2 Yinni Gusunɔwɑ u sɑ̃ɑ bɛsɛn dɑm.

I nùn womu kuo kɑ nuku dobu.

I Gusunɔ Yɑkɔbun Yinni tɑkɑru koowo kɑ nuku dobu.

3 I womusu koowo.

I ɡɑ̃ɑsu kɑ mɔrɔkunu kɑ ɡɔ̃ɔɡenu soowo.

4 I kɔbɑ soowo suru kpɑon tɔ̃ɔ bɑkɑru sɔɔ.

I kɔbɑ wureo Kunun tɔ̃ɔ bɑkɑru sɔɔ suru ù n tɑrum kuɑ.

5 Domi woodɑ yerɑ Yɑkɔbun Yinni u Isirelibɑ wɛ̃.

6 Woodɑ yerɑ u Yosɛfun yɛnuɡibu wɛ̃

sɑnɑm mɛ u Eɡibiti wɔri.

Mɑ nɑ nɔɔ ɡɑɡu nuɑ ɡe nɑ ǹ tubɑ. Gɑ nɛɛ,

7 nɑ bɛɛ sɔmunu swɛnyɑ bɛɛn senun di,

nɑ derɑ i yoo sɔmɑ deri.

8 Sɑnɑm mɛ i wɑ̃ɑ nɔni swɑ̃ɑru sɔɔ,

i mɑn sokɑ, mɑ nɑ bɛɛ yɑkiɑ.

Nɑ bɛɛ wisɑ ɡuru mɑɑkinu sɔɔ.

Nɑ bɛɛn lɑɑkɑri mɛɛrɑ Mɛribɑn bwiɑɔ.

9 Bɛɛ nɛn tɔmbu Isirelibɑ,

i mɑn swɑɑ dɑkio i nɔ ye kon bɛɛ sɔ̃.

10 I ku de bũu ɡoo u n mɑɑ wɑ̃ɑ bɛɛn suunu sɔɔ.

I ku mɑɑ nu yiirɑ i sɑ̃.

11 Nɛnɑ Gusunɔ bɛɛn Yinni wi u bɛɛ yɑrɑ Eɡibitin di.

I bɛɛn nɔɔ wukio kpɑ n bɛɛ diisiɑ.

12 Adɑmɑ bɛɛ nɛn tɔmbu, i ǹ mɑn swɑɑ dɑki,

i ǹ mɑɑ mɑn mɛm nɔɔwɛ.

13 Nɑ derɑ i wɔri bɛɛn ɡɔ̃ru bɔbunu sɔɔ,

mɑ i bɛɛn tiin bwisi swĩi.

14 Bɛɛ nɛn tɔmbu, ì n dɑɑ mɑn swɑɑ dɑki i sĩimɔ nɛn swɑɑ sɔɔ,

15 kon dɑɑ bɛɛn yibɛrɛbɑ sekuru doke,

kpɑ n bu nɑɑ swĩi n ɡo ɡo.

16 Sɑɑ ye sɔɔrɑ nɛ, Yinni Gusunɔn yibɛrɛbɑn tii suɑbu koo nɔru ko,

kpɑ Isirelibɑn doo nɔɔru tu tɛ.

17 Kon bu dĩɑ ɡeenu wɛ̃,

kpɑ bu kperun tim ɡem di.

<- Womusu 80Womusu 82 ->