1 I kɔbɑ soowo Siɔniɔ.

I de bu ye nɔ Yinni Gusunɔn ɡuu dɛɛrɑru mi.

Bɛɛ be i wɑ̃ɑ tem mɛ sɔɔ kpuro, i diirio bɛrum sɔ̃.

Domi Yinni Gusunɔn mɔrun tɔ̃rɑ wee.

Wee tɑ mɑm turuku kuɑ.

2 Tɔ̃ɔ te, tɑ tĩriwɑ.

Tɑ ɡuru wiru kɑ bukɔ sɔɔwɑ.

Mɑ twee wuurɑ wee yi dɑbi,

yi mɑɑ dɑm mɔ.

Yin wuu te, tɑ tĩriwɑ

nɡe yɑm wɔ̃kurɑ ɡuuru wukiri.

Sɑ ǹ yen bweseru wɑɑre.

Sɑ ǹ mɑɑ yen bweseru wɑsi.

3 Mi yi sɑrɑ kpuro,

n dɑ kowɑ nɡe dɔ̃ɔ mwɑɑrɑ u doonɑ.

Yi ku rɑ ɡɑ̃ɑnu deri.

Yellu bɛsɛn tem mu ɡeɑ sɑ̃ɑ

nɡe ɡbɑɑ te bɑ mɔ̀ Edɛni.

Adɑmɑ tɛ̃ yi mu kuɑ nɡe mi ɡɑ̃ɑnu ku rɑ kpi.

4 Twee yi, yi sɑ̃ɑwɑ nɡe tɑbu mɑɑsɔbu

be bɑ dumi yɑkiɑmɔ.

5 Yi yɔ̃ɔkumɔ yi ɡuunu ɡɑsirimɔ.

À n yen wɔkinu nuɑ

ɑ rɑ n tɑmɑɑ nɡe tɑbu kɛkɛbɑrɑ,

ǹ kun mɛ yɑkɑ si su dɔ̃ɔ mwɑɑrɑmɔn wɔkinu.

Yi rɑ n weewɑ nɡe tɑbu durɔ be bɑ tɑbun sɔɔru sɑ̃ɑ.

6 Tɔmbu kpuro bɑ rɑ n nɑndewɑ yì n tunumɑ.

Kpɑ ben wuswɑɑ yu burisinɑ.

7 Yi rɑ tii yɔ̃suwɑ nɡe tɑbu durɔbu,

yi n ɡbɑ̃rɑru ɡɑsirimɔ,

yen bɑɑyere yɑ n yen swɑɑ swĩi.

Yi ku rɑ ɡɑm ɡɛre.

8 Yi ku rɑ mɑɑ bɑɑsinɛ.

Yen bɑɑyere yɑ rɑ n yen sĩɑ swĩiwɑ.

Gɑ̃ɑ ni nu koo ye ɡɔnɡɛrɛ ko,

yi rɑ nu wɔriwɑ sɑnnu.

Nu ku rɑ mɑɑ ye yɔ̃rɑsie.

9 Yi rɑ wuu wukiriwɑ

yi n ɡbɑ̃rɑru kɑ yɛnusu ɡɑsirimɔ,

kpɑ yi n dumɔ fɛnɛntibɑn di nɡe ɡbɛnɔbu.

10 Mi yi duɑ, tem mu rɑ diiriwɑ,

kpɑ n sɑ̃ɑre wɔllɑ koo wɔrumɑ,

kpɑ suru kɑ sɔ̃ɔ yɑm tĩrɑ,

kpɑ kperin bɑllibu kpe.

11 Nɡe mɛyɑ Yinni Gusunɔ ù n ɡɑri ɡeruɑ win tɑbu kowobun wuswɑɑɔ,

bɑ rɑ nùn mɛm nɔɔwɛwɑ.

Bɑ dɑbi, bɑ mɑɑ dɑm mɔ.

Yen sɔ̃nɑ win tɔ̃ɔ te, tɑ nɑnum mɔ.

Wɑrɑ u koo yɔ̃rɑ u tu mɑ.

12-13 Yinni Gusunɔ u nɛɛ,

nɑ sɑ̃ɑwɑ wɔnwɔnduɡii.

Nɛn kĩru tɑ kpɑ̃.

Nɛn mɔru yɑ ku rɑ fuuku se.

Nɑ rɑ mɑɑ tɔnu suuru kue

kɔ̃sɑ ye nɑ rɑɑ kĩ n nùn kuɑ sɔɔ.

Tɛ̃, i wurɑmɑ kɑ bɛɛn ɡɔ̃ru kpuro nɛn mi,

i nɔɔ bɔke, kpɑ i wuri ko.

Bɛɛn ɡɔ̃ruwɑ i ko i ɡɔsiɑ,

n ǹ mɔ i yɑ̃nu ɡɛ̃ɛku tɔnɑ.

I wurɑmɑ nɛ, Gusunɔ bɛɛn Yinnin mi.

14 Sɔrɔkudo kon ɡɔ̃ru ɡɔsiɑ,

kpɑ n bɛɛ durom kuɑ.

