92
1 Womu ɡe bɑ kuɑ tɔ̃ɔ wɛ̃rɑruɡirun sɔ̃. Ge wee.
2 Yɑ rɑ n do bɑ n nun tɔmɑmɔ Yinni Gusunɔ,
kpɑ bɑ n wunɛn yĩsiru bɛɛrɛ wɛ̃ɛmɔ, wunɛ Wɔrukoo,
3 bɑ n wunɛn durom ɡɑri kpɑrɑmɔ bururu,
kpɑ bɑ n wunɛn bɔrɔkinirun ɡɑri kpɑrɑmɔ wɔ̃kuru
4 kɑ mɔrɔku kɑ ɡɔ̃ɔɡeru.
5 Yinni Gusunɔ, ye ɑ kuɑ yɑ mɑn nuku dobu wɛ̃.
Mɑ nɑ ye kpuro siɑrɑmɔ kɑ womusu.
6 Yinni Gusunɔ, wunɛn sɔmɑ ye ɑ kuɑ yɑ kpɑ̃.
Wunɛn bwisikunu nu duku.
7 Gɑri bɔkɔ ɡɑ ǹ kpɛ̃ ɡu nu tubu,
mɛyɑ nu ǹ mɑɑ kpɛ̃ nu nùn yeeri.
8 Geemɑ, tɔn kɔ̃sobu bɑ seemɔ nɡe yɑkɑsu,
mɑ nuku kɔ̃suruɡibu bɑ kpɑrɑmɔ nɡe dɑ̃ɑ.
Kɑ mɛ, sɔ̃ɔ teeru bɑ koo bu kpeerɑsiɑ sere kɑ bɑɑdommɑɔ.
9 Adɑmɑ wunɛ Yinni Gusunɔ, wunɑ ɑ kpuro kere sere kɑ bɑɑdommɑɔ.
10 Wunɛn yibɛrɛbɑ kpuro bɑ koo kɑm ko.
Be bɑ kɔ̃sɑ mɔ̀ kpuro bɑ koo yɑrinɑ.
11 A mɑn ɡbeeku kɛtɛn dɑm kɑ̃,
mɑ ɑ mɑn domɑru kuɑ ɑ mɑn ɡum yɑrum tɑ̃re.
12 Tɛ̃, nɑ wɑɑmɔ nɛn yibɛrɛbɑ bɑ wɔrukumɔ.
Nɑ nɔɔmɔ bɑ kuuki mɔ̀.
13 Gemɡibu bɑ koo kpɛ̃ɑ nɡe kpɑkpɑ bɑ̃ɑ.
Bɑ koo se nɡe Libɑnin dɑ̃ɑ ye bɑ mɔ̀ sɛduru.
14 Bɑ ko n sɑ̃ɑwɑ nɡe dɑ̃ɑ te bɑ ɡirɑ tɑ kpɑrɑmɔ
Gusunɔ bɛsɛn Yinnin sɑ̃ɑ yerɔ.
15 Bɑɑ tɑ̀ n tɔkɔ kuɑ, tɑ ko n binu mɑrumɔwɑ,
kpɑ tɑ n bɔrɔm mɔ tɑ n wurusu sɔɔwɑ.
16 Yeyɑ yɑ koo sɔ̃ɔsi mɑ Yinni Gusunɔ u sɑ̃ɑwɑ ɡemɡii.
U mɑɑ sɑ̃ɑwɑ nɛn kpee bɑɑ mi nɑ rɑ kuke.