1 Amɛniwɑ Yinni Gusunɔ u ɡeruɑ Hɑdɑrɑkin tem sɔ̃ u nɛɛ,
kon wuu ɡe bɑ mɔ̀ Dɑmɑsi siri.
Domi nɛn nɔni wɑ̃ɑ tɔmbu sɔɔ
nɡe mɛ yi wɑ̃ɑ Isirelibɑn bwese kɛri kpuro sɔɔ.
2 Kon mɑɑ Hɑmɑti ye yɑ wɑ̃ɑ Dɑmɑsin tem nɔɔ burɑ yerɔn tem siri
kɑ Tiri kɑ sere mɑɑ Sidoni,
bɑɑ mɛ wuu sin tɔmbu bɑ bwisi mɔ.
3 Tiri ye, yɑ wɑ̃ɑ ɡbɑ̃rɑ dɑmɡirun suunu sɔɔ.
Mɛyɑ yɑ ɡobi ɡurɑmɔ nɡe tuɑ.
Mɑ yɑ wurɑ ɡurɑmɔ nɡe pɔtɔkɔ.
4 Adɑmɑ nɛ, Yinni Gusunɔ, kon ye kpuro mwɑ.
Kon yen dɑm sure nim wɔ̃ku sɔɔ
kpɑ n de yu dɔ̃ɔ mwɑɑrɑ.
5 Asikɑloniɡibu bɑ koo ye wɑ
kpɑ bu bɛrum duurɑ.
Kon de tem yiiri bɑkɑbu bu Gɑsɑ wɔri,
kpɑ Ekoroniɡibun yĩiyɔbu kpuro bu kɑm ko.
Gɑsɑ yɑ koo sunɔ biɑ.
Goo kun ko n mɑɑ wɑ̃ɑ Asikɑloniɔ.
6 Sɔbu bɑ koo nɑ bu sinɑ Asidɔduɔ.
Kpɑ n Filisitibɑn tii suɑbu kpeerɑsiɑ.
7 Bɑ ǹ mɑɑ yɛm dimɔ.
Bɑ ǹ mɑɑ bũu yɑ̃ku dĩɑnu dimɔ.
Bɑ koo kowɑ nɛ, Gusunɔn tɔmbu nɡe Yudɑbɑ
kpɑ Ekoroniɡibu bɑ n mɑɑ sɑ̃ɑ nɛn tɔmbu
nɡe mɛ Yebusibɑ bɑ kuɑ.
8 Kon nɛn sɑnsɑni ɡirɑ n kɑ nɛn sɑ̃ɑ yeru sikerenɑ.
Kpɑ yibɛrɛ be bɑ dɑɑmɔ bɑ wurɑmɑmɔ bu ku rɑɑ ye wɔri.
Dɑm diobɑ kun mɑɑ sɑrɔ mi.
Domi nɛn nɔni wɑ̃ɑ mi.
Sunɔ wi u kɑ bɔri yɛndu sisi
9 Bɛɛ Siɔniɡibu, i nuku dobun kuuki koowo.
Bɛɛ Yerusɑlɛmuɡibu, i yɛ̃ɛrio nuku dobun sɔ̃.
Wee bɛɛn sinɑ boko u sisi bɛɛn mi.
U sɑ̃ɑwɑ ɡemɡii kɑ fɑɑbɑ kowo.
U ǹ tii sue.
Kɛtɛku buuwɑ u sɔni.
10 Kon de tɑbu kɛkɛ yi kpe Efɑrɑimun temɔ
kpɑ dumi kɑ tɛn ni bɑ rɑɑ kɑ tɑbu kuɑ yu kpeerɑ Yerusɑlɛmuɔ.
Sunɔ wi, u koo kɑ bwesenu bɔri yɛndu nɑɑwɑ.
U ko n bɑndu diiwɑ nim wɔ̃ku ɡeen di
sere kɑ nim wɔ̃ku ɡiɔ,
sɑɑ mɑɑ dɑɑ te bɑ mɔ̀ Efɑrɑtin di n kɑ dɑ hɑnduniɑn ɡoonu nnɛ sɔɔ.
Pirisɔmbɑn kɑrɑbu
11 Yinni Gusunɔ u nɛɛ,
nɛn ɑrukɑwɑni ye nɑ kɑ bɛɛ bɔkuɑn sɔ̃,
mɑ i ye sire kɑ yɑ̃ku yɑɑ yɛm,
kon bɛɛn yobu yɑrɑ dɔkɔ kpirirun di te tɑ ǹ nim mɔ.
12 Bɛɛ yobu, bɛɛ be i yĩiyɔ bɑkɑbu mɔ,
i wuro bɛɛn wusɔ si su ɡbɑ̃rɑnu mɔ.
Nɑ mɑɑ bɛɛ nɔɔsiɑmɔ mɑ kon bɛɛ domɑru kuɑ
nɡe yelluɡirun nɔn yiru.
13 Kon Yudɑ dendi nɡe tɛndu.
Kpɑ Efɑrɑimu yɑ n sɑ̃ɑ ten sɛ̃ɛnu.
Yerusɑlɛmu, kon wunɛn bibu suɑ bu Gɛrɛkibɑ tɑbu wɔri.
Kon bu kowɑ nɡe tɑbu durɔ dɑmɡiin tɑkobi.
14 Nɛ, Yinni Gusunɔ, kon tii sɔ̃ɔsi wɔllɔ.
Nɛn sɛ̃u ɡɑ koo doonɑ nɡe ɡuru mɑɑkinu.
Kon kɔbɑ so,
kpɑ n sɑrɑmɑ ɡuru woo bɔkɔ sɔɔ,
ɡe ɡɑ wee sɑɑ sɔ̃ɔ yɛ̃sɑn nɔm dwɑru ɡiɑn di.
15 Nɛ, Gusunɔ, wɔllu kɑ tem Yinni, kon nɛn tɔmbu kɔ̃su.
Bɑ koo ben yibɛrɛbɑ kɑmiɑ bu ben kpurɑntɛɛnun kpenu kɔsuku.
Kon de yibɛrɛ ben yɛm mu yɑri nɡe tɑm,
ǹ kun mɛ nɡe yɑ̃ku yɑɑ yɛm mɛ mu rɑ ɡbɛ̃ɛru yibu
bu yɛ̃kɑ yɑ̃ku yerun kɑ̃ɑnɔ.
16 Yen tɔ̃ɔ te, kon nɛn tɔmbu fɑɑbɑ ko
nɡe mɛ yɑ̃ɑ kpɑro u rɑ win yɑ̃ɑnu fɑɑbɑ ko.
Bɑ koo bɑlli ben temɔ nɡe kpee ɡobiɡii
ni bɑ mɑni sinɑ furɔ sɔɔ.
17 Tem miyɑ doo nɔɔru kɑ burɑm mu ko n wɑ̃ɑ.
Alikɑmɑ kɑ tɑm koo de ɑluwɑɑsibɑ kɑ wɔndiɑbɑ bɑ n dɑm mɔ.
Gusunɔ turowɑ sɑ̃ɑ Yinni