TIRE TE PƆLU
U GALATIGIBU KUA
Gɑlɑtiɡibɑ Pɔlu u tire te kuɑ. Gɑlɑtin tem mu kpɑ̃. Gisɔ, tem mɛyɑ bɑ sokumɔ Turuki. Pɔluwɑ u ɡbiɑ u wɑɑsu dɑ tem mi, Gɔrobun Kookoosu wiru 13 kɑ 14. Yen biru, Yuu ɡɑbɑ nɑ bɑ bu sɔ̃ɔsi tukunu sɔ̃ɔsimɔ ni nu sɑ̃ɑ Yuubɑn deemɑɑ. Niyɑ, bɑnɡo kobu kɑ woodɑn mɛm nɔɔbu. N deemɑ Pɔlu u rɑɑ Gɑlɑtiɡibu sɔ̃ɔwɑ tokereke mɑ ɡoo sɑri wi u koo win torɑnun suuru wɑ Gusunɔn mi mɑ n kun mɔ yɛ̃ro u ɡɔ̃ru ɡɔsiɑ mɑ u Yesu nɑɑnɛ doke. Ye Pɔlu u nuɑ mɑ nɑɑnɛ dokeobu bɑ wurɑmɔ Yuubɑn sɔ̃ɔsi ni sɔɔ, yerɑ biti nùn mwɑ too, wiru 1:6 kɑ 4:20. Yen sɔ̃nɑ u tire teni yoruɑ kɑ mɔru u kɑ bu kirɔ ko Yuubɑn sɔ̃ɔsi nin sɔ̃. Domi sɔ̃ɔsi nin bweseru nu ǹ sɑ̃ɑ Gusunɔɡinu.
Tire ten kpunɑɑ
1. Tɔbiribu, wiru 1:1-5.
2. Lɑbɑɑri Geɑ yɑ sɑ̃ɑwɑ tiɑ, wiru 1:6-10.
3. Pɔlu u kɑ tii yinɑmɔ, wiru 1:11n di sere wiru 2:21.
4. Nɑɑnɛ dokebu kɑ Gusunɔn durom sɔ̃nɑ tɔnu u koo ɡem wɑ, wiru 3n di sere wiru 4.
5. Nɑɑnɛ dokeon tii mɔru, wiru 5:1n di sere wiru 6:10.
6. Kirɔ dɑ̃ɑkɑ kɑ tɔbiribu, wiru 6:11-18.

Tɔbiribu

1-5 Bɛɛ Yesun yiɡbɛnuɡibu, bɛɛ be i wɑ̃ɑ Gɑlɑtin temɔ, nɛ kɑ bɛsɛɡibu kpuro be sɑ wɑ̃ɑ sɑnnu, sɑ bɛɛ tɔburɑ. Gusunɔ Bɑɑbɑ kɑ Yinni Yesu Kirisi bu bɛɛ durom kuɑ kpɑ bu bɛɛ ɑlɑfiɑ kɛ̃. Yesu Kirisi wi, u tii wɛ̃ bɛsɛn torɑnun sɔ̃ u kɑ sun wɔrɑ sɑɑ hɑnduniɑ kɔ̃sɑ yen nɔmɑn di, Gusunɔ bɛsɛn Bɑɑbɑn kĩru sɔɔ. Wiyɑ u yiiko mɔ sere kɑ bɑɑdommɑɔ. Ami.

Nɛnɑ Pɔlu. Yesu Kirisiwɑ u mɑn sokɑ n kɑ ko win ɡɔro, wi kɑ Gusunɔ Bɑɑbɑ, wi u nùn seeyɑ ɡɔrin di. N ǹ mɔ tɔmbɑ bɑ mɑn sokɑ, nɛn sokurɑ kun nɛ sɑɑ tɔnu ɡoon min di.

Lɑbɑɑri ɡeɑ ɡɑɑ mɑɑ sɑri

6 N mɑn biti kuɑ, wee, i yɛ̃ro derimɔ fuuku fuuku wi u bɛɛ sokɑ kɑ Kirisin durom, mɑ i kĩ i Lɑbɑɑri ɡeɑ ɡɑɑ swĩi. 7 Sɑ̀ n ɡem ɡerumɔ, Lɑbɑɑri ɡeɑ ɡɑɑ mɑɑ sɑri. Gɑbɑ ɡesi bɛɛn lɑɑkɑri burisinɑmɔwɑ, mɑ bɑ kĩ bu Kirisin Lɑbɑɑri ɡeɑ ɡɔsiɑ. 8 Adɑmɑ bɑɑ bɛsɛn tii, ǹ kun mɛ ɡɔrɑdo wi u nɑ wɔllun di, ù n bɛɛ Lɑbɑɑri ɡeɑ tukɑ wɑɑsu kuɑ, ye yɑ ǹ sɑ̃ɑ ye sɑ bɛɛ sɔ̃ɔwɑ bu nùn bɔ̃rusio. 9 Sɑ rɑɑ ɡeruɑ, nɑ mɑɑ wure nɑ ɡerumɔ, ɡoo ù n bɛɛ ɡɑri tuki wɑɑsu kuɑ yi yi ǹ sɑ̃ɑ yi i mwɑ kɔ, bu nùn bɔ̃rusio.

