1 Tamin amio꞉, gio꞉ Godemo꞉ ko꞉le dulugu sa꞉la꞉lubi. Kaluka꞉isaleyo꞉ tambo asuwa꞉takiyo꞉ halale alifoma꞉ki, Godemo꞉ to sa꞉la꞉bi. A꞉la꞉ta꞉ga꞉ Godeya꞉lo꞉ asuwa꞉ta꞉lab a꞉no꞉, mada o꞉m a꞉la꞉sa꞉la꞉bi. 2 Giliyo꞉ gamani misa꞉ kalu o꞉lia꞉ gamanilo꞉ bo꞉fo꞉lowan kalu nolo꞉lo꞉, Godemo꞉ dulugu sa꞉la꞉bi. Nililo꞉ i ko꞉lo꞉ dulugu sa꞉lab a꞉ma꞉yo꞉ nio꞉ sagala꞉liki ha꞉sa mesa꞉no꞉ a꞉la꞉liki go꞉l. A꞉la꞉ta꞉ga꞉ niliyo꞉ Godeyo꞉ ko꞉lo꞉ wabuda꞉liki, elo꞉ asulab au kudu ha꞉na꞉mela꞉no꞉ a꞉la꞉liki go꞉l. 3 A꞉la꞉do꞉ gab a꞉no꞉ mada nafale ko꞉lo꞉, Gode nilo꞉ gasili o꞉mo꞉wo꞉ sagale alifa꞉ib. 4 Mo꞉wo꞉ Gode eyo꞉ kaluka꞉isale tambo a꞉ma꞉la꞉ gasilia꞉no꞉ asulab. A꞉la꞉ta꞉ga꞉ kaluka꞉isaleyo꞉ tambo to hendeleyo꞉ mada tili asuluma꞉ki asulab. 5 Mo꞉wo꞉ Godeyo꞉ imilig ko꞉lo꞉lab, a꞉la꞉ta꞉ga꞉ Gode o꞉lia꞉ kaluka꞉isale o꞉lia꞉ us amilo꞉ a꞉lab kaluleyo꞉, Ya꞉su Keliso, imilig e ko꞉lo꞉lab. 6 [a]Kaluka꞉isaleyo꞉ tambo ga꞉li mesea꞉ki, su dimian aumbo꞉ Ya꞉su eyo꞉ eneno꞉ boba dimi. Man a꞉no꞉ ene ho꞉lendeya fa꞉la꞉dowaki, Gode eyo꞉ kaluka꞉isaleyo꞉ tambo a꞉ma꞉la꞉ gasilia꞉no꞉ a꞉la꞉li wido꞉. 7 [b]A꞉la꞉fo꞉ko꞉lo꞉ Godeya꞉ to walama꞉kiyo꞉, ne Ya꞉suwa꞉lo꞉ iliga꞉felo꞉ kalu nowo꞉ ne da꞉fea꞉sa꞉ga꞉ ta꞉fo꞉ ko꞉lo꞉, niyo꞉ Yu kaluka꞉isalema sab o꞉mo꞉wo꞉ tilidabu hendeleyo꞉ walama꞉kilo꞉ da꞉feyo꞉ kaluwo꞉ ne. Niyo꞉ to we mo꞉dikidaki, hendele so꞉lo꞉l.

8 A꞉la꞉ta꞉ga꞉ nilo꞉ asulabo꞉ we. Heno꞉ tambo amio꞉ kaluwo꞉ ene dagiyo꞉ dulugufo꞉liki, ene mela꞉no꞉wo꞉ Godemo꞉ dimia꞉sa꞉ga꞉, gadiano꞉ aundo꞉ma a꞉la꞉ta꞉ga꞉ to kegano꞉ aundo꞉ma iliki, Godemo꞉wo꞉ towo꞉ a꞉na sa꞉la꞉lubi.

9 [c]A꞉la꞉ta꞉ga꞉ ka꞉isale iyo꞉ so꞉go꞉ sa꞉ga꞉lakiyo꞉, kalu meselema꞉kiyo꞉ sa꞉ga꞉la꞉so꞉bo. Iyo꞉ kaluwo꞉ sendeakiyo꞉ misa꞉ fo꞉no꞉ mela꞉so꞉bo, a꞉la꞉ta꞉ga꞉ do꞉mo꞉ amio꞉ so꞉g mole alana꞉lo꞉ dian o꞉lia꞉ momadan kelego꞉ ko꞉li ko꞉lilo꞉ go꞉l amilo꞉ dimido꞉ o꞉leo꞉ngo꞉ a꞉no꞉ ka꞉la꞉so꞉bo. 10 [d]Ko꞉sega ka꞉isale abeyo꞉ ne Godeyo꞉ ko꞉lo꞉ wabuda꞉sen a꞉la꞉likiyo꞉, man nafale dimidab a꞉no꞉, momado꞉ ililo꞉wo꞉ o꞉m. 11 Iyo꞉ towo꞉ mo꞉tolaki ha꞉ga iliki, Godeya꞉ towo꞉ a꞉na da꞉da꞉lubi. 12 [e]Ka꞉isale iliyo꞉ kaluwo꞉ wa꞉la꞉ sanama꞉kiyo꞉ mo꞉asulo꞉. A꞉la꞉ta꞉ga꞉ iliyo꞉ Godeya꞉ towo꞉ kalu siwa꞉l amio꞉ mo꞉walama꞉ki asulo꞉l. Iyo꞉ hela꞉ta꞉ga꞉ mesea꞉ki asulab. 13 [f]Mo꞉wo꞉ Gode eyo꞉ Adam e tamindeya dimida꞉sa꞉ga꞉yo꞉, Ifo꞉ tifa dimido꞉. 14 [g]A꞉la꞉ta꞉ga꞉ Adam eyo꞉ dikili sio꞉wo꞉ mo꞉tilidabu. If eyo꞉ dikili sa꞉lab a꞉no꞉ tilida꞉da꞉sa꞉ga꞉, ele difa꞉yo꞉ e mogaso꞉. 15 Ko꞉sega ka꞉isale iyo꞉ so꞉wayo꞉ o꞉li sa꞉la꞉lian ko꞉lo꞉, iyo꞉ kelego꞉wo꞉ tambo i amio꞉ egaki, iyo꞉ Ya꞉su amio꞉ tilidabu iliki, kaluka꞉isale nolbo꞉wo꞉ ha꞉fo꞉ disa꞉laki, man digalo꞉ kudu ha꞉na꞉lalega, Gode eyo꞉ iyo꞉ a꞉ma꞉la꞉ gasilia꞉ib.

<- 1 Timoti 11 Timoti 3 ->