SAMUƐLIN TIRERU YIRUSE
Sɑmuɛlin tire ɡbiikirun ɡɑriyɑ tire teni tɑ kurɑsiɑmɔ. Dɑfidin bɑndun ɡɑriyɑ tɑ mɔ̀ te u di Yudɑbɑ kɑ Isirelibɑ kpuro sɔɔ.
Tɑ mɑɑ sun sɔ̃ɔmɔ tɑɑ bi Dɑfidin tɑbu kowobu kɑ win tii bɑ kuɑ u kɑ kpĩɑ u win bɑndu dɑm sire.
Nɑsiɑ te u Gusunɔ nɑsie kɑ sere mɑɑ kĩi te u nùn kĩ, ye kpuro yɑ derɑ tɔmbɑ win tii kĩɑ mɑ u bɛɛrɛ kuɑ. Mɛyɑ tɑ mɑɑ sun sɔ̃ɔsimɔ mɑ Dɑfidi u kɔmiɛ win wɑ̃ɑru sɔɔ. U torɑ, mɑ win torɑ te, tɑ kɑ wɑhɑlɑ dɑbinu nɑ win yɛnuɔ. Win bibɑ ɡoonɑ mɑ bɑ kɑrɑnɑ. Bɑ torɑnu kuɑ ni nu ǹ mɑm kɑ nɔɔ ɡerurɔ. Adɑmɑ wɑhɑlɑ ye kpuro sɔɔ, Dɑfidi u nɑsɑrɑ wɑ, yèn sɔ̃ u win torɑnu wurɑ Yinni Gusunɔn wuswɑɑɔ.
Tire ten kpunɑɑ
1. Dɑfidi u bɑndu di Yudɑbɑ sɔɔ, wiru 1n di sere wiru 4.
2. Dɑfidi u bɑndu di Isirelibɑ kpuro sɔɔ, wiru 5n di sere wiru 20.
3. Dɑfidin bɑndun ɡɑri ɡɛɛ, wiru 21n di sere wiru 24.

Dɑfidi u Sɔɔlun ɡɔɔ nuɑ

1 Ye Dɑfidi u Amɑlɛkibɑ ɡo u wee, yerɑ u yɔ̃rɑ Sikilɑɡiɔ sɔ̃ɔ yiru. N deemɑ Sɔɔlu u ɡu kɔ. 2 Sɔ̃ɔ itɑseru, yerɑ durɔ ɡoo u yɑrimɑ sɑɑ tɑbu ɡberun di mi Sɔɔlu u rɑɑ wɑ̃ɑ. Durɔ win yɑberɑ ɡɛ̃ɛkire mɑ win wirɑ tuɑ sɑ̃ɑ nuku sɑnkirɑnun sɔ̃. Sɑɑ ye u tunumɑ Dɑfidin mi, u yiirɑ kurɛ u wiru tem ɡirɑri. 3 Mɑ Dɑfidi u nùn bikiɑ u nɛɛ, mɑn diyɑ ɑ wee.

Mɑ u nɛɛ, sɑɑ Isirelibɑn tɑbun sɑnsɑnin diyɑ nɑ dukɑ suumɑ.

4 Dɑfidi u kpɑm nùn bikiɑ u nɛɛ, ɑmɔnɑ ɡberɑ sɑ̃ɑ. A suuru koowo ɑ mɑn sɔ̃ɔwɔ nɡe mɛ n koosinɑ kpuro.

Mɑ durɔ wi, u nɛɛ, tɑbu Isirelibɑ swĩiyɛ bɑ duki. Ben dɑbirɑ mɑɑ wɔrukɑ bɑ ɡu. Mɛyɑ Sɔɔlun tii kɑ win bii Yonɑtɑm bɑ ɡu.

5 Mɑ Dɑfidi u nɛɛ, ɑmɔnɑ ɑ kuɑ ɑ kɑ yɛ̃ mɑ Sɔɔlu kɑ win bii Yonɑtɑm bɑ ɡu.

6 Mɑ u nɛɛ, nɑ nɛn wɑ̃ɑru wɑ̃ɑwɑ Giliboɑn ɡuuru wɔllɔ nɑ kɑ Sɔɔlu mɛɛrɑ u kɑ tii win yɑɑsɑ tɑ̃sɑ. Mɑ yibɛrɛbɑn tɑbu kɛkɛ dumiɡii kɑ mɑɑsɔbu bɑ nùn sɔndi mɑm mɑm bɑ ɡire. 7 Sɑɑ ye u sĩirɑ u mɛɛrimɑ biruɔ u mɑn wɑ, yerɑ u mɑn sokɑ mɑ nɑ wurɑ nɑ dɑ win mi. 8 Mɑ u mɑn bikiɑ u nɛɛ, nɛ wɑrɑ. Nɑ nùn wisɑ nɑ nɛɛ, nɛ Amɑlɛkiwɑ. 9 Mɑ u nɛɛ, n susimɑ win bɔkuɔ kpɑ n nùn ɡo bɑɑ mɛ u dɑm tie u tirekirɑmɔ. 10 Mɑ nɑ susi win bɔkuɔ nɑ nùn ɡo. Domi nɑ yɛ̃ mɑ u ǹ mɑɑ seemɔ, mi u wɔrɑ mi. Mɑ nɑ win sinɑ furɔ potɑ kɑ win sumɑ ye u doke nɔmɑɔ. Yerɑ nɑ kɑ nun nɑɑwɑ mini, nɛn yinni.

