21
1-2 Gɑri yiniwɑ Yinni Gusunɔ u ɡeruɑ Bɑbilonin sɔ̃. U mɑn kɑ̃si nɑnumɡiru sɔ̃ɔsi.
Nɑ wɑ yibɛrɛbɑ bɑ wee sɑɑ tem mɛ bɑ nɑsien di
nɡe mɛ woo ɡunɑ yɑ rɑ nɛ sɑɑ sɔ̃ɔ yɛ̃sɑn nɔm dwɑru ɡiɑn di.
Wi u rɑ dɑm dɔre, u dɑm dɔrɑmɔ.
Wi u rɑ mɑɑ kpeerɑsie, u kpeerɑsiɑmɔ.
Elɑmun tɑbu kowobu, i seewo.
Mɛdibɑ, i wuu ɡe tɑrusio.
Domi Yinni Gusunɔ u derɑ Bɑbiloni ye,
yɑ ǹ mɑɑ tɔmbu weeweenu koosimɔ.
3 Ye nɑ wɑ kɑ ye nɑ nuɑ kɑ̃si te sɔɔ,
yɑ derɑ nɛn tororɑ kɑrɑ.
Mɑ wuriribu mɑn wɔri nɡe tɔn kurɔ wi u yiire u kĩ u mɑ.
Tirerɑbu derɑ nɑ ǹ mɑɑ ɡɑri nɔɔmɔ.
Mɑ diiribu derɑ nɑ ǹ yɑm wɑɑmɔ.
4 Nɛn lɑɑkɑri yɑ burisinɑ,
mɑ nɑ diirimɔ bɛrum sɔ̃.
Yokɑ yè sɔɔ nɑ nuku dobu yĩiyɔ,
ye sɔɔrɑ bɛrum mɑn deemɑ.
5 Kɑ̃si te sɔɔ, nɑ mɑɑ wɑ bɑ dĩɑnu yii
bɑ kɔnnɔ kɔsu, bɑ dimɔ bɑ nɔrumɔ.
Yerɑ ɡoo u nɛɛ, i seewo tɑbu sinɑmbu,
i bɛɛn tɛrɛnu ɡum tɛɛni.
6 Mɑ Yinni Gusunɔ u mɑn sɔ̃ɔwɑ u nɛɛ,
n doo n wuu kɔ̃so yi kpɑ u mɑn sɔ̃ ye u koo wɑ.
7 Mɑ nɑ kuɑ mɛ.
Yerɑ u mɑɑsɔbu wɑ bɑ sĩimɔ yiru yiru.
Gɑbu bɑ kɛtɛkunu sɔni, ɡɑbu mɑɑ yooyoosu.
Mɑ u ye kpuro mɛɛrɑ kɑ lɑɑkɑri.
8 Yerɑ wuu kɔ̃so wi,
u ɡbɑ̃rɑ nɡe ɡbee sunɔ u nɛɛ,
ɡbɑ̃rɑ kɔnnɔ miyɑ u yɔ̃ sɑɑ kpuro,
sɔ̃ɔ sɔɔ kɑ wɔ̃kuru.
9 Mɑ u mɑɑsɔbu wɑ bɑ sĩimɔ yiru yiru.
Mɑ u wɑ Bɑbiloni yɑ wɔrumɑ birem.
Mɑ bwɑ̃ɑroku ni bɑ kuɑ ben bũnun sɔ̃
nu wɔrukɑ temɔ nu bɔɔkirɑ.
10 Bɛɛ nɛn tɔmbu Isirelibɑ,
bɛɛ be bɑ so nɡe dobi doo soo yerɔ,
yeniwɑ nɑ nuɑ Gusunɔ bɛɛn Yinnin min di,
wi, wi u sɑ̃ɑ wɔllu kɑ tem Yinni.
Yerɑ nɑ bɛɛ ye nɔɔsiɑmɔ.
Gɑri yi Gusunɔ u ɡeruɑ
Edɔmun sɔ̃
11 Wee ye Yinni Gusunɔ u mɑn sɔ̃ɔsi Edɔmun sɔ̃.
Nɑ nɔɔ ɡɑɡu nuɑ Seirin di ɡɑ nɛɛ,
wuu kɔ̃so, sɑɑ yerɑ̀ wɔ̃kuru tɑ koo kpe.
12 Mɑ wuu kɔ̃so u wisɑ u nɛɛ,
bururu tɑ koo nɑ, yen biru wɔ̃kuru tɑ koo mɑɑ nɑ.
Ì n kĩ i mɑɑ mɑn ɡɑri bikiɑ, i wurɑmɑ i bikiɑ.
Gɑri yi Gusunɔ u ɡeruɑ
Dɑɑrububɑn tem sɔ̃
13 Wee ye Yinni Gusunɔ u ɡeruɑ Dɑɑrububɑn tem sɔ̃.
Dedɑniɡibu, i doo i n wɑ̃ɑ yɑkɑsu sɔɔ wɔ̃kuru.
14 Bɛɛ be i wɑ̃ɑ Temɑɔ i kɑ be nim nɔru ɡɑ mɔ̀ nim dɑɑwo,
kpɑ i kɑ kpikobu dĩɑnu dɑɑwɑ.
15 Domi tɑbu swĩɑ mɑ tɔmbɑ duki mɔ̀ tɑkobi kɑ tɛndun sɔ̃.
16 Wee ye Yinni Gusunɔ u mɑn sɔ̃ɔwɑ. U nɛɛ, kɑm kɑm wɔ̃ɔ tiɑn biru kese, u koo Kedɑɑn bɛɛrɛ kpuro kpeerɑsiɑ. 17 Ben tɛn towo wɔruɡɔbɑ sɔɔ, fiikowɑ yɑ koo tiɑrɑ. Gusunɔ, Isirelibɑn Yinniwɑ u yeni ɡeruɑ.
Gɑri yi Gusunɔ u ɡeruɑ
Yerusɑlɛmun sɔ̃