1 Yawe eyo꞉ Selayo꞉ sagale alitaki ya꞉sa꞉ga꞉yo꞉, tamin amilo꞉ enedo꞉ dinali sio꞉ a꞉no꞉ hendele dimido꞉. 2 [a]A꞉la꞉go꞉ko꞉lo꞉ Godeya꞉lo꞉ da꞉fe sio꞉ ho꞉len a꞉no꞉ fa꞉la꞉dowabiki, Ablaham e anaso꞉ dowa꞉sen ami, Sa꞉la e alela꞉sa꞉ga꞉, kalu so꞉wayo꞉ emo꞉ sa꞉la꞉me. 3 Sa꞉la elo꞉ so꞉wa sa꞉la꞉me a꞉no꞉, Ablaham eyo꞉ ene wiyo꞉ Aisa꞉g wikilo꞉. 4 [b]So꞉walo꞉ sa꞉la꞉li a꞉na a꞉la꞉ta꞉ga꞉ ho꞉len agelo꞉wo꞉ o fa꞉la꞉dowabikiyo꞉, Godeya꞉lo꞉ emo꞉lo꞉ saefa꞉ au dimidaki, eyo꞉ so꞉wa a꞉no꞉ do꞉go꞉fo꞉ hege gedeo꞉. 5 Aisa꞉gdo꞉ sa꞉la꞉li ho꞉len a꞉namio꞉, Ablaham e donayo꞉ do꞉la꞉lowo꞉wo꞉ do꞉la꞉fo꞉ ko꞉lo꞉ gulula꞉. 6 A꞉la꞉ta꞉ga꞉ Sa꞉la eyo꞉ a꞉la꞉sio꞉, “Gode eyo꞉ ne sagale alitaki o꞉gema꞉ki ta꞉fo꞉[c] ko꞉lo꞉, kaluka꞉isale nolba꞉yo꞉ Godeya꞉lo꞉ dimido꞉ a꞉no꞉ da꞉da꞉ga꞉yo꞉, ne o꞉lia꞉yo꞉ sagalaki o꞉gema꞉ib.” 7 A꞉la꞉ta꞉ga꞉ eyo꞉ towo꞉ a꞉kudu sa꞉laki, “Tamin amio꞉ kaluka꞉isaleya꞉ sa꞉lakiyo꞉, ‘Sa꞉la e Ablaham emo꞉wo꞉ so꞉wayo꞉ mo꞉sa꞉la꞉meaki, bowo꞉lo꞉ mada mo꞉mea꞉ib’ a꞉la꞉asulaki sa꞉la꞉len. Ko꞉sega Ablaham e anaso꞉ dowa꞉sen ami, niyo꞉ kalu so꞉wayo꞉ emo꞉wo꞉ sa꞉la꞉me” Sa꞉la eyo꞉ a꞉la꞉sio꞉.

8 A꞉la꞉ta꞉ga꞉ Aisa꞉g e anayaki bo na꞉leno꞉ edabikiyo꞉, Ablaham eyo꞉ kaluka꞉isaleyo꞉ tambo kegea꞉sa꞉ga꞉, ma꞉no꞉wo꞉ alan dowo꞉taki sagala꞉li mo꞉no꞉.

9-10 [d]Isib ka꞉isale, Ha꞉ga elo꞉ Ablahambo꞉lo꞉ so꞉wa sa꞉la꞉me a꞉ma꞉yo꞉ Aisa꞉g emo꞉lo꞉ dio꞉ge sa꞉lab a꞉no꞉ Selayo꞉ da꞉da꞉sa꞉ga꞉, eyo꞉ Ablahambo꞉wo꞉ a꞉la꞉sio꞉, “Nanog dian ka꞉isaleya꞉ inso꞉ a꞉no꞉, ni so꞉wa Aisa꞉g o꞉lia꞉yo꞉ dabuno꞉ mo꞉alobanama꞉ki asulab ko꞉lo꞉, giyo꞉ nanog dian ka꞉isale o꞉lia꞉ ene inso꞉ a꞉no꞉lia꞉yo꞉ ta꞉taki, ko꞉na꞉ iliga꞉foma” a꞉la꞉sio꞉. 11 Sa꞉la elo꞉ to sio꞉ a꞉no꞉ Ablaham e da꞉da꞉sa꞉ga꞉, ene so꞉wa asulakiyo꞉, e mo꞉beaki kele asulo꞉wo꞉ alan dowo꞉. 12 [e]Ko꞉sega Gode eyo꞉ Ablaham emo꞉wo꞉ a꞉la꞉sio꞉, “Giyo꞉ nanog dian ga o꞉lia꞉ ene so꞉wa o꞉lia꞉ a꞉no꞉ mo꞉beakiyo꞉ kele asula꞉so꞉bo. Sa꞉la elo꞉ gemo꞉lo꞉ sa꞉lab o꞉leau dimidama. Mo꞉wo꞉ Aisa꞉g eya a꞉la꞉ta꞉ga꞉yo꞉ gi so꞉lo꞉wo꞉ a꞉na fa꞉la꞉doma꞉ib. 13 A꞉la꞉ta꞉ga꞉ niyo꞉ nanog ka꞉isaleya꞉ so꞉wa eya a꞉la꞉ta꞉ga꞉yo꞉lo꞉, kaluka꞉isaleyo꞉ modo꞉ fa꞉la꞉doma꞉ki dimidama꞉no꞉, mo꞉wo꞉ so꞉wa a꞉no꞉ geya a꞉la꞉ta꞉ga꞉ fa꞉la꞉dowo꞉.” Gode eyo꞉ a꞉la꞉sio꞉. 14 Kea꞉fole dowabiki, Ablaham e dasila꞉sa꞉ga꞉, ma꞉no꞉ o꞉lia꞉ no꞉ do꞉go꞉f amilo꞉ ho꞉n wasu o꞉lia꞉yo꞉ Ha꞉ga e kelena ga꞉li alitakiyo꞉, so꞉wa a꞉no꞉ e o꞉lia꞉ hamana꞉ki iliga꞉fo꞉. A꞉la꞉yo꞉ ha꞉nakiyo꞉, Bilsiba kalulo꞉ma hen a꞉na nodola꞉li sia꞉len.

