2
1 Adɑmɑ nɛ, Hɑbɑkuku nɑ yɔ̃wɑ ɡbɑ̃rɑru wɔllɔ nɛn kɔ̃su yerɔ
nɡe wi u yɔɔru bwɛ̃ɛ,
kpɑ n kɑ nɔ ye Gusunɔ u koo mɑn sɔ̃,
kɑ nɡe mɛ u koo mɑn wisi nɛn weeweenun sɔ̃.
Gusunɔ u Hɑbɑkuku wisɑ
2 Yerɑ Yinni Gusunɔ u mɑn wisɑ u nɛɛ,
n ɡɑri yi yoruo yi u mɑn sɔ̃ɔmɔ.
N yi yoruo kpɑsɑsɑ kpee bɛsi sɔɔ.
3 Yin tɔ̃rɑ kun ɡinɑ turɑ yi kɑ koorɑ.
Adɑmɑ yi koo koorɑ yin sɑɑ yɑ̀ n turɑ.
Bɑɑ yì n tɛɛmɔ, nɑ n ɡesi yi mɑrɑ.
Domi yi koo koorɑwɑ kɑm kɑm.
4 N yoruo mɑ wi u tii sue u ǹ wɑ̃ɑ swɑɑ ɡeɑ sɔɔ.
Adɑmɑ wi u kuɑ ɡemɡii nɑɑnɛ dokebu sɔɔ, u ko n wɑ̃ɑwɑ.
5 Wi u tii sue, u ku rɑ sinɛ sɛ̃ɛ.
U rɑ n sɑ̃ɑwɑ nɡe tɑm nɔro,
kpɑ u n nɔɔ wukie nɡe ɡɔribun wɑ̃ɑ yeru.
U ku rɑ debu nɡe ɡɔɔ.
U rɑ n tii bwesenu ɡɑwemɔwɑ u kɑ ko nin yinni.
Bɔ̃rusibu nɔɔbu
6 Adɑmɑ bwese ni u mwɛɛrɑ mi,
nu koo nùn seesi nu nùn ɡɑri sɔ̃ kɑ wɔmɑ kɑ mɔnnu, nu nɛɛ,
u kuɑwɑ bɔ̃ruro wi, wi u dukiɑ mɛnnɑmɔ ye yɑ ǹ sɑ̃ɑ wiɡiɑ,
mɑ u ɡɑbun yɑ̃nu ɡurɑmɔ u tɔrubɑ yiimɔ.
Sere sɑɑ yerɑ̀ u ko n mɔ̀ nɡe mɛ.
7 Bèn dibu u nɛni, bɑ koo nùn seesi subɑru sɔɔ,
kpɑ bu ɡurɑ ye u mɔ.
8 Nɡe mɛ u tɔn dɑbinu wɔri u nin yɑ̃nu ɡurɑ,
nɡe mɛyɑ be bɑ tie, bɑ koo mɑɑ nùn wɔri bu win yɑ̃nu ɡurɑ
yèn sɔ̃ u tɔmbun yɛm yɑri,
mɑ u tem kɑ mɛn wusu kɑ mɛn tɔmbu dɑm dɔre.
9 Bɔ̃rurowɑ wi u dukiɑ ɡurɑmɔ
ye yɑ ǹ dɛɛre win berusebun mi,
kpɑ u wɑ u n wɑ̃ɑ ɑye bɛɛrɛɡiru sɔɔ,
mi u ǹ mɑɑ nɔni swɑ̃ɑru wɑsi.
10 Adɑmɑ win yɛnun sekurɑ u sɔɔru kuɑ mi,
ye u kɑ bwese dɑbinu ɡo.
Win tiin wɑ̃ɑrɑ u kɑri bɔrie.
11 Domi bɑɑ kɑ ɡɑniɔ, yi koo wuri ko yi nùn tɑɑrɛ wɛ̃,
kpɑ kpɛɛrun yɑri yi wuri wurɑ.
12 Bɔ̃rurowɑ wi u win wuun kpɛɛkpɛɛku swĩimɔ yɛm wɔllɔ,
mɑ u tɔmbu dɑm dɔremɔ.
13 Ye tɔmbɑ mɔ̀ kpuro, yɑ koo dɔ̃ɔ mwɑɑrɑ.
Bɑ tii nɔwiɑ mɔ̀wɑ kɑm sɔɔ.
Gusunɔ wɔllu kɑ tem Yinniwɑ u koo ye kpuro kɑm koosiɑ.
14 Sɑɑ ye sɔɔ, Yinni Gusunɔn bɛɛrɛ yɛ̃ru tɑ ko n yibɑwɑ tem sɔɔ
nɡe mɛ nim wɔ̃ku ɡɑ rɑ n nim yibɑ.
15 Bɔ̃rurowɑ wi u win beruse tɑm bɔɔbɔm wɛ̃ɛmɔ
mu kɑ nùn ɡo nɡe dɛ̃ɛ, u n yɔ̃ tereru,
kpɑ u nùn sekuru doke u n mɛɛrɑ.
16 Yɛ̃ro u tii sekuru dokemɔwɑ mi, n ǹ mɔ bɛɛrɛ.
Win tii u mu nɔruo kpɑ u tereru yɔ̃rɑ.
Yinni Gusunɔ u koo nùn tilɑsi ko
u kɑ win mɔrun nɔrɑ nɔ kpuro,
kpɑ win bɛɛrɛ ye u rɑɑ mɔ yu ɡɔsiɑ sekuru.
17 Dɑɑ kɔ̃sɑ ye u kuɑ Libɑniɔ,
yɑ koo wɔri win wiru wɔllɔ.
U yɛɛ ɡo.
Adɑmɑ yɛɛ yi, yi koo nùn nɑndɑsiɑ.
Yeni kpuro yɑ koo nùn deemɑ yɛm mɛ u yɑrin sɔ̃,
kɑ dɑm mɛ u tem mɛ kɑ mɛn wusu kɑ mɛn tɔmbu dɔren sɔ̃.
18 Arufɑɑni yerɑ̀ bwɑ̃ɑrokunu nu mɔ tɔnu u kɑ sinɑ u nu seku.
Nu sɑ̃ɑwɑ ni bɑ sekɑ kɑ sisu,
mɑ nu derɑ u weesu nɑɑnɛ sɑ̃ɑ.
Mbɑn sɔ̃nɑ tɔnu u koo win nɑɑnɛ doke bwɑ̃ɑroku ni u sekɑ sɔɔ,
ni, ni nu ǹ kpɛ̃ nu ɡɑri ɡere.
19 Bɔ̃rurowɑ wi u dɑ̃ɑ kuku sɔ̃ɔmɔ u mɔ̀, ɡu seewo,
mɑ u kperu sɔ̃ɔmɔ u mɔ̀, tu dom yɑndo.
Yen ɡɑɑ yɑ koo kpĩ yu nùn bwisi kɛ̃?
Geemɑ, u nu wurɑ kɑ sii ɡeesu pote.
Adɑmɑ nu ǹ hunde mɔ, nu n sere wɑ̃ɑru mɔ.
20 Yinni Gusunɔ u wɑ̃ɑ win sɑ̃ɑ yee dɛɛrɑrɔ.
Tɔmbu kpuro bu nɔɔ mɑrio win wuswɑɑɔ.
Hɑbɑkukun kɑnɑru