1 Bodu bata sikovi murine, Ijipt kana kiiwawo imimeu. Yana mimeu mma naboni: Da touna Nail rarimina ririne iyamiimiiri, 2 bi kau miisedi bi takutakukudi yadi 7 rarimama sigae da siviya siyakamkam. 3 Bi muridigha na kau berodi kirakiramidi yadi 7 bada Nail rariminama sigae, da kau takutakukudi simiiri tawanidi rarima kawabarane. 4 Nokodi kau berodi bi kirakiramidi, kau miisedi takutakukudi yadi 7 sikamkovidi. Wasina bi kiiwawo ivitunoka na imataka.

5 Bi ikena nuwawapa magha na bada imimeu. Da wit kuvedi miisedi tavetaveyana yaporidi yadi 7 nama kiina tanagha sirukewakewa. 6 Wasina bi muridigha na kuvedi yadi 7 sikarapumka sigae, da uwadi na kumararayidi, bi nada raghani matana yanununa muyamuyana ivikarunughana. 7 Nokodi kuvedi kumararayidi, kuvedi miisedi bi ruruvidi yadi 7 sivitonanidi. Wasina bi kiiwawo imataka na inuwagiura da touna iyamimeu.

8 Didibare igeghomiiri na ivinuwabero, na sisiya idaru mimeu kadi wonawonavereyana Ijipt kamone da kate akowa damdi tupadi siyapiika touna biidi. Kiiwawo yana mimeu iwonedi, bi getana iiyabo rubana da nokodi mimeu bata basudi iyawonaverenina.

9 Wasina bi redu verevereyana badana kiiwawo iwoneni bo, “Tagu, kata yagu berona anoghosi. 10 Da naghove noko raghanine nuwanuwam ipughu kam gabugabuna badana da tagu biidi, bi biwa gawarina Potipa yana bare kamone kutorerughuvemii. 11 Toumii tatadigegha nubabasu tana kamimeu, bi mimeudi yadi basuna bogaebogae. 12 Name na Hibru tomogha yaragina toumii yawata, tounana Potipa yana wiitamariyana. Yama mimeu kawoneni, na yadi basuna iwonaveremii. 13 Metagha iwonemii na naboni itubugha, da yagu gawara kuveremayegu, bi kuwona na kam gabugabuna badana kanighona sikasiyarayi da sivirorogi.”

14 Wasina bi kiiwawo yana sisiya idaru Jousep biidi na yaininagha biwa gawarinama sivikanibuveni. Raghanina ivimura ikovi bi kwama miisedi ivikote murine na, sikabi sipiikeni kiiwawo biidi. 15 Da kiiwawo ivisisiya Jousep biidi iwona bo, “Tagu nubabasuve amimeu, bi getana iiyabo rubana da yagu mimeu basudi iyawonavereguna. Bi awaiyana da raghanina mimeu kwawaiyana, na yadi basuna kwawonavereyana.”

16 Na Jousep iwona bo, “Tagu gerubagu da anabera, bi God kawagha wonabodeyana miisena kiiwawo inavereni.”

25 Wasina bi Pero yana mimeu yadi bata ivisisiyedi ikovi na Jousep iwona bo, “Kiiwawo, nokodi mimeu yadi bata na mayimayiyidi bi basudi tanagha. Bi God awaki pinimina bi inabera na kiiwawo biidi ivimaghatari. 26 Nokodi kau miisedi yadi 7 na toudi bodu miisedi yadi 7, bi kate wit kuvedi miisedi yadi 7 na bada bodu miisedi yadi 7; bi mimeudi na mayimayiyidi da basudi tanagha. 27 Bi nokodi kau kirakiramidi yadi 7 murigha sigae na bodu 7, da kate wit kumararayidi kuvedi yadi 7 raghani matana yanununa ikabisisi na ivikarunughana na sivivi: Na toudi kapoe bodudi yadi 7 yirupatanedi.

28 Kiiwawo, mmko metagha awonem na inatubugha: basuna God pinimina bi awaki inabera na iviyevevem. 29 Bodu yadi 7 kamone na moura ghamanakina yapiipiika Ijipt kuburina tupane, 30 bi gegha da kapoe bodudi bada yadi 7 murigha sinapiika, na wawaya Ijipt kubure moura raghanina sininagonagoveni, basuna kapoe kubura tupana inakabimumu. 31 Da moura ghamanakina raghanina kate gegha sinanoghosina, basuna kapoe muriye yapiipiika, na inabero kirakii. 32 Yana basuna naboni kiiravine na kiiwawo nokodi mimeu yadi bata kukita bi mmko noghosina na God tounamani ikayoveni, na pinimina bi berana inabera.