11 Ye Dɑfidi u nuɑ mɛ, yerɑ u win yɑberu nɛnuɑ u kɑrɑnɑ. Mɑ be bɑ wɑ̃ɑ kɑ wi, ben tii bɑ mɑɑ kuɑ mɛ bu kɑ ben nuku sɑnkirɑnu sɔ̃ɔsi. 12 Mɑ bɑ ɡɔɔ wooru sinɑ bɑ swĩ bɑ nɔɔ bɔkuɑ sere sɔ̃ɔ u kɑ kpɑ Sɔɔlu kɑ win bii Yonɑtɑm sɔ̃, kɑ sere mɑɑ Isirelibɑn sɔ̃, be, Yinni Gusunɔn tɔn be bɑ ɡo tɑbu ɡberɔ. 13 Mɑ Dɑfidi u durɔ wi bikiɑ u nɛɛ, wuu mɑn diyɑ ɑ nɑ.

U wisɑ u nɛɛ, nɛn bɑɑ u yɑrimɑwɑ sɑɑ Amɑlɛkibɑn tem di sɑ kɑ wɑ̃ɑ mini.

14-16 Dɑfidi kpɑm nùn bikiɑ u nɛɛ, ɑmɔnɑ ɑ kɑ kɑ̃kɑ ɑ wi Yinni Gusunɔ ɡɔsɑ nɔmɑ doke ɑ ɡo. Yen sɔ̃, wunɛn yɛm mu yɔ̃rɑ wunɛn wiru wɔllɔ. Domi wunɛn tiin nɔɔwɑ ɡɑ seedɑ di mɑ ɑ wi Yinni Gusunɔ ɡɔsɑ ɡo.

Sɑɑ yerɑ Dɑfidi u win ɑluwɑɑsibɑn turo sokɑ u nɛɛ, ɑ susio ɑ nùn sɛ̃re ɑ ɡo.

Mɑ ɑluwɑɑsi wi, u Amɑlɛki wi sɛ̃re u so u ɡo.

Dɑfidi u Sɔɔlu kɑ Yonɑtɑm ɡɔɔ swĩ

17 Mɑ Dɑfidi u womu ɡeni kuɑ win ɡɔɔ swĩi sɔɔ Sɔɔlu kɑ win bii Yonɑtɑm sɔ̃. 18 Mɛyɑ u mɑɑ yiire bu Yudɑbɑn bibu womu ɡe sɔ̃ɔsi. Tɛndɑ ɡɑ tɔmɑmɔ. Mɑ bɑ ɡe yoruɑ Yɑsɑrin tireru sɔɔ. Womu ɡe wee.

19 Isireli, wunɛn yiikoɡibɑ wɔrumɑ,

wunɛn dɑmɡibɑ kpunɑ ɡuuru wɔllɔ.

20 I ku de bu lɑbɑɑri ye nɔ Gɑtiɔ.

I ku de bu ye kpɑrɑ Asikɑlonin wuuɔ.

Kpɑ Filisiti bɑnɡo sɑri ben kurɔbu bu ku yɛ̃ɛri.

Kpɑ ben wɔndiɑbɑ bu ku nuku dobu ko.

21 Bɛɛ Giliboɑn ɡuunu,

Gusunɔ u ku de ɡurɑ yu nɛ bɛɛn wɔllɔ.

Gusunɔ u ku de kɑkoru tu wɔrumɑ bɛɛn wii kpiirɔ.

Gusunɔ u ku de bɛɛn tem mu dĩɑ ɡeenu mɑ.

Domi miyɑ bɑ tɑbu durɔbu funɛ wĩɑ.

Miyɑ bɑ ben tɛrɛnu kɑsi kuɑ.

Miyɑ Sɔɔlun tɛrɛrɑ ɡum tɛɛnibu nɔru kuɑ.

22 Bɑɑ mɛ bɑ yibɛrɛbɑ wɑɑmɔ,

bɑɑ mɛ bɑ tɑbu durɔbun wɔruɡɔru wɑɑmɔ,

Yonɑtɑm nɔm wĩirɑ kun dwiiyɑre kɑ tɛn tobu.

Sɔɔlun tɑkobi kun mɑɑ kɑm wɔrire.

23 Sɔɔlu kɑ Yonɑtɑm bɑ kĩɑnɑwɑ

ben wɑ̃ɑrun tɔ̃ru kpuro sɔɔ.

Bɑ ǹ kɑrɑnɛ bɑɑ kɑ ɡɔɔ sɔɔ.

Bɑ sɑ̃u tɑbu sɔɔ n kere ɡunɔ bɑkenu.

Bɑ ɡbee sinɑnsu dɑm kere.

24 Bɛɛ Isirelin tɔn kurɔbu,

Sɔɔlu u rɑ rɑɑ de i beku nɔni swɑ̃ɑ burɛɡinu dewe.

Wiyɑ u rɑ rɑɑ de i wurɑn burɑnu doke bɛɛn yɑ̃nu sɔɔ.

I swĩiyɔ win sɔ̃.

25 Dɑmɡibɑ wɔrukɑ tɑbu ɡberɔ.

Yonɑtɑm u kpunɑ Isirelin ɡuunu wɔllɔ.

26 Yonɑtɑm nɛn kĩnɑsi,

nɑ nuku sɑnkirɑ bɑkɑnu mɔ wunɛn sɔ̃.

A rɑ n sɑ̃ɑwɑ ɡɑ̃ɑ bɑkɑnu nɛn nɔni sɔɔ.

Wunɛn kĩi te ɑ mɑn kĩɑ tɑ tɔn kurɔɡiru kere.

27 Dɑmɡibɑ wɔrukɑ tɑbu ɡberɔ.

Tɑbu yɑ̃nu nu kɑm kuɑ.

Bɑ Dɑfidi kuɑ sunɔ Yudɑɔ