10 Nɑ tɔnun siɑrɑbu kɑsu kɑ ɡɑri yini? Aɑwo, Gusunɔn siɑrɑbɑ nɑ kĩ. Nɑ kookɑri mɔ̀ n kɑ ko ye n koo tɔmbu dore ro? Aɑwo. Nɑ̀ n kĩ n ko sere kɑ tɛ̃ ye n tɔmbu doremɔ, nɑ ǹ ko nɑ n sɑ̃ɑ Kirisin yoo.

Nɡe mɛ Pɔlu u kɑ kuɑ ɡɔro

11 Nɛɡibu, nɑ bɛɛ sɔ̃ɔmɔ mɑ Lɑbɑɑri ɡeɑ ye nɑ kpɑrɑmɔ yɑ ǹ sɑ̃ɑ tɔnuɡiɑ. 12 Nɑ ǹ ye mwɛ tɔnun min di, ɡoo kun mɑɑ mɑn ye keu kue, Yesu Kirisiwɑ u mɑn ye sɔ̃ɔsi.

13 I nuɑ nɡe mɛ nɛn wɑ̃ɑrɑ rɑɑ sɑ̃ɑ sɑnɑm mɛ nɑ Gusunɔ sɑ̃ɑmɔ nɡe mɛ Yuubɑ bɑ rɑ ko. Nɑ rɑ n Gusunɔn yiɡbɛru nɔni sɔ̃ɔmɔ n bɑndɑ n kɑ tu kɑm koosiɑ. 14 Nɛn sikɑdobɑn komɑrun kĩrun sɔ̃nɑ nɑ nɛn Yuusi dɑbiru ɡbiiri Yuubɑn sɑ̃ɑru sɔɔ be bɑ sɑ̃ɑ nɛn sɑɑrɑbɑ.

15 Adɑmɑ Gusunɔ u mɑn ɡɔsɑ bɑ sere mɑn mɑrɑ mɑ u mɑn sokɑ win durom sɔɔ. 16 Mɑ sɑnɑm mɛ u ɡɔ̃ru doke u mɑn win Bii sɔ̃ɔsi kpɑ n kɑ tɔn tukobu win Lɑbɑɑri ɡeɑ wɑɑsu kuɑ, nɑ ǹ de tɔmbu ɡɑbun mi bu kɑ mɑn bwisi kɛ̃. 17 Nɑ ǹ mɑɑ de Yerusɑlɛmuɔ n kɑ bu wɑ be bɑ ɡbiɑ bɑ kuɑ Yesun ɡɔrobu nɑ sere kuɑ ɡɔro. Adɑmɑ nɑ yɑnde dɑwɑ Dɑɑrububɑn tem sɔɔ. Min diyɑ nɑ mɑɑ wurɑ Dɑmɑsiɔ. 18 N tɛ n kuɑ wɔ̃ɔ itɑ nɑ sere Yerusɑlɛmu dɑ n kɑ Piɛɛ ɡiɑ, mɑ nɑ sinɑ win mi sɔ̃ɔ wɔkurɑ nɔɔbu. 19 Nɑ ǹ mɑɑ ɡɔro ɡoo wɑ mi, mɑ n kun mɔ Yɑkɔbu, Yinnin wɔnɔ.

20 Ye nɑ yorumɔ, ɡemɑ. Gusunɔwɑ sɑ̃ɑ nɛn seedɑɡii nɑ̀ n weesu mɔ̀.

21 Yen biru nɑ Sirin tem dɑ kɑ Silisin tem. 22 Sɑnɑm mɛ, Kirisin yiɡbɛ ni nu wɑ̃ɑ Yudeɑɔ nu ǹ ɡinɑ mɑn wɑɑre. 23 Bɑ ɡesi nuɑ mɑ wi u rɑɑ bu nɔni sɔ̃ɔmɔ, u tɛ̃ Yesun fɑɑbɑn ɡɑri wɑɑsu mɔ̀, yi u rɑɑ kĩ u kɑm koosiɑ. 24 Mɑ bɑ Gusunɔ siɑrɑ nɛn sɔ̃.

Pɔlu kɑ ɡɔro be bɑ tie