33 Na kiiwawo, memeda kata na tomogha akakovina bi nuwanuwagiurina kuninoyeni bi kunatore da Ijipt kuburina tupana inibadeni. 34 Bi kate Ijipt kubura kamone babada mududi kunavinegha. Bi moura raghanine na kabipura ribadi 5 kamodima tana sinakabitaveni da maghara bareye sinatoura. 35 Mmkodi babada moura raghanine kam tupadi sinituwiitaghoma. Bi tam gamomve na kwanatu nunudigha kam sinimaghara bi sinakighudi da nokona wawaya kadi kam. 36 Bi mmko kamna sinanuwatawani da wawaya kadi kabiwiitete raghanina kapoe bodudi yadi 7 sinapiika Ijipt kuburena. Da mmko kedane na wawaya gegha vitonana sinarabobona.”

37 Wasina bi kiiwawo da yana ababagibagi damdi kadi babada tupadi Jousep yana nuwagiura miisena kiiravine siviwaghasina. 38 Na yana wiitamariyana iwonedi bo, “Wiisuwona God kanumina Jousep gwabine; touda gerubana wawaya tana nuwanuwagiurina tana banani ware mmko tomoyina naboni.” 39 Na kiiwawo imakewamira iwona bo, “Jousep, God mmkodi bera tupadi tam biidi ivimaghataridi kiiravine, na memeda getana iiyabo meme akakovina bo nuwanuwagiurina tam naboni. 40 [a]Anatorem yagu kubura kunibadeni, bi yagu wawaya tupadi sinawaiyanem bi gamom sinakabisisireni. Bi tagu kawagha kiiwawo, kiiravine na yagu wiibadana inagee kirakii gegha tam naboni. 41 Tagu kata avineyim da Ijipt kuburina tupana kana wiibadana.” 42 Wasina bi kana imakwaki kiiwawo yana matakira debane[b] na tounamani imane ikabitaveni da Jousep imane iviyagha. Bi kiikiiwawo kadi kwama yeyeghaninama ivikoteni bi gould posaru kanighone iviruvivireni.

45 Wasina bi kiiwawo Ijipt gamodima Jousep waghawagha ivereni Jepenet-Paniya.[c] Bi bada wasike ivereni da wavinena; kana waghawagha Esenet. Bi tamananaki na Potipera bi On kuburina kana prist.[d] Wasina Jousep Ijipt kuburina tupana ivibadeni. 46 Noko raghanine na Jousep kana bodu 30, bi kiiwawo wiibadana ivereni. Na kiiwawo gwabinama ikanibutaveyana da Ijipt kuburina tupana ipepewawiiwoneni.

47 Moura bodudi yadi seven kamone, na tanawa kam ghamana ivereyana. 48 Nokodi bodudi yadi 7 kamone, na Jousep Ijipt kuburina tupane kam ivituwiitaghoma, da kwanatu nunudigha ivimaghara. Kwanatu nunudigha, na kwabu name riridiye na kam nama ivituwiitaghoma. 49 Jousep wit kamdi riba kiikiitowana ivitubugha ware egha kikire naboni na gerubana da iyakabirubata maghana.

53 Wasina bi moura bodudi yadi 7 Ijipt kubure ipiika tughura, 54 [e]bi bada kapoe bodudi yadi 7 idagu, metagha Jousep ivisisiyana. Kapoe ghamana kubura mududiye bada itubugha, bi Ijipt kuburina tupane na kam nama. 55 Bi raghanina Ijipt damdi vitonana sidagu siyaraborabobo, na kiiwawo siyibabiini da kam iyaveredi. Na iwonedi bo, “Konagho Jousep biidi da awaki inawonemina kobera.” 56 Kapoe kubura tupana ikabimumu bi Ijipt kubure na ibero kirakii da Jousep maghara baredi ikabitavetaveyana bi wit iyigimona Ijipt damdi biiyadi. 57 Kubura mududiye na bada kapoe ibero kirakii, na wawaya nokodi kuburidima sipiika Ijiptma da Jousep gwabinama wit siyagimona.

<- Genisis 40Genisis 42 ->