1 Yoobu u nɛɛ,

tɔnu wi bɑ ɡesi mɑrɑ, win wɑ̃ɑrɑ ku rɑ n dɛ̃u.

Mɛyɑ tɑ rɑ n mɑɑ nɔni swɑ̃ɑru yibɑ.

2 U rɑ sewɑ nɡe dɑ̃ɑ wɛ̃su, kpɑ bu nùn burɑ.

U rɑ doonɛwɑ nɡe sɑɑru.

3 Tɔnu wiyɑ ɑ mɛɛrɑ,

mɑ ɑ nùn siribu sokɑ?

4 Wɑrɑ u koo kpĩ u ɡɑ̃ɑ kɔ̃sunun di ɡɑ̃ɑ dɛɛrɑnu yɑrɑ.

Goo sɑri.

5 À n tɔnun wɑ̃ɑrun tɔ̃ru yi ɑ ten suru ɡɑrɑ,

u ǹ mɑɑ sɑrɑmɔ mɛ.

6 Ǹ n mɛn nɑ, ɑ ku mɑɑ nùn nɔni ɡirɑri,

ɑdɑmɑ ɑ de u wɛ̃rɑ,

kpɑ u win sɔmburu ko, u win kɔsiɑru mwɑ kɑ nuku dobu.

7 Dɑ̃ru tɑ rɑ n yĩiyɔbu mɔ

mɑ tɑ koo se bɑ̀ n tu burɑ.

Domi tɑ koo kpɑrɑ.

8 Ten ɡbini yì n mɑɑ tɔkɔ kuɑ,

mɑ ten korɑ wɔrumɑ tɑ ɡu,

9 ten ɡbinɑ ɡɑɑ rɑ mɑɑ kpɑrewɑ yɑ̀ n nim wɑ

kpɑ yu kpii pɔturɑ ko.

10 Adɑmɑ tɔnu u rɑ ɡbiwɑ, kpɑ u kun mɑɑ wɑ̃ɑ.

Ù n ɡu, mɑnɑ u rɑ n wɑ̃ɑ.

11 Dɑɑ burerun nim mu rɑ ɡbere.

Dɑɑ bɑkɑnun nim mu rɑ mɑɑ kpe.

12 Nɡe mɛyɑ tɔnu u rɑ kpunɛ u kun mɑɑ seewe.

U ǹ mɑɑ dom yɑndɑmɔ

sere wɔllu tu kɑ kpe.

13 Gusunɔ, nɑ kĩ ɑ mɑn bere ɡɔribun wɑ̃ɑ yerɔ,

nɑ n kukuɑ mi, sere wunɛn mɔru yu kɑ sure,

kpɑ nɑ n wɑ̃ɑ mi sere dɔmɑ te kɑɑ mɑn yɑɑyɑ.

14 Tɔnu ù n koo rɑɑ se sɑnɑm mɛ u ɡu,

nɑ kon yĩiyɔbu mɔ nɛn wɑhɑlɑ yeni sɔɔ

sere nɛn wɑ̃ɑru tu kɑ kɔsi.

15 Sɑɑ ye sɔɔ, Gusunɔ,

ɑ̀ n nɛn bɛkɛ bɑrɔ,

ɑ̀ n mɑn soku,

nɛ wi nɑ sɑ̃ɑ wunɛn tɑkɑ koorɑ, kon nun wurɑri.

16 Wee tɛ̃ ɑ mɑn swĩi mi nɑ nɑɑsu wukɑ kpuro.

Adɑmɑ sɑɑ ɡɑɑ sisi yè sɔɔ ɑ ǹ mɑɑ nɛn durum ɡɑrisimɔ.

17 Kɑɑ nɛn torɑnu doke sɑɑki sɔɔ ɑ bɔke.

Kpɑ ɑ mɑn nɛn durum kpuro wɔkɑ.

18 Guunu koo wɔruku nu kɑm ko.

Kpɑ kpenu nu swɛnyɑ mi nu rɑɑ wɑ̃ɑn di.

19 Nim mu koo kpenu kɔsuku,

kpɑ mu mɑɑ kɑ tem kusɑnu doonɑ.

Nɡe mɛyɑ ɑ rɑ tɔnun yĩiyɔbu kɑm koosie win wɑ̃ɑru sɔɔ.

20 Kpɑ ɑ nùn nɔni swɑ̃ɑ dɑbinu kpɛ̃ɛ.

À n deemɑ u ǹ mɑɑ sɑ̃ɑ nɡe yellu,

kpɑ ɑ nùn ɡirɑ u doonɑ.

21 Bɑɑ win bibu bɑ̀ n yĩsiru yɑrɑ,

win tii u ǹ mɑɑ kpɛ̃ u n yɛ̃.

Mɛyɑ bɑ̀ n mɑɑ wɑ̃ɑ sekuru sɔɔ,

u ǹ kpɛ̃ u n yɛ̃.

22 Win wɑhɑlɑ tɔnɑwɑ yɑ koo nùn nɔni sɔ̃.

Wi turowɑ u ko n nuki sɑnkire win ɡɔ̃ruɔ.