2 Nɡe mɛ nim nɔru ɡɑ rɑ de nɛmu ɡɑ n dɑɑrun nim kɑsu,

nɡe mɛyɑ nɛn ɡɔ̃ru ɡɑ nun kɑsu Yinni Gusunɔ.

3 Nɛn ɡɔ̃ru ɡɑ wunɛn bɛkɛ bɑrɔ, Yinni Gusunɔ, wunɛ wi ɑ wɑ̃ɑ.

Sɑɑ yerɑ̀ nɑ kon tii sɔ̃ɔsi wunɛn wuswɑɑɔ Yinni.

4 Nɛn nɔni yĩresu su kuɑ nɛn nim nɔrurɑm wɔ̃kuru kɑ sɔ̃ɔ sɔɔ,

sɑnɑm mɛ bɑ mɑn bikiɑmɔ bɑ mɔ̀,

mɑnɑ Gusunɔ nɛn Yinni u wɑ̃ɑ.

5 Nɛn tororu tɑ rɑ kɑrewɑ nɑ̀ n yɑɑyɑ

sɑnɑm mɛ tɔn dɑbiru tɑ rɑ n mɑn sikerenɛ,

nɑ n tu ɡbiiye su kɑ dɑ Gusunɔn sɑ̃ɑ yerɔ,

sɑ n nuku dobu mɔ̀, sɑ n Gusunɔ siɑrɑmɔ sɑnnu.

6 Mbɑn sɔ̃nɑ ko nɑ n nuki sɑnkire, kpɑ nɑ n weeweenu mɔ̀.

Nɑ ko n nɛn yĩiyɔbu doke Gusunɔ nɛn Yinnin mi,

kpɑ n mɑɑ nùn siɑrɑ.

Domi u sɑ̃ɑwɑ nɛn Yinni kɑ nɛn Fɑɑbɑ kowo.

7 Nɛn Yinni, nɑ nuki sɑnkire.

Yen sɔ̃nɑ nɑ nun yɑɑyɑmɔ sɑɑ Yuudɛnin dɑɑrun di,

kɑ ɡuu te bɑ mɔ̀ Hɛɛmɔɔn di

kɑ ɡuu te bɑ mɔ̀ Miseɑɑn di.

8 Wunɑ ɑ rɑ de dɑɑrun nim mu kukiri,

kpɑ nim kureru tu se tu ɡɑru suɑ,

kpɑ ni kpuro nu mɑn wukiri.

9 A mɑn wunɛn kĩru sɔ̃ɔsio sɔ̃ɔ sɔɔ,

wɔ̃kuru kpɑ nɑ n womusu mɔ̀, nɑ n nun tɔmɑmɔ,

nɑ n nun kɑnɑmɔ wunɛ wi ɑ mɑn wɑ̃ɑru wɛ̃.

10 Gusunɔ, nɛn Yinni, ɑ sɑ̃ɑwɑ nɛn kpee sɑɑrɑ.

Mbɑn sɔ̃nɑ ɑ mɑn duɑri.

Mbɑn sɔ̃nɑ kɑɑ de nɛn yibɛrɛbɑ bɑ n mɑn dɑm dɔremɔ

kpɑ nɑ n nuki sɑnkire.

11 Nɛn kukunu bɛsikirɑmɔ sɑnɑm mɛ bɑ mɑn nɔni sɔ̃ɔmɔ,

bɑ mɑn wɔmmɔ, bɑ ɡerumɔ bɑ mɔ̀, mɑnɑ Gusunɔ nɛn Yinni wi.

12 Mbɑn sɔ̃nɑ nɑ kon nuki sɑnkire.

Mbɑn sɔ̃nɑ ko nɑ n weeweenu mɔ̀ nɛn ɡɔ̃ruɔ.

Nɛ, kon nɛn nɑɑnɛ dokewɑ wunɛ sɔɔ,

kpɑ n nun siɑrɑ kpɑm.

Domi ɑ sɑ̃ɑwɑ nɛn Yinni kɑ nɛn Fɑɑbɑ kowo.

<- Womusu 41Womusu 43 ->