TIRE TE PƆLU
U FILEMƆƆ KUA
Filemɔɔ u sɑ̃ɑwɑ Pɔlun bɔrɔ wi u Yesu nɑɑnɛ doke Koloseɔ, Kolose 4:9. Wiyɑ u derɑ Yesuɡibu bɑ rɑ mɛnnɛ win dirɔ bu kɑ sɑ̃ɑru ko. N deemɑ u yoo mɔ wi bɑ mɔ̀ Onɛsimu. Onɛsimu wi, u nùn ɡobi ɡbɛnɑ, mɑ u dukɑ yɑkurɑ u dɑ wuu mɑroɔ, ɡe bɑ mɔ̀ Romu. Romu miyɑ Onɛsimu u Pɔlu ɡiɑ, miyɑ u mɑɑ Yesu nɑɑnɛ doke. Sɑɑ yerɑ Pɔlu u nùn kuɑ nɡe win tiin bii. Yen sɔ̃nɑ u Filemɔɔ tire te yoruɑ u kɑ win yoo Onɛsimu suuru kuɑ, domi u dɑɑ kɔsɑ. Yen sɔ̃, u ku mɑɑ nùn ɡɑrisi nɡe yoo, ǹ kun mɛ ɡbɛnɔ, ɑdɑmɑ u nùn ɡɑrisio win dusi Yesu sɔɔ.
Tire ten kpunɑɑ
1. Tɔbiribu, nɑɑsu 1-3.
2. Pɔlu u Gusunɔ siɑrɑmɔ Filemɔɔn sɔ̃, nɑɑsu 4-7.
3. Pɔlu u Filemɔɔ suuru kɑnɑmɔ Onɛsimun sɔ̃, nɑɑsu 8-21.
4. Tɔbiri dɑ̃ɑkibu, nɑɑsu 22-25.

Tɔbiribu

1-3 Filemɔɔ, bɛsɛn kĩnɑsi kɑ bɛsɛn sɔm kowosi, kɑ mɑɑ Yesun yiɡbɛ te tɑ rɑ mɛnnɛ wunɛn yɛnuɔ kɑ bɛsɛn sesu Apiɑ kɑ mɑɑ Aɑsipu bɛsɛn tɑbu kowosi sɔmburu sɔɔ, bɛɛyɑ sɑ tire teni kuɑ. Gusunɔ bɛsɛn Bɑɑbɑ kɑ Yinni Yesu Kirisi bu bɛɛ durom kuɑ kpɑ bu bɛɛ ɑlɑfiɑ kɛ̃. Nɛnɑ Pɔlu wi bɑ pirisɔm sɑ̃ɑ Yesu Kirisin sɔ̃, nɛ kɑ bɛsɛɡii Timɔte, sɑ bɛɛ tɔburɑ.

Filemɔɔn kĩru

kɑ win nɑɑnɛ dokebu

4 Nɑ rɑ n nɛn Gusunɔ siɑrɑmɔ bɑɑdommɑ nɑ̀ n kɑnɑru mɔ̀ wunɛn sɔ̃, 5 domi nɑ wunɛn kĩrun bɑɑru nɔɔmɔ te ɑ nɑɑnɛ dokeobu kĩ kɑ mɑɑ wunɛn nɑɑnɛ doke bi ɑ mɔ Yinni Yesu sɔɔ. 6 Nɑ nùn kɑnɑmɔ u de nɔɔ tiɑ ye bɛsɛ kɑ wunɛ sɑ mɔɔsinɛ nɑɑnɛ dokebun sɔ̃ yu sɔ̃ɔsirɑ kookoosu sɔɔ kpɑ ɑ ɡɑ̃ɑ ɡeenu kpuro tubu ni sɑ mɔ Kirisin sɑɑbu. 7 Wunɛn kĩru tɑ mɑn nuku doo bɑkɑbu wɛ̃ nɛn kĩnɑsi, tɑ mɑn dɑm kɑ̃ ɡem ɡem, domi ɑ Gusunɔɡibun bwɛ̃rɑ yɛmiɑsiɑ.

