36
1 Mɑ Elihu u kpɑm ɡeruɑ u nɛɛ,
2 ɑ yɔ̃ro fiiko,
ɡɑri ɡɛɛ mɑɑ tie yi kon Gusunɔ ɡeruɑ.
3 Kon nɛn yɛ̃ɛ bɑkɑru dendi
n kɑ sɔ̃ɔsi mɑ nɛn Tɑkɑ kowo u ɡem mɔ.
4 A nɑɑnɛ koowo mɑ nɛn ɡɑri kun sɑ̃ɑ weesu.
Nɑ yɛ̃ sɑ̃ɑ sɑ̃ɑ ye nɑ ɡerumɔ.
5 Gusunɔ u sɑ̃ɑwɑ Dɑm kpuroɡii.
U ku rɑ mɑɑ ɡoo ɡɛm.
U dɑm mɔ kpuron wɔllɔ.
U ku rɑ win ɡere kɔsi.
6 U ku rɑ de tɔn kɔ̃sobu bɑ n wɑ̃ɑ.
Adɑmɑ u rɑ wɔnwɔndobu siriewɑ dee dee.
7 U ku rɑ ɡemɡibu deri.
U rɑ bu swĩiwɑ nɡe sinɑmbu
kpɑ bɑ n bɛɛrɛ mɔ sere kɑ bɑɑdommɑɔ.
8 Adɑmɑ be bɑ bɔkuɑ kɑ yɔni,
bɑ wɑhɑlɑ mɔ̀ ye bɑ kuɑn sɔ̃,
9 Gusunɔ u rɑ bu sɔ̃ɔsi mɑ bɑ dɑɑ kɔ̃sɑ kuɑ,
mɑ bɑ tii sue,
10 kpɑ u bu kirɔ ko bu kɑ win ɡɑri nɔ,
kpɑ bu wɑ bu dɑɑ kɔ̃sɑ dukɑ suuri.
11 Bɑ̀ n ɡɑri yi mɛm nɔɔwɑ, mɑ bɑ tii wɛ̃,
bɑ koo ben wɑ̃ɑru diwɑ bɔri yɛndu sɔɔ,
kɑ nuku dobu sɔɔ sere kɑ ben ɡɔɔn tɔ̃rɔ.
12 Adɑmɑ bɑ̀ kun yi mɛm nɔɔwɛ,
bɑ koo bu ɡowɑ subɑru sɔɔ kɑ tɑkobi.
13 Tɔn kɔ̃sobu bɑ rɑ kɑ Gusunɔ mɔru sewɑ.
Ù n bu bɔkuɑ kɑ yɔni, bɑ ku rɑ nùn suuru kɑnɛ.
14 Bɑ koo ɡbiwɑ sɛkum ɑluwɑɑsiru sɔɔ,
kpɑ bu ko tiɑ kɑ dɑɑ bɛrɛtɛkɛɡibu.
15 Adɑmɑ Yinni Gusunɔ u rɑ wɔnwɔndo fɑɑbɑ kowɑ ù n wɑ̃ɑ nɔni swɑ̃ɑru sɔɔ,
kpɑ u nùn kirɔ ko kɑ wɑhɑlɑ ye.
16 Yoobu, mɛyɑ u koo nun yɑrɑ wɑhɑlɑn di,
kpɑ u de ɑ n bɔri yɛndu mɔ tɑ n kpɑ̃.
Kpɑ u mɑɑ de ɑ n dĩɑ ɡeenu yibɑ ɑ n dimɔ.
17 Adɑmɑ tɛ̃, ɑ̀ n kɑ tii yinɑmɔ,
n ǹ mɑɑ koorɔ ɑ yɑri sɛɛyɑsiɑ bin min di.
18 A ku de mɔru yu nun ɡɑwɑ ɑ kɑ kɔ̃sɑ ko.
A kun mɑɑ tɑmɑɑ kɑɑ Gusunɔ kɛ̃ru ɡɑru wɛ̃wɑ
kpɑ u ku kɑ nun sɛɛyɑsiɑ.
19 Wunɛn wurɑ, ǹ kun mɛ wunɛn ɑrumɑni ɡɑɑ,
ǹ kun mɛ wunɛn dɑm,
yen ɡɑɑ kun kpɛ̃ yu nun yɑrɑ nɔni swɑ̃ɑ ten di.
20 A ku wɔ̃ku te kĩɑ
tè sɔɔ bɑ koo tɔmbu ɡo.
21 A n tii sɛ kpɑ ɑ ku rɑ kɔ̃sɑ ko.
Domi wɑhɑlɑ ye, yɑ nun deemɑwɑ kpɑ ɑ wɑ ɑ kɑ kɔ̃sɑ dukɑ suuri.
Gusunɔ turowɑ u yiiko mɔ kpuron wɔllɔ
22 Yinni Gusunɔ u kpɑ̃ win dɑm sɑɑbu.
Wɑrɑ u koo kpĩ u keu sɔ̃ɔsi nɡe wi.
23 Wɑrɑ u rɑ nùn woodɑ wɛ̃ ye u koo swĩi.
Wɑrɑ u koo kɑ̃ku u nɛɛ, kɔ̃sɑ u mɔ̀.
24 A ku duɑri ɑ win sɔmɑ wɔlle suɑ,
yè tɔmbu kpuro bɑ siɑrɑ kɑ womusu.
25 Tɔmbu bɑ ye wɑɑmɔ bɑɑ yɑ̀ n tomɑ.
26 Gusunɔ u kpɑ̃ sere ɡoo kun kpɛ̃ u win kpɑ̃ɑ ten ɑsɑnsi ɡere.
Mɛyɑ mɑɑ win wɑ̃ɑrun wɔ̃ɔ ɡɑ ǹ ɡɑrirɔ.
27 U rɑ nim buri yi yi seemɔ bɑɑmɑn di mɛnnɛwɑ,
kpɑ u yi ɡɔsiɑ ɡuru winu.
28 Kpɑ ɡuru wii ni, nu de ɡurɑ yu nɛ,
yu tɔn wɔru so.
29 Wɑrɑ yɛ̃ nɡe mɛ ɡuru winu nu kɑ sĩisinɑmɔ.
Wɑrɑ yɛ̃ nɡe mɛ ɡurɑ rɑ kɑ ɡbɑ̃re.
30 Yoobu, ɑ yɛ̃ mɑ Gusunɔwɑ u ɡuru mɑɑkinu kuɑ nu kɑ nùn sikerenɛ.
Mɑ yɑm wɔ̃kurɑ wɑ̃ɑ nim wɔ̃kun sɔɔwɔ.
31 Kɑ yebɑrɑ u rɑ kɑ tɔmbu siri.
Kpɑ u mɑɑ kɑ bu dĩɑnu wɛ̃ nu n kpɑ̃.
32 U ɡuru ɡbɛ̃ɛ nɛni win nɔmɑɔ,
mɑ u yi sɔ̃ɔsimɔ mi yi koo wɔri.
33 Guru ɡbɑ̃sukunu nu sɔ̃ɔsimɔ mɑ u wɑ̃ɑ.
Mɛyɑ yɑɑ sɑbenu nu mɑɑ yɛ̃ mɑ u wɑ̃ɑ turuku.