egeledo꞉ ane a꞉no꞉ tambo a꞉ma꞉la꞉ Isib ane.

15 Ili iyayo꞉ sowa꞉sa꞉ga꞉ dowabikiyo꞉, Yosa꞉ba꞉ ao iyo꞉ egelebo꞉ nenelaki a꞉la꞉sio꞉, “Wai! Yosa꞉bo꞉lo꞉ mogago꞉ nililo꞉ dimido꞉ a꞉no꞉ eyo꞉ o꞉asulufo꞉la꞉ga꞉yo꞉, nimo꞉wo꞉ a꞉ma꞉la꞉yo꞉ wa꞉dema꞉nigaba꞉le?” 16-17 Iliyo꞉ a꞉la꞉bo꞉ asula꞉sa꞉ga꞉, Yosa꞉b emo꞉wo꞉ towo꞉ a꞉la꞉saga꞉fo꞉, “Go꞉la꞉yo꞉ o꞉soma꞉ni ilikiyo꞉, nimo꞉wo꞉ a꞉la꞉dinali sio꞉, ‘Giliyo꞉ Yosa꞉bo꞉wo꞉ a꞉la꞉sa꞉la꞉bi, “Gao iya꞉lo꞉ gemo꞉lo꞉ hala dimido꞉ a꞉no꞉ giyo꞉ imo꞉wo꞉ foga꞉le sa꞉la꞉sa꞉ga꞉ ga꞉lila꞉bi.” ’ Go꞉la꞉yo꞉ a꞉la꞉sio꞉ ko꞉lo꞉, nilido꞉ mogago꞉ gemo꞉lo꞉ dimido꞉ a꞉no꞉ giyo꞉ mada ga꞉lila꞉ma꞉ki asulab.” Yosa꞉b eyo꞉ to ililo꞉ saga꞉fo꞉ a꞉no꞉ da꞉da꞉ga꞉yo꞉ ya꞉lo꞉. 18 Da꞉da꞉sa꞉ga꞉ elena, ao iyo꞉ Yosa꞉bdo꞉wa ya꞉ga꞉yo꞉, iyo꞉ hena tulu fufudaki a꞉la꞉sio꞉, “Nio꞉ gi madali nanog dian kaluwo꞉ o꞉li doma꞉no꞉.” 19 Ko꞉sega Yosa꞉b eyo꞉ a꞉ma꞉la꞉bo꞉ a꞉la꞉sio꞉, “Gio꞉ tagila꞉so꞉bo! Ne Gode o꞉ngo꞉ma ko꞉lo꞉ niyo꞉ giyo꞉ mo꞉wa꞉dema꞉no꞉. 20 Giliyo꞉ ne mogaima꞉no꞉ asulaki dimido꞉ ko꞉sega, gililo꞉ nemo꞉lo꞉ mogago꞉ dimido꞉ a꞉ma꞉yo꞉ Gode eyo꞉ a꞉nodola꞉sa꞉ga꞉ ne amio꞉ nanog nafa fa꞉la꞉doma꞉ki ta꞉fo꞉. Kaluka꞉isale modo꞉wo꞉ sowabena꞉ki, kelego꞉ ko꞉lilo꞉ nelo꞉ elendo꞉ amilo꞉ fa꞉la꞉dosdo꞉ a꞉no꞉ Godeya꞉ ene da꞉fe alifa꞉ ko꞉lo꞉, kelego꞉ o꞉gdo꞉ fa꞉la꞉dosda꞉i mio꞉ a꞉no꞉ gio꞉ ba꞉dab. 21 A꞉la꞉fo꞉ko꞉lo꞉ gio꞉ kele asula꞉so꞉bo. Gio꞉lo꞉ gini so꞉wayo꞉lo꞉ kelego꞉ aundo꞉ma dowab a꞉no꞉ niyo꞉ dimida mea꞉mela꞉no꞉.” A꞉la꞉gakiyo꞉ Yosa꞉b eyo꞉ ao iyo꞉ ha꞉sa mesea꞉ki ha꞉nolo sio꞉.

22 Yosa꞉b e Isib hen a꞉naka sen, a꞉la꞉ta꞉ga꞉ iyaya꞉ eso꞉lo꞉wo꞉lo꞉ hen a꞉naka sen. Yosa꞉b e donayo꞉ 110 a꞉la꞉fo꞉ gulula꞉. 23 Yosa꞉b e ene A꞉flama꞉ inso꞉ o꞉lia꞉ a꞉ma꞉ inso꞉wo꞉lo꞉ ba꞉ba꞉ a꞉la꞉ta꞉ga꞉ Manasaya꞉ inso꞉ Makila꞉ ene inso꞉wo꞉ sa꞉la꞉liab amio꞉, so꞉wa a꞉no꞉ eno꞉le a꞉la꞉widaki, Yosa꞉b eyo꞉ ta꞉ulia꞉ga꞉ fo꞉fo꞉le asi. 24 Yosa꞉b eyo꞉ ao imo꞉wo꞉ a꞉la꞉sio꞉, “Ne ko꞉na꞉ma soma꞉nigo꞉l ko꞉sega, Gode eyo꞉ gio꞉ asuwa꞉fa꞉ni mia꞉ib ko꞉lo꞉, Ablahambo꞉lo꞉, Aisa꞉gbo꞉lo꞉, Ya꞉kobo꞉lo꞉ dinali sio꞉ hen a꞉na, a꞉ma꞉la꞉ tililia꞉ga꞉ ha꞉na꞉ib.” 25 [c]A꞉la꞉ta꞉ga꞉ Yosa꞉b eyo꞉ Isolael eso꞉lo꞉mo꞉wo꞉ a꞉la꞉sio꞉, “Gode eyo꞉ gio꞉ mada asuwa꞉fa꞉ib ko꞉lo꞉, gio꞉ Isibo꞉ ta꞉ta꞉ga꞉ ha꞉nakiyo꞉, ni kiyo꞉ dia꞉ga꞉ ha꞉na꞉no꞉ a꞉la꞉liki nemo꞉wo꞉ dinali sama.” 26 A꞉la꞉fo꞉ko꞉lo꞉ Yosa꞉b e donayo꞉ 110 a꞉la꞉fo꞉wo꞉ gulula꞉sa꞉ga꞉ sowabiki, ene do꞉mo꞉wo꞉ mo꞉hesema꞉ki, mulumulo꞉wo꞉ e do꞉mo꞉wa mulula꞉sa꞉ga꞉, i bokisi usa disa꞉la꞉sa꞉ga꞉, Isib a꞉na dia꞉fo꞉len.

<- Mo꞉mo꞉do꞉ 49