2 Mo꞉mo꞉ 26.34Iso꞉ eyo꞉ Ka꞉ina꞉n gayo꞉ a꞉la꞉ ko꞉lo꞉ di. Nowo꞉ Ada, e Hit kalu Elona꞉ ida꞉ ko꞉lo꞉ di. Nowo꞉ Oholibama ko꞉lo꞉ di. Oholibamaya꞉ ene iyayo꞉ Ana, a꞉la꞉ta꞉ga꞉ Anaya꞉ ene iyayo꞉ Hifi kalu, Sibeon. 3 Mo꞉mo꞉ 28.9A꞉la꞉ta꞉ga꞉ ga elo꞉ di nowo꞉ Basemat, Ismaela꞉ ida꞉, Nebayoda꞉ ado. Ga otalen a꞉no꞉ Iso꞉wa꞉ di. 4 Ada eyo꞉ Elifas ko꞉lo꞉ sa꞉la꞉li, a꞉la꞉ta꞉ga꞉ Basemat eyo꞉ Luel ko꞉lo꞉ sa꞉la꞉li. 5 Oholibama eyo꞉ Yeus, Yalam, o꞉lia꞉ Kola sa꞉la꞉li. Iso꞉ e Ka꞉ina꞉n hen a꞉na siliki, kalu so꞉wa we a꞉na sa꞉la꞉la꞉. 6-7 Iso꞉wa꞉ no꞉ fofo꞉ o꞉lia꞉ Ya꞉koba꞉ no꞉ fofo꞉ o꞉lia꞉yo꞉ imili ka mesa꞉no꞉wo꞉ heno꞉ mo꞉ililabiki, a꞉la꞉yo꞉ a꞉na aloba꞉da꞉sa꞉ga꞉, Iso꞉ e hen nowa mesa꞉ni ane. Iso꞉ e inga o꞉lia꞉, inso꞉ o꞉lia꞉, ida꞉la꞉la꞉ o꞉lia꞉, egeledo꞉ sen kaluka꞉isale tambo a꞉la꞉ta꞉ga꞉, kao o꞉lia꞉ no꞉ fofo꞉wo꞉ tambo a꞉la꞉ta꞉ga꞉, kelego꞉ tambo elo꞉ Ka꞉ina꞉n hen a꞉namilo꞉ di a꞉no꞉lia꞉yo꞉ dimidalia꞉sa꞉ga꞉yo꞉, Ya꞉kobo꞉ ta꞉ta꞉sa꞉ga꞉, e heno꞉ ko꞉na꞉ mesa꞉ni ane. 8 A꞉la꞉fo꞉ko꞉lo꞉ Iso꞉ e Ya꞉kobo꞉ ta꞉ta꞉sa꞉ga꞉, Seil hen misio꞉ doba꞉da꞉ mesa꞉ni ane. Iso꞉ ene wi nowo꞉ Idom a꞉la꞉sa꞉lan.
9 Iso꞉ ene eso꞉lo꞉ ta꞉i ane malolo꞉wo꞉ we. Iso꞉ e Seil hena siliki, Idom kaluka꞉isaleyo꞉ a꞉na mo꞉mo꞉da fa꞉la꞉dowo꞉. 10 Iso꞉wa꞉ insiso꞉iya꞉ wiyo꞉ we. Elifas, Iso꞉wa꞉ inga Adaya꞉ inso꞉ a꞉la꞉ta꞉ga꞉ Luel, Iso꞉wa꞉ inga Basemata꞉ inso꞉. 11 Elifasa꞉ inso꞉wo꞉ Teman, Omal, Sefo, Gatam, a꞉la꞉ta꞉ga꞉ Kenas. 12 Iso꞉wa꞉ inso꞉ Elifas eyo꞉ ene nanog dian ga, Timna di ko꞉lo꞉, Timna eyo꞉ kalu so꞉wa, Amaleg sa꞉la꞉li. A꞉la꞉fo꞉ko꞉lo꞉ so꞉wa i a꞉no꞉ Iso꞉wa꞉ inga, Ada eya a꞉la꞉ta꞉ga꞉ fa꞉la꞉dowo꞉. 13 A꞉la꞉ta꞉ga꞉ Luela꞉ inso꞉wo꞉ we. Nahat, Sa꞉la, Sama, a꞉la꞉ta꞉ga꞉ Misa. So꞉wa i wema꞉ inuwo꞉ Iso꞉wa꞉ inga, Basemat. 14 Iso꞉wa꞉ inga Oholibamaya꞉ iyayo꞉ Ana a꞉la꞉ta꞉ga꞉ Anaya꞉ iyayo꞉ Sibeon. Oholibamaya꞉ inso꞉wo꞉ we. Yeus, Yalam o꞉lia꞉ Kola.