15-16 A꞉la꞉yo꞉ sia꞉labiki, no꞉ do꞉go꞉f amilo꞉ ho꞉n wasu a꞉no꞉ kedefo꞉ ko꞉lo꞉, eyo꞉ so꞉wa a꞉no꞉ i galindo꞉ a꞉lab ha꞉g a꞉na ta꞉fo꞉. So꞉wayo꞉ a꞉na ta꞉taki, eyo꞉ a꞉la꞉asulo꞉, “No꞉no꞉no꞉ so꞉wa sowab a꞉no꞉ mo꞉ba꞉ba꞉no꞉” a꞉la꞉asulakiyo꞉, e o꞉fina꞉sa꞉ga꞉ ina꞉li mesa꞉ni ane. E a꞉na siliki ya꞉la꞉len. 17 Gode eyo꞉ kalu so꞉wa a꞉ma꞉lo꞉ ya꞉lab a꞉no꞉ dabu ko꞉lo꞉, Godeya꞉ ene ma꞉mul kalu a꞉ma꞉yo꞉ Hebene a꞉la꞉ta꞉ga꞉ Ha꞉ga emo꞉wo꞉ a꞉la꞉sio꞉, “Ha꞉ga, ge waigo꞉wo꞉? Ge tagila꞉so꞉bo! Kalu so꞉wa honona silikilo꞉ ya꞉la꞉lab a꞉no꞉ Gode eyo꞉ dabu. 18 E sowabena꞉kiyo꞉, ge dasilia꞉ ha꞉na꞉ga꞉, so꞉wa a꞉ma꞉ ene dagiya gasilia꞉ga꞉ e asulo꞉wo꞉ halale alifoma. Niyo꞉ eya a꞉la꞉ta꞉ga꞉yo꞉ kaluka꞉isaleyo꞉ modo꞉ fa꞉la꞉doma꞉ki ta꞉fa꞉no꞉.” 19 A꞉la꞉salitakiyo꞉ Gode eyo꞉ Ha꞉gaya꞉ ene siyo꞉ kolaetabikiyo꞉, e ho꞉n daido꞉wo꞉ a꞉na ba꞉ba꞉. Ba꞉da꞉ga꞉yo꞉ e ha꞉na꞉ga꞉, ho꞉no꞉ no꞉ do꞉go꞉fa wasulia꞉ga꞉, inso꞉mo꞉ maiya꞉ki dimi. 20 A꞉la꞉ta꞉ga꞉ Gode eyo꞉ so꞉wa a꞉no꞉ tili dowabikiyo꞉, e a꞉na anayo꞉. E kalulo꞉ma hen a꞉na ilikiyo꞉, e da꞉lo꞉ sandima꞉no꞉ asulo꞉ kalu fa꞉la꞉dowo꞉. 21 E Balan kalulo꞉ma hen a꞉na silikiyo꞉, ene anowa꞉yo꞉ e Isib ga dima꞉ki nenela꞉sa꞉ga꞉, tili alifa꞉.

