1 Tamin amio꞉ henfelo꞉ kaluka꞉isale tambo towo꞉ imilise elen. 2 Kaluka꞉isaleyo꞉ ofdo꞉ yan doba꞉da꞉ ta꞉i ha꞉na꞉sa꞉ga꞉, hen fua꞉lo꞉wa fa꞉la꞉dowa꞉sa꞉ga꞉, a꞉na asifo꞉. Hen a꞉ma꞉ wiyo꞉ Sinal. 3 Iyo꞉ a꞉na silikiyo꞉, egele nenelakiyo꞉ a꞉la꞉sio꞉, “Niliyo꞉ ko꞉fo꞉ tamo dola꞉sa꞉sa꞉ga꞉, halaido꞉ fa꞉la꞉doma꞉ki, deya so꞉fa꞉niki” a꞉la꞉sio꞉. A꞉la꞉fo꞉ko꞉lo꞉ iliyo꞉ ayo꞉ uwa꞉yo꞉ mo꞉dia꞉no꞉ dowabiyo꞉, ko꞉fa꞉yo꞉ ayo꞉ a꞉na dimido꞉. A꞉la꞉ta꞉ga꞉ ko꞉f so꞉fa꞉ a꞉no꞉ kuduma꞉kiyo꞉, oga꞉dan kelego꞉ nowo꞉ di. 4 Iliyo꞉ a꞉la꞉sio꞉, “Nini amisa꞉no꞉ dimidama꞉niki. Us a꞉namio꞉, a alan badio꞉ nowo꞉, walala꞉li dia꞉i fa꞉la꞉ ha꞉na꞉la꞉ga꞉ akina fa꞉la꞉doma꞉niki. Henfelo꞉ amio꞉ hen ko꞉li ko꞉lilo꞉ amio꞉ dalale ha꞉nabena꞉ki, nio꞉ wabulun wilo꞉ mesa꞉niki, niliyo꞉ nanogo꞉ a꞉la꞉dimidama꞉no꞉.” 5 Gode Yawe eyo꞉ henfelo꞉ kaluka꞉isaleya꞉lo꞉ amisa꞉n o꞉lia꞉ a alan badio꞉ o꞉lia꞉ diab a꞉no꞉ ko꞉lo꞉ ba꞉ba꞉ni mio꞉. 6 Yawe eyo꞉ ba꞉da꞉sa꞉ga꞉ a꞉la꞉sio꞉, “Amayo꞉, kaluka꞉isale wema꞉yo꞉ so꞉lo꞉wo꞉ imilise a꞉la꞉ta꞉ga꞉ towo꞉ imilise dowab. A꞉la꞉ta꞉ga꞉ ililo꞉ nanogo꞉ dimidab we, mo꞉mo꞉da꞉sa꞉ga꞉yo꞉ semo꞉ kedefo꞉ ko꞉lo꞉, tif amio꞉ inido꞉ dimidama꞉no꞉ saetab a꞉no꞉ tambo dimida꞉i ha꞉na꞉ib. 7 A꞉la꞉gabo꞉lo꞉biki, nio꞉ tina꞉sa꞉ga꞉yo꞉, egeledo꞉ to sa꞉lab a꞉no꞉ babale doma꞉ki, ililo꞉ to sa꞉lab a꞉no꞉ niliyo꞉ to ko꞉li ko꞉lilo꞉ dia꞉fa꞉no꞉.” Yawe eyo꞉ a꞉la꞉sio꞉. 8 A꞉la꞉dimida꞉sa꞉ga꞉yo꞉ Yawe eyo꞉ iyo꞉ alobandakiyo꞉, henfelo꞉ amio꞉ hen ko꞉li ko꞉lilo꞉wa hamana꞉ki iliga꞉fo꞉ ko꞉lo꞉, amisa꞉n ilido꞉ dimida꞉len a꞉no꞉ ka ta꞉fo꞉. 9 A꞉la꞉fo꞉ko꞉lo꞉ amisa꞉n a꞉no꞉ “Babel” a꞉la꞉wikilo꞉. A꞉la꞉do꞉ sio꞉wo꞉ mo꞉wo꞉ we. Amisa꞉n a꞉namio꞉ Yawe eyo꞉ kaluka꞉isaleya꞉ towo꞉ babale alifa꞉. Hen a꞉na a꞉la꞉ta꞉ga꞉yo꞉, Yawe eyo꞉ kaluka꞉isaleyo꞉ henfelo꞉ amilo꞉ hen ko꞉li ko꞉lilo꞉wa ta꞉i hamana꞉ki iliga꞉felo꞉.

