wee Dɑmɑsi yɑ ǹ ko n mɑɑ wɑ̃ɑ,

yɑ koo kowɑ bɑnsu.

2 Bɑ koo Aroɛɛn wusu yɑɑ sɑbenu deriɑ.

Miyɑ nu ko n dɑ kpunɛ.

Goo mɑɑ sɑri wi u koo nu nɑndɑsiɑ.

3 Isirelibɑ bɑ ǹ ko n ɡbɑ̃rɑru mɔ.

Mɛyɑ Dɑmɑsi yɑ ǹ ko n mɑɑ sinɑ boko mɔ.

Siriɡii be bɑ tie, bɑ ǹ Isirelibɑ bɛɛrɛ kerɑmɔ.

Gusunɔ, wɔllu kɑ tem Yinniwɑ u yeni ɡeruɑ.

4 Sɑɑ ye sɔɔ, Isirelibɑn bɛɛrɛ yɑ koo kɑɑrɑ,

kpɑ ben dukiɑ yu doonɑ bu ko sɑ̃ɑrobu.

5 Ben tem mu ko n sɑ̃ɑ nɡe ɡbee

tèn dĩɑnu bɑ ɡɑ̃ bɑ ɡurɑ.

Nu ko n sɑ̃ɑwɑ pɑrɑ pɑrɑ

nɡe sɑnɑm mɛ bɑ dĩɑnu ɡurɑ Refɑn wɔwɑn di.

6 Isirelibɑn fiikowɑ yɑ koo tiɑrɑ

nɡe dɑ̃ɑ bii ni nu tiɑrɑ sɑnɑm mɛ bɑ dɑ̃ru sirɑ.

À n mɛɛrɑ kɑɑ wɑ

yiru ǹ kun mɛ itɑ tɔnɑ yɑ tie ten wii kpiirɔ,

mɑ nnɛ ǹ kun mɛ nɔɔbu yɑ tie ten kɑ̃ɑsi sɔɔ.

Gusunɔ Isirelibɑn Yinniwɑ u yeni ɡeruɑ.

7 Tɔ̃ɔ te sɔɔ, tɔmbɑ koo ben lɑɑkɑri wesiɑ ben tɑkɑ kowon mi ɡiɑ, kpɑ ben nɔni yi Gusunɔ Isirelibɑn Yinni Dɛɛro wɑ. 8 Bɑ ǹ mɑɑ ben lɑɑkɑri wesiɑmɔ bũu turɑnun berɑ ɡiɑ, ni ben tii bɑ kuɑ. Bɑ ǹ mɑɑ Asitɑɑten bwɑ̃ɑroku sɑ̃ɑmɔ, kɑ bwɑ̃ɑroku ni bɑ kuɑ sɔ̃ɔn sɔ̃. Domi nu sɑ̃ɑwɑ ben tiin nɔmɑn koorɑ.

9 Sɑɑ ye sɔɔ, Isirelibɑ bɑ koo ben wuu dɑmɡisu deri, kpɑ su ko bɑnsu nɡe mɛ Amɔrebɑ bɑ ben wusu deri be Isirelibɑn sɔ̃.

10 Wee bɛɛ Isirelibɑ, i Gusunɔ bɛɛn Yinni duɑri

wi u bɛɛ fɑɑbɑ kuɑ.

I ǹ nùn yɑɑye wi u sɑ̃ɑ bɛɛn kuku yee nɑɑnɛɡiru.

Domi wee i dɑ̃ɑ binu duurɑ bũnun sɔ̃.

11 Sɑnɑm mɛ i nu duurɑ, i nu kɑrɑ koosi,

mɑ nu seewɑ nu kpɛ̃ɑ fuuku, nu wɛ̃su kuɑ.

Adɑmɑ sɑnɑm mɛ i ko i nuku dobu ko i nin mɑrum sɔri,

i deemɑ ɡɑ̃ɑnu sɑri.

Mɑ n kuɑ nɔni swɑ̃ɑ bɑkɑru te tɑ ǹ kpeemɔ.

12 Annɑ ɑ kukiribu nɔ.

Bwese dɑbinu nu burisinɛ

mɑ nu kukirimɔ nɡe nim wɔ̃kun nim.

Nu wɔki nɡe dɑɑ tèn torɑ yɑ bɔɔbu.

13 Bɑ kukirimɔ nɡe dɑɑ bɑkɑrun nim.

Adɑmɑ Yinni Gusunɔ u bu ɡerusi,

mɑ bɑ duki yɑrinɑ n tomɑ,

nɡe yɑkɑ si woo ɡɑ suɑ ɡɑ kɑ doonɑ,

ǹ kun mɛ, nɡe tuɑ ye woo ɡunɑ yɑ seeyɑ.

14 Ye n kuɑ yokɑ mɑ bɑ bu kpeerɑsiɑ subɑru sɔɔ.

Yɑm mu sere sɑ̃rɑ bɑ ǹ mɑɑ wɑ̃ɑ.

Nɡe mɛyɑ be bɑ sun wɔrimɔ bu kɑ sun ɡurɑ

ben kɔkɔrɔ yɑ ko n sɑ̃ɑ.