ESAI
Tire ten ɡɑri yi sɑ̃ɑwɑ bɔnu itɑ.
Bɔnu ɡbiikɑɑ wiru1n di sere wiru 39.
Yudɑbɑn wɑhɑlɑn ɡɑriyɑ bɔnu ɡbiikɑɑ ye, yɑ mɔ̀. Wɑɑti ye sɔɔ, Yudɑbɑ bɑ Asiriɡibun bɛrum mɔ. Adɑmɑ Gusunɔn sɔmɔ Esɑi u wɑ mɑ n ǹ bɛrum mɛ tɔnɑ mu sɑ̃ɑ ben wɑhɑlɑ. Ye yɑ mɑɑ sɑ̃ɑ ben wɑhɑlɑ, yerɑ mɛm nɔɔbu sɑriru kɑ durum kɑ nɑɑnɛ ye bɑ ǹ Gusunɔ sɑ̃ɑ. Yen sɔ̃nɑ Esɑi u Yudɑbɑ kɑ ben kpɑrobu kirɔ kuɑ bu kɑ ɡɔ̃ru ɡɔsiɑ kpɑ bu wurɑ bu ɡem swĩi ben wɑ̃ɑru sɔɔ. U mɑɑ bu sɔ̃ɔwɑ mɑ ɡoo u koo yɑrimɑ Dɑfidin bweserun di kpɑ u kɑ bɔri yɛndu nɑ hɑnduniɑɔ.
Bɔnu yiruse wiru 40n di sere wiru 55.
Bɔnu yiruse sun sɔ̃ɔmɔ sɑɑ ye bɑ Yuubɑ yoru mwɛɛrɑ bɑ kɑ dɑ Bɑbiloniɔ. Sɑɑ ye sɔɔrɑ Gusunɔn sɔmɔ Esɑi u win tɔmbu sɔ̃ɔwɑ mɑ Gusunɔ u koo bu yɑkiɑ kpɑ u kɑ bu wurɑmɑ ben temɔ bu wɑ̃ɑ kpɑɑru di. Esɑi u mɑɑ sun sɔ̃ɔmɔ tire te sɔɔ mɑ Gusunɔwɑ u ɡɑ̃ɑnu kpuro nɛni win nɔmuɔ. Wiyɑ u derɑ ɡɑ̃ɑnu kpuro koorɑmɔ. Sɑɑ win tɔmbu Isirelibɑn min diyɑ hɑnduniɑ yɑ koo durom wɑ.
Bɔnu itɑse wiru 56n di sere wiru 66.
Yuu be bɑ wurɑmɑ yorun di bɑ wɑ̃ɑ Yerusɑlɛmuɔ, ben ɡɑriyɑ bɔnu itɑse yɑ mɔ̀. Esɑi u bu dɑm kɑ̃ u nɛɛ, Gusunɔ u koo win nɔɔ mwɛɛru yibiɑ u hɑnduniɑɡibu siri. U mɑɑ bu ɡem kobu kɑ tɔ̃ɔ wɛ̃rɑruɡiru kɑ yɑ̃kunu kɑ kɑnɑnun ɡɑri yɑɑyɑsiɑmɔ. Esɑi wiru 61:1-2n ɡɑriyɑ Yesu u dendɑ sɑnɑm mɛ u win sɔmburu toruɑ.
Tire ten kpunɑɑ
1. Bɑ Isirelibɑ kɑ Yudɑbɑ kirɔ mɔ̀, wiru 1n di sere wiru 12.
2. Yinni Gusunɔ u koo bwese tukunu sɛɛyɑsiɑ, wiru 13n di sere wiru 23.
3. Siri dɑ̃ɑkibu, wiru 24n di sere wiru 27.
4. Kirɔbɑ kɑ mɑɑ nɔɔ mwɛɛnu, wiru 28n di sere wiru 33.
5. Siri dɑ̃ɑkibu, wiru 34n di sere wiru 35.
6. Sinɑ boko Esekiɑsi kɑ Asiriɡibu, wiru 36n di sere wiru 39.
7. Nuku yɛmiɑbun nɔɔ mwɛɛnu, wiru 40n di sere wiru 55.
8. Lɑbɑɑri dorɑ, wiru 56n di sere wiru 66.

