1 Tagu awona bo, “Wasina, animatipo da tagumani aninuwamiimiiseyena mayegu.” Bi gegha, abanani da mmko bada basuna gegha. 2 Na awona bo, “Maniwa touna neghanegha. Wiinuwamiimiiseyena mayegu na basuna gegha.” 3 Yagu nuwagiura iyinaghovegu kiiravine, na parapa ayanoghonoghota kirakii, da metagha wainma bo neghanegha beradi ayabera da ayinuwamiimiiseyena mayegu, bi ayakovi memeda mmko imiise wawaya kiiravidiye, mma kubura debane mmko raghanina tupona yawayawiidi samakamakena.
4 Tagu parapa bagibagi kiitowana abera. Bare ayoghana, da wain kwabudi kiiraviguve abera. 5 Kiimatagha kwabudi abera bi kii bogaebogae awawa da kam siyavereyana. 6 Bi tarakibubu aberadi da rarima siyaveregu da yagu kii peyaridi kiiravidiye. 7 Bi wiibagubagurana korotodi, tomotomogha bi wasiwasike agimona da kate wiibagubagurana mududi iiyawogha nama yagu bareye situbughana. Bi kate bada kau da sip peyaridi avirapeneyana geware kiikiiwawo iiyawogha Jerusalem kwanatune naghove simakena. 8 Tagu silva da gould peyaridi, nokodi na kiikiiwawo yadi sawara wiinuwakayowanidi kubura wiibatama avituwiitaghomana. Tomotomogha da wasiwasike kiiraviguve sitawora bi bada natuwavinegu kepakepamaridi korotodi, parapa kepakepamaridi. 9 Na yagu sawara parapa sipeyara geware wawaya Jerusalem kwanatune naghoguve simakena naboni. Mmkodi sawaridi tupadi kamodiye, na yagu nuwagiura gemeyani iyakuyoveguna.
10 Sawara akitadi bi akayoveni da ayimatipo,
na toudi beraberadi akivina.
Tagu sawara tupadi mekodi siyaberagu
da ayinuwamiise na avimatipovedi.
Bi bagibagi tupadi siberagu da avinuwamiise,
yagu bagibagi tupadi miisanina kiiravidiye na nuwamiise akabi.
11 Wasina bi sawaridi aberana kiiravidiye parapa anoghota kirakii
da kate yagu bagibagi ghamadi,
bi akita da bera tupadi na kwebudi,
noko ware yanunu taya veraverakwavini na naboni,
da getana awaki toudi gwabidima tanayouna mmko kuburina debane.
Nuwagiura yawata makena basuna gegha
12 Wasina bi adagu aninuwanoghonoghota nuwagiura,
kawakeekee da neghanegha beradi kiiravidiye.
Tomogha iiyabo muriye kiiwawo murinagha inapiika
na awaki nada Tagu abera na bada inabera.
13 Tagu akita da nuwagiura na iwaratete kirakii geware neghanegha naboni,
mayimayiyina yeghana na imiise geware wiididibara naboni.
14 Wawaya nuwanuwagiurina matanama yakita da mebo yanono,
bi wawaya kawakeekeena na ware wiididibare iyapeepewa.
Bi gegha, akovi da berana tanagha yapiika
nokodi wawaya bata biiyadi.
15 Wasina bi awonena mayegu bo,
“Yagu rabobo na mayimayiyina
wawaya kawakeekeena yana rabobo na naboni.”
Bi awona bo, “Mmkona bada basuna gegha.
Na nuwagiura kirakiima awaki akabi?”
16 Getana da iiyabo, wawaya nuwanuwagiurina inanoghotamayenina
bo wawaya kawakeekeena inanoghotamayenina.
Wawaya nuwanuwagiurina yarabobo na mayimayiyina
metagha wawaya kawakeekeena yarabobona naboni.
17 Basuna sawara tupadi mma kubura debane taberabera na nuwapoya saverevereda noko biidi yawa avisinighiighiiyeni. Bera tupadi na basudi gegha - ware yanunu taya veraverakwavini.
Bagibagi kirakii na basuna gegha
18 Tagu yagu kayopika tupadi mma kubura debane asinighiiyedi, basuna akovi da bera ayaberabera na tomogha iiyabo muriguve inibada, na ima debane anakuyowana. 19 Bi iiyabo iyakovi? Noko wawayina inakowa kirakii bo inaneghanegha? Bi gegha da bera tupadi kiiravidiye ayabagibagi na inirapeneyana, sawara tupadi mmko kuburina kamone yagu nuwagiurama situbughana. Toudi na basudi gegha. 20 Na noghota awamiri da yagu kayopika mmko kuburina debane tupadi kiiravidiye na avinuwapoya kirakii. 21 Wawaya na nuwagiura, akowa da noghotama sabagibagi, bi wasina bera tupadi rapediye na sakuyowana da wawaya tana iiyabo gekiiravidiye iyabagibagina inirapeneyana. Mmko bada yana basuna gegha, bi gebera miisenana! 22 Wawaya tubuyinama da gayaminama mmko kuburina debane yabagibagi kirakii, bi awaki yakabi? 23 Yana make gabudaridiye na sinivisi yakabikabi bi yana bagibagi yaberani da nuwanuwana yapughu. Bi kate nubabasuve na bada geiyakenakenana. Mmko bada basuna gegha.
24 Bera miisena wawaya inabera na inakam da inaniuna bi ininuwamiise basuna awaki ibera situbughana kiiravine. Bi akita da mmko teya na God gwabinama ipiika, 25 basuna God gegha, na getana iiyabo inakam bo ininuwamiisena. 26 God, na nuwagiura, akowa da nuwamiise iiyawogha sinuwamiimiiseyenina yaveredi, bi tamumu damdi na yaberadi da sabagibagi, situwiitaghoma da simaghara, bi iiyawogha sabera da God yinuwamiise na mourina toudi yaveredi. Mmko teya, na basuna gegha - ware yanunu taya veraverakwavini.