Sɑɑ ye sɔɔrɑ i ko i kpĩ i kɑ mɑn ɑlikɑmɑ kɑ tɑm kɛ̃nu nɑɑwɑ.

15 I kɔbɑ soowo Siɔniɔ.

I tɔmbu mɛnnɔ,

kpɑ i nɔɔ bɔkurun tɔ̃ru yi.

16 I tɔmbu mɛnnɔ bu mɑn sɑ̃,

ɡuro ɡurobu kɑ bibu, kɑ bii wɛ̃ɛnɔ.

Bɑɑ kɑ be bɑ wɑ̃ɑ kurɔ kpɑɑ dirɔ,

bu yɑrio ben kurɔ kpɑɑ dirun di.

17 Kpɑ yɑ̃ku kowo be bɑ mɑn sɑ̃ɑmɔ

bu du nɛn sɑ̃ɑ yerɔ kɑ swĩi,

yɑ̃ku yeru kɑ kɔnnɔn bɑɑ sɔɔ,

bu nɛ ben Yinni kɑnɑ bu nɛɛ,

n ben wɔnwɔndu wɑɑwo, be, nɛn tɔmbu.

N ku bu sekuru doke.

N ku de tɔn tukobu bu bu yɛ̃ɛ bu nɛɛ,

mɑnɑ nɛ, ben Yinni nɑ wɑ̃ɑ.

18 Yinni Gusunɔ u nisinu mɔ win tem sɔ̃.

U win tɔmbun wɔnwɔndu mɔ.

19 Mɑ u win tɔmbun kɑnɑru wisɑ,

u nɛɛ, kon bɛɛ ɑlikɑmɑ kpɑɑ wɛ̃, kɑ resɛm, kɑ ɡum.

I ko i deburu wɑ.

Nɑ ǹ mɑɑ derimɔ bweseru ɡɑru tu bɛɛ yɛ̃ɛ.

20 Kon bɛɛ yibɛrɛ be bɑ nɑ sɑɑ sɔ̃ɔ yɛ̃sɑn nɔm ɡeu ɡiɑn di ɡirɑ,

kpɑ n de bu dɑ n tomɑ

mi tem mu ɡbere mɑ ɡɑ̃ɑnu ku rɑ kpi.

Kon de ben swɑɑ ɡbiobu bu nim wɔ̃ku bɔruɡuu wɔri.

Kpɑ be bɑ wɑ̃ɑ biruɔ bu nim wɔ̃ku ɡe bɑ mɔ̀ Mɛditerɑnɛ wɔri.

Ben ɡonu nu koo numiɑ sere bu kpɑnɑ bu wɛ̃siɑ.

Geemɑ, Yinni Gusunɔ u ɡɑ̃ɑ bɑkɑnu kuɑ.

21 Tem, ɑ ku bɛrum ko,

ɑ nuku dobu koowo,

domi Yinni Gusunɔ u ɡɑ̃ɑ bɑkɑnu kuɑ.

22 Bɛɛ ɡbeeku yɛɛ, i ku nɑndɑ.

Domi yɑkɑsu su koo wure su kpi temɔ,

kpɑ dɑ̃nu nu mɑ.

Fiɡie kɑ resɛm yɑ koo binu mɑ siki siki.

23 Bɛɛ Siɔniɡibu i nuku dobu koowo Gusunɔ bɛɛn Yinni sɔɔ.

Domi u koo de ɡurɑ yu nɛ yen sɑɑ sɔɔ nɡe yellu.

U koo de yu nɛ sɑɑ ye yɑ rɑ tore

kpɑ u de yu kpe sɑɑ ye yɑ rɑ kpe.

24 Alikɑmɑn soo yerɑ kun mɑɑ ɡberɑmɔ.

Olifin ɡum, kɑ resɛm tɑm kun mɑɑ biɑrɑmɔ wekenɔ.

25 Kon bɛɛ wɔ̃ɔ si kɑ dĩɑ nin kɔsire wɛ̃,

ni nɛn tɑbu kowobu, kɔkɔnu, kɑ ɡbɑɑnu, kɑ twee yi di

wɔ̃ɔ si su doonɑ sɔɔ.

26 Bɛɛ nɛn tɔmbu, i ko i di i debu.

I ǹ sekuru wɑsi.

Kpɑ i nɛ, Yinni Gusunɔ bɛɛrɛ wɛ̃,

nɛ wi nɑ bɛɛ sɔm mɑɑmɑɑkiɡinu kuɑ.

27 Sɑɑ ye sɔɔ, i ko i ɡiɑ

mɑ nɑ wɑ̃ɑ bɛɛ Isirelibɑn suunu sɔɔ.

Mɑ nɑ sɑ̃ɑ Gusunɔ bɛɛn Yinni.

Nɛ bɑɑsi, Yinni ɡoo mɑɑ sɑri.

Bɛɛ nɛn tɔmbu, i ǹ mɑɑ sekuru wɑsi.