1 Tire ten ɡɑri yi sɑ̃ɑwɑ ɡɑri yi Gusunɔn sɔmɔ Esɑi Amɔtin bii u ɡeruɑ Yudɑbɑn sɔ̃, kɑ sere ben wuu Yerusɑlɛmun tiin sɔ̃. U ɡɑri yi ɡeruɑwɑ sɑnɑm mɛ sinɑm beni, Osiɑsi kɑ Yotɑmu kɑ Akɑsi kɑ Esekiɑsi bɑ bɑndu di di Yudɑɔ.

Tɔn be bɑ ku rɑ ɡɑ̃ɑnu tubu

2 Yinni Gusunɔ u nɛɛ,

wɔllu kɑ tem, i kɑ mɑn nɔɔwɔ.

Nɑ nɛn bibu seeyɑ,

nɑ bu swɑɑ sɔ̃ɔsi,

ɑdɑmɑ bɑ mɑn seesi.

3 Nɑɑ kinɛnu nu rɑ n nin kpɑro yɛ̃.

Kɛtɛkunu nu rɑ n mɑɑ yɛ̃ mi nin yinni u rɑ nu dĩɑnu yiiye.

Adɑmɑ nɛn tɔmbu Isirelibɑ bɑ ǹ mɑm kĩ bu ɡɑ̃ɑnu ɡiɑ.

Bɑ ku rɑ ɡɑ̃ɑnu tubu.

4 Mɑ Esɑi u nɛɛ,

bɛɛ Isirelibɑ, bɔ̃rurobɑ i sɑ̃ɑ,

domi i durum mɔ̀wɑ.

Torɑnu nu yibɑ bɛɛn suunu sɔɔ.

Nuku kɔ̃surun wɑ̃ɑrɑ i wɑ̃ɑ.

Bɛɛ kpuro i sɑnkirewɑ,

domi i Yinni Gusunɔ deri.

I nùn ɡɛmɑ, wi, wi u sɑ̃ɑ bɛɛn Yinni Dɛɛro,

mɑ i nùn biru kisi.

5 Sɛɛyɑsiɑ birɑ̀ u koo mɑɑ bɛɛ ko,

domi nɔn dɑbinɑ i nùn seesi.

I sɑ̃ɑwɑ nɡe tɔnu wìn bwisikunu kun wɑ̃,

mɑ u dɑɑ kɔ̃sɑ mɔ̀.

6 Sɑɑ win wirun di sere kɑ win nɑɑ tɑrɑnɔ,

kpuro bɑrɑrɑ.

Domi bɑ ǹ win mɛɛrɑbɑ kɑ win bosu teye

bu tim ɡumɡim doke bu sere mɑm nɛɛ, bɑ koo bɔke.

7 Bɛɛn tem mu kuɑ bɑnsu.

Mɛn wusu dɔ̃ɔ mwɑɑkirɑ.

I tɔn tukobu mɛɛrɑ bɑ kɑ mɛn dĩɑnu ɡurɑ,

bɑ ǹ ɡɑ̃ɑnu deri.

8 Mɑ Yerusɑlɛmu yɑ tiɑrɑ ye tɔnɑ.

Yɑ kɔ̃ɔre nɡe kuru resɛm ɡbɑɑrun suunu sɔɔ,

ǹ kun mɛ, ɡberɔ.

Yɑ yɔ̃ tom ye tɔnɑ

nɡe wuu ɡe bɑ tɑbu bure bɑ doonɑ.

9 Gusunɔ, wɔllu kɑ tem Yinni

ù kun dɑɑ bɛsɛn sukum fiiko fɑɑbɑ kue

Yerusɑlɛmu ye sɔɔ, yɑ koo rɑɑ kɑm kowɑ nɡe Sodomu kɑ Gomɔrɑ.

Sɑ̃ɑ te Gusunɔ u tusɑ

10 Mɑ Gusunɔ u nɛɛ,

bɛɛ wiruɡibu be i kɑ Sodomuɡibu weenɛ,

i nɛ, Yinni Gusunɔn ɡɑri swɑɑ dɑkio.

Bɛɛ be i mɑɑ tie, i kɑ Gomɔrɑɡibu weenɛ,

i nɛn woodɑ mɛm nɔɔwɔ.

