Psam
Wonawiiakowa
Raghani iguri kamone, wawaya bogaebogae korotodi ayi da pari mmko bukana kamone sigiruma. Isrel damdi sivituwiitaghoma da toudima sikabepepa. Mma na ayi da pari bogaebogae: mududi na God kabikuwayenina da kabepepina kiiravine bi wiikiikiivenina da wiimiiseyana kiiravine. Mududi na wiiwiita da wiitarababarana kiiravidiye sibaba, bo noghotataveyana kiiravine. Ayi mududi kamodiye na wawaya yadi kiiwawo kiiravidiye sarupari, bi God sibabiini da kadi aviya aro inaveredi. Bi mududi kamodiye na giruma wawayina yana piropiro da nuwapoya kiiravidiye yagwinigwini God biidi.
Yesu touna wosina raghani viya na sisiya mmkodi paridima ivisisiya, bi keresiyana dagudagunama, na God yana wawaya mmkodi ayi da parima siyakabekabepepa.
Psam Vinevineyidi
Psam: 1, 23, 27, 34, 51, 67, 90, 95:1-11, 100, 103, 110, 119:9-16, 139

Nuwamiise wiisuwonina

1 Wawaya iiyawogha berabero wawayidi geyawata siyapeepewa

bi yadi sisiya gesiyakivikivina,

da bada gewiigeruwana damdi yadi sisiya siyawaiwaiyana raghanina God sinamayenina,

toudi nuwamiise wawayidi.

2 Bi gegha da Yawe God yana wiiyeveveyana sivinuwayuyuneni,

na raghani nonowa gabudara da nubabasu na yana gwara sinuwanoghonoghoteni.

3 Toudi ware kii rarima kawabarane siwawa na naboni,

kadi iri vinevineyina nunune suwagha

bi rugurugudi gesiyaraborabobo da siyariirighana.

Wawaya nokodi naboni, na awaki sabera na berana kamna yatubugha.

4 Bi berabero wawayidi na genaboni.

Toudi na ware rugurugu pokina naboni,

yanunu yatapitaveni.

5 Na God matane na toudi gewasina

raghanina wawaya initupawamiwamiredina gabudarine,

toudi kate gegha God yana wawaya yawata sinikapudina.

6 Yawe God kana kivikivina yinaghovedi bi yakoyayidi,

bi berabero wawayidi na rabobo kedane sapeepewa.