10 Sa꞉ma꞉ eso꞉lo꞉wa꞉ wi agelo꞉wo꞉ we. Ho꞉n galusana mio꞉wo꞉ dona a꞉la꞉yo꞉ ta꞉ta꞉ga꞉yo꞉, Sa꞉m e donayo꞉ 100 fa꞉la꞉dowabiki, Alabasad e a꞉na sa꞉la꞉li. 11 A꞉la꞉ta꞉ga꞉ Alabasad e sa꞉la꞉lia꞉sa꞉ga꞉yo꞉, Sa꞉m e donayo꞉ 500 a꞉la꞉fo꞉ a꞉no꞉ o꞉silikiyo꞉, kalu so꞉wa, ka꞉isale so꞉wa nolo꞉ a꞉na sa꞉la꞉li.

12 Alabasad e donayo꞉ 35 a꞉la꞉fo꞉wo꞉ ta꞉ta꞉ga꞉, Sa꞉la a꞉na sa꞉la꞉li. 13 A꞉la꞉ta꞉ga꞉ Sa꞉la sa꞉la꞉lia꞉sa꞉ga꞉yo꞉, Alabasad e donayo꞉ 403 a꞉la꞉fo꞉ a꞉no꞉ o꞉silikiyo꞉, kalu so꞉wa, ka꞉isale so꞉wa nolo꞉ a꞉na sa꞉la꞉li.

14 Sa꞉la e donayo꞉ 30 a꞉la꞉fo꞉wo꞉ ta꞉ta꞉ga꞉, Ebel a꞉na sa꞉la꞉li. 15 A꞉la꞉ta꞉ga꞉ Ebel sa꞉la꞉lia꞉sa꞉ga꞉yo꞉, Sa꞉la e donayo꞉ 403 a꞉la꞉fo꞉ a꞉no꞉ o꞉silikiyo꞉, kalu so꞉wa, ka꞉isale so꞉wa nolo꞉ a꞉na sa꞉la꞉li.

16 Ebel e donayo꞉ 34 a꞉la꞉fo꞉ ta꞉ta꞉ga꞉, Beleg a꞉na sa꞉la꞉li. 17 A꞉la꞉ta꞉ga꞉ Beleg sa꞉la꞉lia꞉sa꞉ga꞉yo꞉, Ebel e donayo꞉ 430 a꞉la꞉fo꞉ a꞉no꞉ o꞉silikiyo꞉, kalu so꞉wa, ka꞉isale so꞉wa nolo꞉ a꞉na sa꞉la꞉li.

18 Beleg e donayo꞉ 30 a꞉la꞉fo꞉wo꞉ ta꞉ta꞉ga꞉, Leu a꞉na sa꞉la꞉li. 19 A꞉la꞉ta꞉ga꞉ Leu sa꞉la꞉lia꞉sa꞉ga꞉yo꞉, Beleg e donayo꞉ 209 a꞉la꞉fo꞉ a꞉no꞉ o꞉silikiyo꞉, kalu so꞉wa, ka꞉isale so꞉wa nolo꞉ a꞉na sa꞉la꞉li.

20 Leu e donayo꞉ 32 a꞉la꞉fo꞉wo꞉ ta꞉ta꞉ga꞉, Selug a꞉na sa꞉la꞉li. 21 A꞉la꞉ta꞉ga꞉ Selug sa꞉la꞉lia꞉sa꞉ga꞉yo꞉, Leu e donayo꞉ 207 a꞉la꞉fo꞉ a꞉no꞉ o꞉silikiyo꞉, kalu so꞉wa, ka꞉isale so꞉wa nolo꞉ a꞉na sa꞉la꞉li.