11 I tɑmɑɑ bɛɛn yɑ̃ku dɑbi ni, nu mɑn ɡɑ̃ɑnu sɑ̃ɑ?

Bɛɛn yɑ̃ku yɑ̃ɑnu kɑ yɑ̃ku ɡum

mɛ i rɑ kɑ mɑn yɑ̃ku dɔ̃ɔ mwɑɑrɑruɡinu kue,

yɑ den mɑn tusɑ.

Nɑ wɑsirɑ kɑ bɛɛn yɑɑ sɑbenun yɛm

mɛ i rɑ yɛ̃ke nɛn sɑ̃ɑ yerɔ.

12 Ye i rɑ nɛ nɛn sɑ̃ɑ yerɔ kɑ wɔrubu,

yeyɑ nɑ bɛɛ bikiɑ?

13 Bɛɛn kɛ̃ɛ ni i kɑ nɑɑmɔ mi kɑmɑ.

I ku rɑ mɑɑ kɑ nu nɑ.

Bɛɛn turɑre yɑ ǹ mɑn nuburu doremɔ.

I ku mɑɑ mɑn ye dɔ̃ɔ dokeɑ.

Nɑ den bɛɛn kɔ̃sɑ ye tusɑ

ye i rɑ ko ì n mɛnnɑ nɛn sɑ̃ɑ yerɔ

i kɑ mɑn sɑ̃, suru ù n yɑrɑ,

kɑ tɔ̃ɔ wɛ̃rɑruɡiru sɔɔ,

kɑ sere mɑɑ tɔ̃ɔ bɑkɑnun sɑɑ.

I ku mɑɑ mɑn tɔ̃ɔ bɑkɑ nin bweseru diiyɑ.

14 Nɑ mɑɑ bɛɛ sɔ̃ɔmɔ,

bɛɛn tɔ̃ɔ bɑkɑ ni kpuro nu mɑn tusɑwɑ.

Nu mɑn sɑ̃ɑwɛwɑ sɔmu bɑkɑnu.

Nɑ mɑɑ wɑsirɑ n kɑ nu sɔbe.

15 Bɑɑ ì n bɛɛn kɑnɑru dɛnyɑsiɑmɔ,

nɑ ku rɑ nu swɑɑ dɑki.

Ì n nɔmɑ yiiyɑ wɔllɔ i kɑ kɑnɑru ko,

nɑ rɑ nɛn wuswɑɑ sĩiyɛwɑ,

nɑ kun bɛɛ mɛɛrɑ.

Domi bɛɛn nɔmɑ tɔmbun yɛm yibɑ be i ɡo.

16 Yen sɔ̃, i tii sɑ̃rɑsio

i nuku kɔ̃suru deri,

kpɑ i ku mɑɑ kɔ̃sɑ ko.

17 I seewo i ɡeɑ ko,

kpɑ i n ɡem swĩi.

I be bɑ dɑm dɔremɔ fɑɑbɑ koowo.

I ɡobekubɑ wɛ̃ɛyɔ ye n sɑ̃ɑ beɡiɑ,

kpɑ i kɑ ɡɔminibu yinɑ.

18-19 I nɑ su wesiɑnɑ kpɑ su nɔɔsinɑ.

Ì n wurɑ i mɑn mɛm nɔɔwɑ,

bɑɑ bɛɛn ɡɔ̃ru ɡɑ̀ n tĩri nɡe weke biru,

kon ɡu dɛɛrɑsiɑ ɡu bururɑ nɡe wɛ̃su.

Bɑɑ ɡɑ̀ n mɑɑ sɔ̃rin nɑ nɡe wɛ̃ɛ wunɔmɡii,

ɡɑ koo bururɑ nɡe wɛ̃ɛ kpiki,

kpɑ i tem mɛn dĩɑ ɡeenu di.

20 Adɑmɑ ì n yinɑ, mɑ i mɑn seesi,

bɑ koo bɛɛ ɡowɑ tɑbu sɔɔ kɑ tɑkobi.

Nɛ, Yinni Gusunɔwɑ nɑ yeni ɡeruɑ.