15-16 So꞉lo꞉ ko꞉li ko꞉lilo꞉ Iso꞉wa꞉ inso꞉wa fa꞉la꞉dowo꞉ a꞉ma꞉ wiyo꞉ we. Iso꞉wa꞉ inga Adaya꞉ ene so꞉wa wa꞉la꞉bo꞉ Elifas, a꞉na a꞉la꞉ta꞉ga꞉yo꞉ Teman kaluka꞉isaleyo꞉, Omal kaluka꞉isaleyo꞉, Sefo kaluka꞉isaleyo꞉, Kenas kaluka꞉isaleyo꞉, Kola kaluka꞉isaleyo꞉, Gatam kaluka꞉isaleyo꞉, a꞉la꞉ta꞉ga꞉ Amaleg kaluka꞉isaleyo꞉. Kaluka꞉isale i a꞉no꞉ Idom hen a꞉na sa꞉sen. 17 A꞉la꞉ta꞉ga꞉ Iso꞉wa꞉ inga Basemat ene so꞉wa Luel a꞉na a꞉la꞉ta꞉ga꞉yo꞉, so꞉lo꞉ ko꞉li ko꞉lilo꞉ fa꞉la꞉dowo꞉ a꞉ma꞉ wiyo꞉ we. Nahat kaluka꞉isaleyo꞉, Sa꞉la kaluka꞉isaleyo꞉, Sama kaluka꞉isaleyo꞉, a꞉la꞉ta꞉ga꞉ Misa kaluka꞉isaleyo꞉. Kaluka꞉isale i a꞉no꞉lo꞉ Idom hen a꞉na sa꞉sen. 18 Iso꞉wa꞉ inga Oholibama a꞉no꞉ Anaya꞉ ene ida꞉ ko꞉lo꞉, ga eya a꞉la꞉ta꞉ga꞉yo꞉ so꞉lo꞉ ko꞉li ko꞉lilo꞉ fa꞉la꞉dowo꞉ a꞉ma꞉ wiyo꞉ we. Yeus kaluka꞉isaleyo꞉, Yalam kaluka꞉isaleyo꞉, a꞉la꞉ta꞉ga꞉ Kola kaluka꞉isaleyo꞉. 19 Kaluka꞉isale so꞉lo꞉ ko꞉li ko꞉lilo꞉ kandayo꞉ a꞉ma꞉ ema꞉muwo꞉ Iso꞉. A꞉la꞉ta꞉ga꞉ Iso꞉wa꞉ ene wi nowo꞉ Idom.
20-21 Iso꞉ e Idom hen a꞉namilo꞉ fa꞉la꞉dowab ho꞉len a꞉namio꞉, Hol kalu nowo꞉ Seil e a꞉na sa꞉sen. Seila꞉ ene inso꞉wo꞉ hendo꞉ biso꞉ ko꞉lo꞉ ili wiyo꞉ we. Lotan, Sobal, Sibeon, Ana, Dison, Esel o꞉lia꞉ Disan. Kalu i a꞉na a꞉la꞉ta꞉ga꞉yo꞉ so꞉lo꞉ ko꞉li ko꞉lilo꞉ fa꞉la꞉dowo꞉ ko꞉lo꞉ iyo꞉ Idom hen a꞉na silikiyo꞉, ini so꞉lo꞉wo꞉ us a꞉namio꞉ misa꞉ kalu ina꞉li ina꞉lile fa꞉la꞉dowo꞉. 22 Lotana꞉ inso꞉wo꞉ Holi o꞉lia꞉ Heman. Lotana꞉ ene adowo꞉ Timna. 23 Sobal inso꞉wo꞉ Alban, Manahat, Ebal, Sefo, o꞉lia꞉ Onam. 24 Sibeona꞉ inso꞉wo꞉ Aia o꞉lia꞉ Ana. Anayo꞉ kalulo꞉ma hena iyaya꞉ donki bo꞉fo꞉liki, ho꞉n si ofo꞉ a꞉no꞉ e ko꞉le ba꞉ba꞉. 25 Anaya꞉ inso꞉wo꞉ wiyo꞉ we Dison, a꞉la꞉ta꞉ga꞉ ida꞉yo꞉ Oholibama. 26 Disona꞉ insiso꞉ima꞉ wiyo꞉ we, Hemdan, Esban, Itlan, o꞉lia꞉ Kelan. 27 Esela꞉ insiso꞉ima꞉ wiyo꞉ we, Bilhan, Safan, o꞉lia꞉ Akan. 28 Disana꞉ inso꞉ a꞉la꞉yo꞉ we, nowo꞉ Us, nowo꞉ Alan. 29-30 A꞉la꞉fo꞉ko꞉lo꞉ Seil hen amilo꞉, Hol kaluka꞉isale iya a꞉la꞉ta꞉ga꞉yo꞉ so꞉lo꞉ ko꞉li ko꞉lilo꞉ fa꞉la꞉dowo꞉ a꞉ma꞉ wiyo꞉ we, Lotan, Sobal, Sibeon, Ana, Dison, Esel, o꞉lia꞉ Disan.
