1 Gɑri wee yi yi kɑ Tiri yɑ̃.

Bɛɛ be i wɑ̃ɑ ɡoo nimkuu bɑkɑsu sɔɔ,

i wuri koowo, domi bɛɛn wuu ɡɑ kɑm kuɑ.

Yɛnusu kun mɑɑ wɑ̃ɑ, duu yeru mɑɑ sɑri.

Sɑɑ Kitimun tem diyɑ sɑ yen lɑbɑɑri nuɑ.

2 I mɑrio bɛrum sɔ̃,

bɛɛ be i wɑ̃ɑ nim wɔ̃kun ɡooru ɡiɑ

mi Sidonin tenkubɑ bɑ rɑ sɑre.

3 Eɡibitiɡibu bɑ dobi yeemɔ dɑɑ te mɔ̀ Niluɔ

mɑ tenkubɑ bɑ ye dwemɔ bɑ dɔrɑmɔ

mɑ bɑ ɑre bɛkɛ dimɔ.

Mɑ yɑm mi, n kuɑ bwesenu kpuron yɑburu.

4 Sidoni, kɑɑ sekuru wɑ,

domi Tiri, nim wɔ̃kun wuu dɑmɡuu, ɡɑ ɡeruɑ ɡɑ nɛɛ,

ɡɑ ǹ mɑrubun wɑhɑlɑ ɡɑɑ wɑɑre, ɡɑ ǹ mɑɑ mɑrure.

Gɑ ǹ bii ɑluwɑɑsi bɔm kɛ̃ɛre,

ɡɑ ǹ mɑɑ bii wɔndiɑ seeyɑre.

5 Eɡibitiɡibu bɑ̀ n nuɑ mɑ Tiri yɑ wɔrumɑ,

bɑ koo diiri.

6 Bɛɛ be i wɑ̃ɑ nim wɔ̃kun ɡooru ɡiɑ,

i wuri koowo i kɑ dɑ Tɑɑsisiɔ.

7 Bɛɛn wuu ɡe ɡɑ wɑ̃ɑ sɑɑ yellun di

ɡè sɔɔ i rɑ nuku dobu ko, ɡerɑ mi?

Tiri yerɑ mi?

Yèn tɔmbu bɑ dɑ bɑ tem tukumɡibu kɑmiɑ?

8 Wɑrɑ u ye kpuron himbɑ yi Tirin sɔ̃,

ye, ye yɑ rɑ yen wiruɡibu swĩi tem tukumɔ.

Yen tenkubɑ bɑ kuɑ sinɑ bibu.

Mɑ bɑ bɛɛrɛ mɔ hɑnduniɑ kpuro sɔɔ.

9 Gusunɔ, wɔllu kɑ tem Yinniwɑ u ye yi,

u kɑ be bɑ tii sue kɑwɑ tem mɛ sɔɔ,

kpɑ bu be bɑ rɑɑ bɛɛrɛ wɛ̃ɛmɔ ɡɛm.

10 Bɛɛ Tɑɑsisiɡibu i tɛrio bɛɛn tem sɔɔ

nɡe mɛ dɑɑ te bɑ mɔ̀ Nilu tɑ̀ n nim yibɑ mu rɑ tɛrie.

Domi yoo sɔmɑ kpɑ.

11 Yinni Gusunɔ u win nɔmɑ dɛmiɑ nim wɔ̃kun berɑ ɡiɑ.

Mɑ u derɑ sinɑmbɑ diirɑ.

U derɑ Kɑnɑnin ɡbɑ̃rɑ dɑmɡinu nu wɔrukɑ.

12 U mɑɑ nɛɛ, bɛɛ Sidoniɡibu i ǹ mɑɑ nuku dobu wɑsi.

Domi bɑ bɛɛ dɑm dɔre nɡe wɔndiɑ wi u kun durɔ yɛ̃.

Bɑɑ ì n seewɑ i dɑ Kitimun temɔ,

min tii i ǹ wɛ̃rɑbu wɑsi.

13 I Bɑbiloniɡibu mɛɛrio.

Bɑ ǹ mɑɑ wɑ̃ɑ.

Asiriɡibu bɑ bu kpeerɑsiɑ.

Nɡe mɛyɑ bɑ Tiri wɔri bɑ tɑrusi,

bɑ yen sinɑ kpɑɑnu kɔsukɑ,

mɑ ye kpuro yɑ kuɑ bɑnsu.

14 I wuri koowo bɛɛ be i wɑ̃ɑ ɡoo

nimkuu bɑkɑsu sɔɔ.

Domi Tirin wuu dɑmɡuu ɡe, ɡɑ wɔrumɑ.

15 Bɑ koo Tirin ɡɑri duɑri n kɑ ko wɔ̃ɔ wɑtɑ kɑ wɔkuru nɡe sinɑ boko turon bɑndun tɛɛbun sɑkɑ. Adɑmɑ yen biru yɑ ko n sɑ̃ɑwɑ nɡe kurɔ sɑkɑrɑ wi bɑ womu doke bɑ mɔ̀,

16 ɑ mɔrɔku suo ɑ n soomɔ ɑ kɑ wuu sikerenɑ,

wunɛ wi ɑ sɑ̃ɑre kurɔ sɑkɑrɑ wi bɑ duɑri.

A ɡu soowo nɡe mɛ wunɛn yɛ̃rɑ nɛ,

ɑ n kɑ womu dɑbi dɑbinu mɔ̀,

kpɑ bu wunɛn ɡɑri yɑɑyɑ.

17 Wɔ̃ɔ wɑtɑ kɑ wɔku ten biru, Yinni Gusunɔ u koo de Tiri yu mɑɑ wurɑ yen yellun tenkuru sɔɔ te bɑ mɔ̀ kɑ tɑki. Kpɑ yu kɑ hɑnduniɑn tɔmbu kpuro ɑrukɑwɑni bɔke. 18 Adɑmɑ bɑ ǹ yen ɑrumɑni kɑ yen ɑre yi bɑ wɑ kɑ tɑki ɡurɑmɔ bu mɛnnɑ ben tiin sɔ̃. Bɑ koo ye kpuro Yinni Gusunɔ yiiyɑwɑ kpɑ yɑ n sɑ̃ɑ be bɑ nùn sɑ̃ɑmɔɡiɑ, kpɑ bu dĩɑnu wɑ bu di bu debu, kpɑ bu yɑ̃ɑ burɑnu wɑ bu doke.