Yinni Gusunɔ

u koo Yerusɑlɛmu dɛɛrɑsiɑ

21 Gusunɔ u nɛɛ,

Yerusɑlɛmu, wunɛ wi nɑ rɑɑ nɑɑnɛ sɑ̃ɑ,

wee ɑ kuɑ nɡe kurɔ sɑkɑrɑ kowo,

wi u win durɔ deri.

Domi yellu ɡemɡibɑ rɑɑ yibɑ wunɛ sɔɔ.

Adɑmɑ ɡisɔ, tɔn ɡowobu tɔnɑwɑ bɑ nun wɑ̃ɑsi.

22 A rɑɑ sɑ̃ɑ nɡe sii ɡeesu.

Wee ɑ kuɑ nɡe sii bisu.

A rɑɑ sɑ̃ɑwɑ nɡe tɑm ɡem.

Adɑmɑ tɛ̃, ɑ kuɑ nɡe tɑm mɛ bɑ nim doke.

23 Wunɛn wiruɡibɑ mɑn seesi,

mɑ bɑ kɑ ɡbɛnɔbu nɔɔ tiɑ sɑ̃ɑ.

Be kpurowɑ bɑ rɑ n kɛ̃nu yĩiyɔ,

kpɑ bɑ n nɔm birɑn kɛ̃nu nɑɑ ɡire.

Bɑ ku rɑ ɡobekubɑ wɛ̃ ye n sɑ̃ɑ beɡiɑ,

bɑ ku rɑ mɑɑ kɑ ɡɔminibu yinɛ.

24 Yen sɔ̃, i swɑɑ dɑkio i nɔ

ye nɛ Gusunɔ, wɔllu kɑ tem Yinni nɑ ɡerumɔ,

nɛ wi nɑ sɑ̃ɑ bɛɛ Isirelibɑn dɑm.

Nɑ nɛɛ, kon bɛɛ nɛn yibɛrɛbɑ mɔru kɔsie

kpɑ nɛn mɔru yu wɑ yu sure.

25 Kon bɛɛ nɔmɑ doke

kpɑ n bɛɛ wɔ̃ nɡe sisu

n bɛɛn disinu kpuro wunɑ

kpɑ i dɛɛrɑ.

26 Kon bɛɛ kuɑ nɡe yellu.

Siri kowobu bɑ ǹ mɑɑ nɔm birɑn kɛ̃nu mwɑɑmɔ.

Mɛyɑ bɑ ǹ mɑɑ bwisi kɛ̃ɔbun nɔsu ɡum tɛɛnimɔ.

Sɑɑ yerɑ bɑ koo nɛɛ,

ɡemɡibu kɑ nɑɑnɛɡibun wuuwɑ mini.

27 Kon Yerusɑlɛmu yɑkiɑ yɑ̀ n nɛn kĩru swĩi,

kpɑ n mɑɑ yen tɔmbu wɔrɑ

be bɑ ɡɔ̃ru ɡɔsiɑ mi kpuro.

28 Be bɑ mɑn seesi, kon bu kɑm koosiɑ.

Be bɑ durum mɔ̀, kpɑ n bu ɡo.

Be bɑ mɑɑ mɑn biru kisi, kpɑ n bu kpeerɑsiɑ.

29 Sɑɑ ye sɔɔ, dɑ̃ɑ bɑkɑnu kɑ dɑ̃ɑ sɔ̃ɔ

si su sɑ̃ɑ bɛɛn bũu yenu,

su koo de i sekuru wɑ.

30 I ko kowɑ nɡe dɑ̃ɑ bɑkɑ ni,

sɑnɑm mɛ nin wurusu dɛllɑmɔ,

ǹ kun mɛ nɡe dɑ̃ɑ sɔ̃ɔ si,

sɑnɑm mɛ su ǹ mɑɑ nim wɑɑmɔ.

31 Wi u tɑmɑɑ u dɑm mɔ u koo ko nɡe yɑkɑsu,

kpɑ win kookoosu su n sɑ̃ɑ nɡe dɔ̃ɔ buri,

kpɑ u dɔ̃ɔ mwɑɑrɑ kɑ win kookoo si sɑnnu.

Goo sɑri wi u koo kpĩ u bu fɑɑbɑ ko.

Esɑi 2 ->