31 Isolael kaluka꞉isale a꞉no꞉ misa꞉ kalu alan noma꞉lo꞉ mo꞉bo꞉fo꞉len ho꞉len amio꞉, Idom hen amilo꞉ misa꞉ kalu alan fa꞉la꞉dowo꞉wo꞉ we. 32 Bela, Beola꞉ inso꞉ a꞉no꞉ Idom kaluka꞉isaleya꞉ misa꞉ kaluwo꞉ e dowo꞉. Ene amisa꞉n wiyo꞉ Dihaba. 33 Bela e sowabikiyo꞉, Bosla amisa꞉n kalu Selaya꞉ inso꞉ Yobab e misa꞉ kalu ko꞉lo꞉ a꞉dowo꞉. 34 Yobab e sowabikiyo꞉, Teman kalu Husam e misa꞉ kalu a꞉dowo꞉. 35 Husam e sowabikiyo꞉, Bedada꞉ inso꞉ Hadad e misa꞉ kalu a꞉dowo꞉ ko꞉lo꞉, ene amisa꞉n wiyo꞉ Afit. Bedad e Moab hen a꞉namilo꞉ Midian kalu o꞉lia꞉lo꞉ bubo꞉ amio꞉, e tinio꞉. 36 Hadad e sowabikiyo꞉, Maseleka kalu Samla e misa꞉ kalu a꞉dowo꞉. 37 Samla e sowabikiyo꞉, So꞉l e misa꞉ kalu dowo꞉. So꞉l e Lehobod amisa꞉n, Yufuletis ho꞉n doba꞉da꞉ sa꞉sen. 38 So꞉l e sowabikiyo꞉, Agbola꞉ inso꞉, Bal Hanan e misa꞉ kalu dowo꞉. 39 Agbola꞉ inso꞉ Bal Hanan e sowabikiyo꞉, Hadal e misa꞉ kalu dowo꞉. Hadal ene amisa꞉n wiyo꞉ Bau a꞉la꞉ta꞉ga꞉ ene ingaya꞉ wiyo꞉ Mehetabel. Mehetabela꞉ anowo꞉ Mateled a꞉la꞉ta꞉ga꞉ ene inuwo꞉ Mesahab.
40-43 A꞉la꞉fo꞉ko꞉lo꞉ Iso꞉ eya a꞉la꞉ta꞉ga꞉yo꞉, so꞉lo꞉ ko꞉li ko꞉lilo꞉ fa꞉la꞉dowo꞉ a꞉ma꞉ wiyo꞉ we. Timna kaluka꞉isale, Alba kaluka꞉isale, Yehed kaluka꞉isale, Oholibama kaluka꞉isale, Ela kaluka꞉isale, Binon kaluka꞉isale, Kenas kaluka꞉isale, Teman kaluka꞉isale, Mibsal kaluka꞉isale, Magdiel kaluka꞉isale, a꞉la꞉ta꞉ga꞉ Ilam kaluka꞉isale. So꞉lo꞉ ina꞉lilo꞉ amilo꞉ wi a꞉no꞉ tambo, so꞉lo꞉ a꞉ma꞉ misa꞉ kaluwa꞉ wiyo꞉ o꞉m. So꞉lo꞉ ko꞉li ko꞉lilo꞉ i a꞉no꞉ hen inido꞉ a꞉na silikiyo꞉, iyo꞉ tambo Idom hen a꞉na sa꞉sen. A꞉la꞉ta꞉ga꞉ Idom kaluka꞉isaleyo꞉ tambo Iso꞉ eya a꞉la꞉ta꞉ga꞉ fa꞉la꞉dowo꞉.
<- Mo꞉mo꞉do꞉ 35Mo꞉mo꞉do꞉ 37 ->