22 Selug e donayo꞉ 30 a꞉la꞉fo꞉wo꞉ ta꞉ta꞉ga꞉, Nahol a꞉na sa꞉la꞉li. 23 A꞉la꞉ta꞉ga꞉ Nahol sa꞉la꞉lia꞉sa꞉ga꞉yo꞉, Selug e donayo꞉ 200 a꞉la꞉fo꞉ a꞉no꞉ o꞉silikiyo꞉, kalu so꞉wa, ka꞉isale so꞉wa nolo꞉ a꞉na sa꞉la꞉li.

24 Nahol e donayo꞉ 29 a꞉la꞉fo꞉wo꞉ ta꞉ta꞉ga꞉, Tela a꞉na sa꞉la꞉li. 25 A꞉la꞉ta꞉ga꞉ Tela sa꞉la꞉lia꞉sa꞉ga꞉yo꞉, Nahol e donayo꞉ 119 a꞉la꞉fo꞉ a꞉no꞉ o꞉silikiyo꞉, kalu so꞉wa, ka꞉isale so꞉wa nolo꞉ a꞉na sa꞉la꞉li.

26 Tela e donayo꞉ 70 a꞉la꞉fo꞉wo꞉ ta꞉ta꞉ga꞉, kalu so꞉wa otaleno꞉ sa꞉la꞉li. So꞉wa a꞉no꞉ wiyo꞉ Ablam, nowo꞉ Nahol, nowo꞉ Halan.

27 A꞉la꞉ta꞉ga꞉ Telaya꞉ eso꞉lo꞉wa꞉ wi agelo꞉wo꞉ we. Tela eyo꞉ so꞉wayo꞉ otalen ko꞉lo꞉ sa꞉la꞉li, Ablam, Nahol, Halan. Halan eyo꞉ Lod ko꞉lo꞉ sa꞉la꞉li. 28 Telayo꞉ o꞉sabikiyo꞉, inso꞉ Halan a꞉no꞉ ene hen Ul amisa꞉n, Kaldia hen a꞉na sen ami sowo꞉. 29 Ablam o꞉lia꞉ Nahol o꞉lia꞉yo꞉ gayo꞉ di. Ablam eyo꞉ Sa꞉lai di. Nahol eyo꞉ Milka di. Milka o꞉lia꞉ Iska o꞉lia꞉yo꞉ Halana꞉ ida꞉. 30 A꞉la꞉fo꞉ko꞉lo꞉ Sa꞉lai e fain dowaki, so꞉wayo꞉ mo꞉sa꞉la꞉li. 31 Tela eyo꞉ eso꞉lo꞉wo꞉ hen nowa tililia꞉gane. Telayo꞉, ene so꞉wa Ablamo꞉, e ma꞉mu Lod, Halana꞉ inso꞉wo꞉, ena꞉su Sa꞉lai, Ablama꞉ ingayo꞉, egele Ul Kaldia hen a꞉no꞉ ka ta꞉ta꞉ga꞉, Ka꞉ina꞉n hena hamana꞉ki tililia꞉gane. Ko꞉sega iyo꞉ ha꞉na꞉ga꞉yo꞉, Ka꞉ina꞉n amio꞉ mo꞉tigini fa꞉la꞉dowo꞉ ko꞉lo꞉, iyo꞉ Halan amisa꞉n a꞉na fa꞉la꞉dota꞉ga꞉ asifo꞉. 32 Tela e donayo꞉ 205 a꞉la꞉fo꞉wo꞉ ta꞉ta꞉ga꞉yo꞉, Tela e Halan amisa꞉n a꞉naka siliki sowo꞉.

<- Mo꞉mo꞉do꞉ 10Mo꞉mo꞉do꞉ 12 ->