2 sere kɑ ɡisɔ nɑ Gusunɔ weeweenu koosimɔ.

Nɛn nɔni swɑ̃ɑru tɑ nɛn wuri kere.

3 Nɑ̀ n dɑɑ yɛ̃ mi u wɑ̃ɑ kon dɑɑ dɑwɑ sere win mi.

4 Kpɑ n nùn sɔ̃ ye yɑ mɑn wɑ̃ɑsi,

kɑ mɑɑ yèn sɔ̃ nɑ tii wɔrɑmɔ.

5 Kpɑ n win wisibu nɔ.

N nɔ ye n nùn nɛni.

6 U koo mɑn dɑm sɔ̃ɔsi u kɑ mɑn siri?

Aɑwo, u koo yɔ̃rɑwɑ u mɑn swɑɑ dɑki.

7 Nɛ tɔn ɡeowɑ kon kpĩ n kɑ nùn wesiɑnɔ ko.

Kpɑ wi, wi u sɑ̃ɑ nɛn siri kowo,

u mɑn yɑkiɑ sere kɑ bɑɑdommɑɔ.

8 Adɑmɑ nɑ̀ n dɑ sɔ̃ɔ yɑri yeru ɡiɑ,

u ku rɑ n wɑ̃ɑ mi.

Nɑ̀ n mɑɑ dɑ sɔ̃ɔ duu yerɔ,

nɑ ku rɑ nùn wɑ mi.

9 Aɑ, u sɔmburu ɡɑru mɔ̀wɑ sɔ̃ɔ yɛ̃sɑn nɔm ɡeu ɡiɑ?

Nɑ̀ n dɑ mi, u ku rɑ n wɑ̃ɑ mi.

U kukuɑwɑ sɔ̃ɔ yɛ̃sɑn nɔm dwɑru ɡiɑ?

Min tii, nɑ ku rɑ nùn wɑ.

10 Kɑ mɛ, u nɛn swɛɛ kpuro yɛ̃ yi nɑ swĩi.

Ù n mɑn kpɛ̃ɛ lɑɑkɑri mɛɛribu sɔɔ, kon yɑriwɑ min di,

nɑ n dɛɛre nɡe wurɑ ye bɑ dɔ̃ɔ doke.

11 Nɑ win yirɑ swĩiwɑ dee dee.

Nɑ ǹ ɡɛre win swɑɑn di.

12 Nɑ ǹ win woodɑ sɑre.

Ye u mɑn sɔ̃ɔwɑ kpuro,

nɑ ye mɛm nɔɔwɑwɑ ɡɔ̃ruɔ.

13 Ù n ɡɑ̃ɑnun himbɑ yi, wɑrɑ u koo ye sĩiyɑ.

Ye u kĩ yerɑ u rɑ ko.

14 Ǹ n mɛn nɑ, u koo ko ye u yi kpuro nɛn sɔ̃,

kpɑ u mɑɑ mɑn himbɑ kpɑɑ yiiyɑ.

15 Yen sɔ̃nɑ nɑ nɑnde wi Gusunɔn wuswɑɑɔ.

Nɑ̀ n bwisikɑ nɑ rɑ nɑndewɑ win sɔ̃.

16 Gusunɔ u nɛn wɔruɡɔrun dɑm buɑ.

Wi, Dɑm kpuroɡii u mɑn bɛrum kpɛ̃ɛ.

17 Kɑ yen de kpuro, nɑ ǹ nɔɔ mɑri,

bɑɑ mɛ n sɑ̃ɑre yɑm wɔ̃kurɑ mɑn wukiri.