22 [f]Ho꞉len no amio꞉, Abimeleg o꞉lia꞉ ene ame misa꞉ kaluwo꞉, Fikol o꞉lia꞉ma꞉yo꞉ Ablahambo꞉wo꞉ a꞉la꞉sio꞉, “Godeyo꞉ ge o꞉lia꞉ a꞉lab ko꞉lo꞉, kelego꞉ tambo gilo꞉ dimida꞉lab a꞉no꞉ nafale fa꞉la꞉dowa꞉sen. 23 A꞉la꞉fo꞉ko꞉lo꞉ giyo꞉ nemo꞉wo꞉lo꞉, ni so꞉wamo꞉wo꞉lo꞉, ni ma꞉mu imo꞉wo꞉lo꞉, dikidan man mo꞉dimida꞉mela꞉no꞉ a꞉la꞉likiyo꞉, giyo꞉ Godeya꞉ siwa꞉l amio꞉ nemo꞉wo꞉ dinali salifo꞉ma꞉ki asulo꞉l. Ko꞉sega nilo꞉ gemo꞉lo꞉ ha꞉fo꞉ disa꞉lan aumbo꞉, giyo꞉lo꞉ nimo꞉wo꞉lo꞉ ha꞉fo꞉wo꞉ a꞉la꞉disa꞉la꞉lubi. A꞉la꞉ta꞉ga꞉ hen wenamio꞉ ge mageso꞉ kalu o꞉ngo꞉ sen ko꞉lo꞉, giyo꞉ kaluka꞉isale hen wenamilo꞉ sab imo꞉wo꞉lo꞉ ha꞉fo꞉ disa꞉la꞉lubi. Giyo꞉ a꞉la꞉dinali sama” a꞉la꞉sio꞉. 24 A꞉la꞉sa꞉labiki Ablaham eyo꞉ a꞉ma꞉la꞉ sa꞉laki, “Niyo꞉ a꞉la꞉dimidama꞉no꞉,” a꞉la꞉dinali sio꞉.

25 Ko꞉sega Abimelega꞉ ene nanogdo꞉ dian kalu nolo꞉ ya꞉ga꞉, Ablahama꞉ ho꞉n daido꞉ imilig nowo꞉ ili bo꞉fo꞉mela꞉niki di ko꞉lo꞉, eyo꞉ Abimelegbo꞉wo꞉ towo꞉ hida꞉gi sio꞉. 26 Abimelegbo꞉wo꞉ hida꞉gi sa꞉labiki, eyo꞉ a꞉ma꞉la꞉ sa꞉laki, “Giyo꞉ tamin amio꞉ nemo꞉wo꞉ mo꞉sio꞉ ko꞉lo꞉ ne mada mo꞉dabu eleno꞉, o꞉gka do꞉do꞉l. O꞉lo꞉ dimido꞉wo꞉lo꞉ ne babalab” Abimeleg eyo꞉ a꞉la꞉sio꞉. 27 A꞉la꞉sa꞉labiki Ablaham eyo꞉ sibi o꞉lia꞉ kao o꞉lia꞉yo꞉ dia꞉ga꞉, Abimelegbo꞉ dimiabiki, a꞉la꞉yo꞉ asulo꞉wo꞉ imilise dowaki, towo꞉ a꞉na dinali saefa꞉. 28 Towo꞉ saeta꞉ga꞉yo꞉, Ablaham eyo꞉ sibi mala kalofo dom a꞉la꞉fo꞉ nolo꞉ aloba꞉da꞉sa꞉ga꞉, nodowa ta꞉fo꞉. 29 Sibi a꞉no꞉ ba꞉dakiyo꞉, Abimeleg eyo꞉ Ablahambo꞉wo꞉ a꞉la꞉dabu ba꞉daki, “Gilo꞉ sibi nolo꞉ aloba꞉da꞉sa꞉ga꞉lo꞉ ta꞉fo꞉ hono, mo꞉wo꞉ ha꞉?” 30 Ablaham eyo꞉ a꞉ma꞉la꞉bo꞉ a꞉la꞉sio꞉, “Ho꞉n we ni daido꞉ ko꞉lo꞉, kaluka꞉isaleya꞉yo꞉ hendele na꞉no꞉lo꞉b a꞉la꞉asuluma꞉ki, sibi kalofo dom a꞉la꞉fo꞉ we, ge dima” a꞉la꞉sio꞉. 31 A꞉la꞉go꞉ko꞉lo꞉ a꞉la꞉ma꞉yo꞉ towo꞉ hen a꞉na dinali saefa꞉ ko꞉lo꞉ hen a꞉no꞉ wiyo꞉ Bilsiba[g] a꞉la꞉wikilo꞉. 32 A꞉la꞉yo꞉ Bilsiba hen a꞉namio꞉ dinali saeta꞉ga꞉yo꞉, Abimeleg o꞉lia꞉ ene ame misa꞉ kalu Fikol o꞉lia꞉yo꞉, Filistia kaluka꞉isaleya꞉ hen a꞉na a꞉ma꞉la꞉ ane. 33 A꞉la꞉yo꞉ a꞉ma꞉la꞉ ha꞉nabiki, Ablaham eyo꞉ i nowo꞉ Bilsiba a꞉na gelo꞉ ko꞉lo꞉, eyo꞉ Yawemo꞉ dulugu sa꞉laki, ene wiyo꞉ “Gode Mela꞉no꞉ Mela꞉no꞉ A꞉lab” a꞉la꞉sio꞉. 34 A꞉la꞉fo꞉ko꞉lo꞉ Ablaham e Filistia hen a꞉namio꞉, ho꞉leno꞉ modo꞉wo꞉ a꞉na elen.

<- Mo꞉mo꞉do꞉ 20Mo꞉mo꞉do꞉ 22 ->