Pɔlu u Onɛsimu

suuru kɑnɑmmɛ

8 Yen sɔ̃, bɑɑ mɛ nɛn toro sindu Kirisin sɔ̃ tɑ turɑ n kɑ nun yiire ɑ kɑ ko mɛ n weenɛ, 9 kɑ mɛ, kĩrun sɔ̃nɑ nɑ nun suuru kɑnɑmɔ, nɛ Pɔlu, nɛ wi nɑ bukurɑ mɑ nɑ tɛ̃ wɑ̃ɑ pirisɔm sɔɔ Yesu Kirisin sɔ̃. 10 Nɑ nun suuru kɑnɑmɔ Onɛsimun sɔ̃ wi u kuɑ nɛn bii nɑɑnɛ dokebu sɔɔ pirisɔm diru mini. 11 Yellu u ǹ dɑɑ sɑ̃ɑ ɡɑ̃ɑnu wunɛn mi, ɑdɑmɑ tɛ̃, u ɑrufɑɑni mɔ wunɛn mi kɑ nɛn tiin mi.

12 Nɑ nun nùn ɡɔriɑmɑ tɛ̃, ɑ nùn mɔɔ nɡe nɛn tii tii. 13 Nɑ rɑɑ kĩ u n wɑ̃ɑ nɛn bɔkuɔ pirisɔm sɔɔ mi nɑ wɑ̃ɑ Lɑbɑɑri ɡeɑn sɔ̃ u kɑ mɑn somi wunɛn ɑyerɔ. 14 Adɑmɑ nɑ ǹ kĩ n ɡɑ̃ɑnu ɡɑnu ko mɑ n kun mɔ ɑ wurɑ, kpɑ wunɛn somiru tɑ kun sɑ̃ɑ tilɑsi. Nɑ kĩwɑ tɑ n sɑ̃ɑ wunɛn ɡɔ̃ru kĩru.

15 À ku tubɑ yenin sɑɑbuwɑ i kɑ kɑrɑnɑ wunɛ kɑ Onɛsimu sɑɑ fiiko kpɑ ɑ wɑ ɑ n kɑ nùn mɔ kɑ bɑɑdommɑɔ, 16 n ǹ mɔ nɡe yoo tɔnɑ, ɑdɑmɑ tɛ̃ u yoo kerɑ. U kuɑ kĩnɑsi Kirisi sɔɔ n ku mɑm ko nɛn mi, ɑdɑmɑ n weenɛ u n kere mɛ ɡem ɡem wunɛn mi, domi u ǹ sɑ̃ɑ wunɛn yoo tɔnɑ, u mɑɑ sɑ̃ɑwɑ wunɛn kĩnɑsi Yinni sɔɔ.

17 Yen sɔ̃, ɑ̀ n mɑn ɡɑrisi wunɛn sɔm kowosi, ɑ nùn dɑm koosio nɡe mɛ kɑɑ mɑn dɑm koosiɑ. 18 Ù n nun ɡɑ̃ɑnu torɑ ǹ kun mɛ ù n wunɛn dibu nɛni, n kuɑ nɛn sɔmunu. 19 Wee, nɑ yeni yorumɔ kɑ nɛn tii tiin nɔmɑ. Nɛ Pɔlu, kon nun ye kpuro kɔsiɑ. Bɑɑ nɑ̀ kun ɡeruɑ, wunɛn tii ɑ yɛ̃ mɑ wunɛn wɑ̃ɑrɑ nɛn dibu nɛni. 20 Yen sɔ̃nɑ nɛɡii, ɑ mɑn durom mɛ kuo Yinnin sɔ̃. A mɑn ɡɔ̃ru yɛmiɑsio Kirisi sɔɔ.

21 Nɑ nun tire teni kuɑmmɛ yèn sɔ̃ nɑ wunɛn mɛm nɔɔbu nɑɑnɛ sɑ̃ɑ, domi nɑ yɛ̃ kɑm kɑm kɑɑ ko n kere ye nɑ mɑm nun kɑnɑmɔ. 22 Gɑ̃ɑ teenɑ nu tie, ɑ mɑn diru kɑsuo yèn sɔ̃ nɑ yĩiyɔ Gusunɔ u koo bɛɛn kɑnɑru mwɑ kpɑ u mɑn bɛɛ wesiɑ.

Nɔɔ kɑnɑ tɔbiribu

23 Epɑfɑsi, nɛ kɑ wì sɑ wɑ̃ɑ pirisɔm dirɔ Kirisi Yesun sɔ̃, u nun tɔburɑ. 24 Mɛyɑ mɑɑ nɛn sɔm kowosibu Mɑɑku kɑ Aritɑɑki kɑ Demɑsi kɑ sere Luku, bɑ nun tɔburɑ.

25 Yinni Yesu Kirisin durom mu n kɑ bɛɛ wɑ̃ɑ.